【BLW食啲乜?】BLW心得#9 – BLW餐具點揀好?

【BLW食啲乜?】BLW心得#9 – BLW餐具點揀好?


好多媽媽都問過我關於BLW嘅心得,今日等我喺到分享下啦~

幾時開始BLW?

好似係8個月,一開始係TW,但後尾發現媃媃唔鐘意人哋餵,就試下轉BLW。嗰陣係慢慢加FF,不過就無停一段時間先轉,因為個陣就算係食粥媃媃都會係咁咬咬咬😂

點揀餐具

相信唔少媽媽都同我一樣都對於點揀餐具覺得好迷茫,市面上選擇太多,又全部都好靚,點揀先啱呀?今日就等我同大家分享吓幾項要特別注意嘅事項啦!

1️⃣根據成長情況變換餐具
唔同嘅階段其實用嘅餐具都唔同㗎~ 初初開始接觸餐具比較着重嘅係餐具本身嘅質地,同埋容唔容易拎上手,呢個時間我會偏向揀比較軟身嘅餐具。
初學階段其實唔係追求BB可以擺到幾多野落口,而係要佢哋學識點樣去運用個餐具,所以呢個時候比較着重安全性多啲,當佢已經識得點樣運用餐具嘅時候,媽媽就要考慮實用性啦,例如係佢會唔會好容易可以食到野?會唔會拮唔實食物?

初學建議品牌:Itzy Ritzy
較大嘅BB建議使用品牌:Marcus & Marcus

Itzy Ritzy
Itzy ritzy
Marcus & Marcus
Marcus & Marcus

2️⃣安全無毒
餐具係最常接觸口腔同埋食物嘅物件,千祈千祈唔好貪平,或者覺得好靚就買,用安全無毒嘅餐具對Bb來講係非常重要。所以我哋去揀餐具嘅時候都要去揀一啲無塑化劑、BPA、三聚氰胺等成份嘅餐具比小朋友用。

3️⃣容易清潔
去揀餐具嘅時候盡量揀一啲夾縫比較容易清潔嘅餐具,因為呢一啲位置都係比較容易藏污垢嘅,如果好難清潔嘅話就會好容易發霉或者有細菌。

4️⃣耐熱溫度
相信好多媽媽都會將BB嘅用品放落消毒機度消毒,所以我哋去揀餐具嘅時候都要留意吓餐具嘅耐熱溫度~個人比較建議選用矽膠餐具,耐熱溫度可高達220度。

5️⃣吸力
呢一點係非常重要,一個吸力好嘅餐盤就好似一對舒服嘅跑鞋,跑得舒服先令人想繼續跑落去。試諗吓,餐餐都跌個餐盤落地下,媽媽嘅心臟要有幾強大先可以繼續落去😫。
我去睇餐盤嘅時候,經常都會去睇吓其他真實用家嘅評價。不過值得留意嘅一點係,我哋要去睇埋個位用家坐嘅high chair。用Stokke嘅媽媽就要特別留意啦,因為都比較多餐盤係唔啱放落去Stokke嘅餐盤。

個人建議韓國品牌BlueMama👍🏻

BlueMama
BlueMama

6️⃣容量+間隔
餐盤容量同間隔都係好重要嘅一點,有時候想整多幾款食物俾小朋友。如果餐盤只有三格嘅話,啲食物就會撈埋一齊,所以我自己偏向鍾意揀一啲分隔比較多嘅餐盤,當然都會睇吓每一格嘅容量大唔大。

個人建議韓國品牌BlueMama👍🏻

7️⃣點樣揀口水肩
呢個都係按階段有唔同嘅選擇。
細個啲嘅時候我都係買長袖然後包埋枱嗰啲,呢啲就唔怕佢哋跌到成身都係。
大個啲就可以用有個兜嘅掛頸口水肩,因為已經開始大個,慢慢食得越嚟越乾淨,係驚有時食食下都會跌少少。

——————————————————

詳細心得:

碟/碗最著重係黐得實唔實,我買過We Might Be Tiny / Dot to Dot / Marcus & Marcus / B.Box / BlueMama / B&H / eLipse 好似係咁多。
講咗碟先,用邊隻係視乎食咩食幾多。
容量黎講一定係Dot to Dot取勝,連佢隻耳都可以用埋,同埋都黐得幾實。
We Might Be Tiny 嗰陣係比個樣吸引嘅,不過都黐得實,略嫌佢兩隻耳容量有啲細,同埋會頂到張枱條邊😂。
Stokke用家請留意👀,BlueMama係第一名,因為黐得好實,真係好實。用開Stokke都知,我哋買碟要好小心,有啲真係係黐得好實,但size唔啱幾實都係假嘅。
BlueMama size好fit,仲要有4格咁多,點拒絕?😌😌

碗嚟講,得eLipse最推薦,因為真係黐得好實,同BlueMama一樣。同埋容量夠大,而且碗邊係彎嘅,容易比小朋友𢳂到野食。
點解另外嗰啲唔推薦?
B.Box 先,黐得唔夠實,唔夠大。
Marcus & Marcus ,黐得實,碗邊係彎,都容易𢳂嘅,不過佢好黐塵,同埋碗底污垢好難清潔。
而B&H,我買嗰隻係係可以加熱水係底嘅保溫碗。呢個唔係講笑,先唔講保唔保溫,佢個底有塊膠比你黐實張枱,嗰塊膠真係伏界第一名😂,完全無用。但如果你係攞住黎餵,咁就有用啦,因為佢真係保溫嘅,如果BB食得慢就好啱用啦。但如果你想放喺high chair餵,咁要三思。

好,到餐具,餐具用過 kidsme / Marcus & Marcus / Itzy Ritzy / B.Box。
餐具嚟講,好難分高下,因為唔同嘅食物,唔同嘅階段,每個brand 對我嚟講都係好好。
Itzy Ritzy 同kidsme 比較適合初學階段,因為形狀都係比較容易比小朋友揸上手。初學嚟講Itzy Ritzy 會更勝一籌嘅位係,佢係軟身嘅,會比較安全。
B.Box 都好適合初學BB,因為佢匙羹係弘弧形嘅,可以比小朋友學習到拎餐具既正確姿勢。同埋隻叉好容易拮到野食。
而Marcus & Marcus 就比較適合熟練之後用啦,因為我覺得佢唔適合學習階段用,因為冇上面3個咁好揸同埋佢係不銹鋼,比較適合大個啲嘅BB使用。

——————————————————

以上只係媃媃媽個人意見,並非專業意見🙌🏻,但全部都係血汗史嚟,個人真實情況😂,希望幫到你哋~

=============

90後媽媽同為食bb😍
最鐘意幫bb扮靚同研究唔同得意既食物,
同埋最主要係研究以最少食材同步驟既bb輔食🤣🤣
得閒研究有咩打卡好地方📷🤳
Instagram: yuetyau1117