【感人故事】獨腳女孩幼稚園畢業,齊祝福又立幸福成長!

【感人故事】獨腳女孩幼稚園畢業,齊祝福又立幸福成長!


每個爸爸媽媽都希望自己嘅小朋友喺開心、健康嘅環境下成長,邊會諗到做足咁多次產檢竟然會喺出世嘅一刻先發現自己帶嚟嘅新生命擁有住唔健全嘅身體呢?

台灣嘅「獨腳天使」徐又立小朋友天生就少咗雙手同右腳,出世時醫生仲發現有肺部問題令佢要留院一個月先可以維持到生命。不過堅強嘅又立同埋爸爸一直堅持同努力,嚟緊8月又立就6歲喇~9月仲順利入讀小學,我地都一齊睇下佢嘅故事,為佢打打氣啦!

又立同一般小朋友唔同,從小要學習使用義肢。其他嘅同學仔可以自由四圍奔跑,但又立只能夠靠一隻腳滑行,不過好聽話嘅佢都冇放棄自己,仲幫爸爸嘅麵線店看舖,成為一個小店員添~

返學嘅時候,又立當然都會俾唔同嘅同學仔問「點解你同我地唔同嘅?」呢個時候又立都會好成熟咁回應「我係咁嘅~呢個就係我」正正就係「每個人都唔同,但其實每個人都一樣」嘅道理。雖然呢個台灣小妹妹外型同我地未必一樣,但係佢同樣都會做搞鬼嘅表情,同樣都有思想,甚至比好多同齡嘅小朋友諗法成熟同獨立。

喺今年6月,又立同其他小朋友一樣都幼稚園畢業了。可能好多學生都會諗「升小學,媽媽要買新書包~新文具~」但又立嘅願望卻簡單而直接 — 希望返小學之後,唔好再有人話我嘅手同腳好奇怪。

擁有開朗性格嘅徐又立成日都會笑,依然對生命充滿希望,但其實佢每年都要受皮肉之苦。由於佢年紀一直長大,佢嘅皮肉生長跟唔上骨骼發展嘅速度,所以每年都要去醫院做手術,喺胸口同手上開刀,令骨骼得以發展,不過小小嘅又立同爸爸都冇因此而放棄。

小又立好快就會踏入人生嘅另一個小階段,我地都一齊為佢同爸爸加油啦!