【Mama專訪】走過產後抑鬱!全靠運動!帶你一齊走出陰霾!

【Mama專訪】走過產後抑鬱!全靠運動!帶你一齊走出陰霾!


「產後抑鬱」4隻大字,令好多新手媽媽都聞風喪膽!但事實係,真係好多媽媽會面對呢個情況,非常普遍,所以大家更應該提早認識!呢位媽媽曾經都患上過產後抑鬱,就係靠住運動,佢成功走出情緒陰霾!即刻睇吓佢嘅經歷啦! #各種抑鬱先兆 #放過自己


媽媽資料檔
姓名:Emily
小朋友名:Adi
小朋友年齡:10個半月
Instagram:the.kentish.wife




Emily喺香港出世,喺英國結婚,現居住喺肯特(Kent)。囡囡Adi 依家已經10個半月大,下個月尾就一歲啦!當Emily回憶起佢患上產後抑鬱嘅時候,都不禁感慨認為唔只係自己,產後抑鬱的確係老公或夫家,經常忽視嘅問題。特別係初期產後抑鬱嘅先兆都會比較輕微,未必會及時發現問題。

初時產後抑鬱先兆

1) 會不停喺腦海回想人哋對自己做過「無為自己著想」嘅事,並且放唔低。

2) 容易放大負面情緒,小事都會覺得大件事,好容易受到言語上刺激而喊。

3) 頭3至4個月會覺得同bb聯繫唔到。佢相信bb都有覺得媽媽好焦慮,所以比較喜歡同爸爸玩。照顧bb似托兒上嘅責任,唔覺係親子嗰種聯繫,即使Emily已經係母乳媽媽。

4) 負面情緒影響日常生活,例如:管理屋企/做家務。連產前最愛焗麵包,產後抑鬱時都提唔起勁,唔想整,咩都唔想做。

5) 負面情緒得唔到老公諒解,令人奶量喺4個月時減少咗40%。

向醫生求助無果,用運動「得救」

去到第4個至第5個月,Emily已經有尋求治療師嘅協助。但經過3場線上治療會議(online therapy session)之後,治療師就已經「check out」咗Emily,結束療程。但Emily老公仍然覺得佢好容易嬲,係一個「very angry person」,唔容易相處。

由產後到6個月,Emily都完全唔想見任何人。佢覺得老公唔明白佢,亦都唔識幫助自己走出陰霾。於是佢決定「自救」,透過網絡了解到,原來me time同self care都可以令自己走出情緒陰霾。於是佢每日都喺囡囡午睡時間─Nap 1 (9至10am) 和 Nap 2 (1至3pm) 嘅時候做運動,俾自己身心放鬆,讓腦袋放空,唔睇電話。從此由討厭運動變到愛上運動!

由54kg減到46kg!足足8kg!

搵到新興趣後,自己都無再集中喺負面嘅人和事,變得更愛自己。Emily亦答應自己要做一個「最健康媽媽(生理同情緒上)」。

產後抑鬱走咗之後,自己身體體能明顯好唔少,變得更有力量抱BB跑上跑落!另一方面Emily同老公嘅關係都得以改善。大家唔再堅持己見,更係會為對方製造驚喜。喺囡囡7pm瞓覺後,佢同老公都會有couple-ly time,又會有me time,對夫妻兩個人都有好處,兩人相處都無好似之前咁負面地緊繃。

想同準媽媽和正在經歷新手媽媽講⋯⋯

1)唔好遲疑。如果有懷疑,盡早搵專業人士做評估同治療。

2) 唔好收收埋埋,更加要開口搵家人和朋友傾談自覺有產後抑鬱。產後抑鬱其實好普通,唔好覺得shameful(羞恥)。

3) 要同老公傾好分工,每日俾自己一小時me time。無論係做運動定放空,總之呢一小時係俾自己,唔係俾老公/小朋友,呢一小時只做自己喜歡的事。

4)專業人士或治療師可教識你點去正面思考,同教你點樣唔好以心情或情緒去作出決定或者行動。但係,走出情緒陰霾都係要依靠自己。

5) 放過老公 = 放過自己
產後抑鬱時,會覺得老公做咩都唔夠好,唔夠啱標準,唔合心意,好容易雞蛋裡挑骨頭,令兩人磨擦多上加多,最後令媽媽情緒更差。要學識放手,俾信任老公,佢都係學習中,相信佢下次會做得更好。

Emily希望透過自己經驗幫到各位新手媽媽,帶自己走出情緒陰霾!