【英國移民資訊站】吸引家長移民英國嘅10個因素 教育大不同!

【英國移民資訊站】吸引家長移民英國嘅10個因素 教育大不同!


移民英國為下一代值得嗎👶🏻?英國嘅教育方法大公開💯!小朋友一份功課都無📝?可以學唔同語言🗣?唔會因為成績嚟肯定小朋友💪🏻✍🏻?有興趣移民英國嘅大家即刻睇下啦👀!!#真實經驗分享 #移民爸媽必睇

1.快樂指數

喺英國嘅小朋友比較開心,呢度好多綠色嘅地方小朋友可以自由奔跑!教育文化係有差異,去郊區、森林附近家長都會俾小朋友玩到成身泥,完全唔介意!反而主張俾佢哋自由探索、多啲嘗試。所以喺英國完全眼界大開原來可以咁樣教育,擔心佢哋受傷或者會污糟會局限咗佢哋嘅學習範圍、可以探索嘅機會。呢度好多餐廳都有你嬰幼兒嘅設施,大部份餐廳都有換片嘅廁所!所以總括呢度嘅環境、大家對小朋友嘅接受程度,都非常好。

2.壓力少

我囡囡今年三歲半,返緊Nursery嘅半日班,真係一份功課都無!只係每個禮拜做一份閱讀報告。而我都問過香港小朋友同年嘅家長,呢個歲數可能已經要寫好多字,或者有功課要做,比起香港少好多壓力。另外呢度四歲先開始學寫字,而我囡囡而家返學唔主張要學寫字但係都有學A-Z,1-10等等。我都有好心急問點解未學寫字,但英國教育界嘅朋友表示,呢邊係四歲先學寫字,唔會迫小朋友學,所以宜家仲係好輕鬆愉快學習。

3.自主學習

我覺得係英國嘅教育好好,唔會係填鴨式,會針對小朋友興趣而教。小朋友有興趣嘅話就好自然主動想學多啲,提高小朋友學習動機!

4.學習多種語言

係英國教育,小學開始已經要學唔同語言。除咗英文,仲有西班牙文、法文德文等等。我覺得由細俾佢哋接觸多語言,可以等佢哋認識更多唔同語言。前排我去參觀小學,嗰間小學話每個星期指定有一堂都係學西班牙文,而且我有聽過其他家長話學校都有其他語言嘅選擇!我覺得呢樣嘢好好!

5.校區選擇多

喺香港學校主要集中喺九龍塘區,或者港島區。英國真係好大,我淨係講倫敦啦,都已經有好多好嘅校網區!例如傳統好啲嘅區係西面係白人區。而我住喺東倫敦,校網都不過不失㗎!所以我覺得呢樣嘢都幾好。

6.多綠化環境

係英國真係好多綠化環境,我自己好鍾意小朋友都好鍾意去公園玩、跑跑跳跳!雖然我住喺倫敦市中心,但大概大概坐一個鐘車,已經有好多森林可以去玩。其實對小朋友係好好因為森林有好多嘢玩、探索、學習!

7.功課少

囡囡暫時基本一份功課都未做過,聽家長講下年有一半嘅功課,都話喺學校完成!然後放學返屋企,其實係無乜功課。我識有啲家長小朋友大我個女幾歲,小朋友可以夜晚七點瞓覺?!放學返到屋企都四點,仲要食晚餐、沖涼、做功課,都可以咁早瞓即係證明好少功課做。同埋喺度返學多咗好多同屋企人玩嘅時間,共享家庭樂。

8.比較少

我覺得真係文化差異,呢度無咁鍾意比較!例如我工作係做文員,或者保安,唔會以職業來判斷好壞,因為社會上大部份嘅工作扣稅之後嘅糧都差唔多。對小朋友亦都唔會話學幾多個興趣班會叻啲!所以可以係一個好輕鬆嘅環境下成長。

9.多讚賞

喺呢度好多時第一時間都係會讚,有啲人可能覺得英國人好虛偽,其實聽落被讚賞係好舒服,亦都會增加自己自信可以越嚟越有動力做好!

10.隨意隨性

我覺得呢度嘅文化同家長都比較隨性,即係譬如喺香港通常家長都會要求小朋友拎幾多個A、參加幾多個興趣班。但呢度唔會因為成績嚟肯定小朋友!

This image has an empty alt attribute; its file name is 108205535_307067890664002_3027329838889679779_o-500x375.jpg

啱啱就分享咗喺英國住左一段時間英國教育比我嘅感受,其實每一個家長都好想將自己最好嘅嘢俾下一代,例如學術好、品格好或者社交好。所以其實我覺得英國教育真係好吸引我,好似我咁我自己喺香港大,感覺上就比較束縛,有框框,例如要做專業人士先叫成功。但係英國就唔一樣!我相信大部份小朋友係英國成長都會好開心!

=====================

2014年由香港移居英國倫敦, 居住了5年多, 由結婚3日後到步英國, 到現在由2變4。 全職媽媽, 每日絞盡腦汁令2個寶寶放電, 分享及交流倫敦湊仔生活。

FB:周悠溢國•倫敦Sue媽媽