【英國移民資訊站】點報學校?英國0-4歲嬰幼兒教育制度分享

【英國移民資訊站】點報學校?英國0-4歲嬰幼兒教育制度分享


上次就同大家分享咗一家四口喺英國每個月嘅洗費。今次同大家分享各位爸爸媽媽可能最關心嘅小朋友學校相關資訊啦!

英國嘅教育制度係點㗎呢?

0-2歲 Nursery
3歲 Nursery / Pre-school
4歲 Reception
5歲 小學(Year1-6)
11歲 中學(Year7-13)
18歲 大學

幾時係最佳入學時機?

1. 入小學之前,3歲左右
2. 入中學之前,10歲左右
把握呢兩個時間去英國的話,就可以更易入讀到心儀嘅學校。

點樣選擇學校?

每一間學校都有開放日,但需要個別預約。可以去唔同嘅學校網站查詢報名時間,時間大約喺每年年頭左右(1月前會截止)。若果真係錯過咗開放日,都可以打電話去個別預約。但一定要上網睇清楚,因為每間學校都有唔同嘅安排。

學校網站

學校網站真係好重要,可以睇到好多重要資訊,例如:收生安排、報讀、公開成績、課程、學生成績進度、課外活動同最重要睇返個試學報告。

從試學報告可以睇到呢間學校嘅評價。
1.Outstanding(出色)
2.Good(好)
3.Improvement(需要改進)
4.Inadequate(不足)
如果達到Outstanding或者Good就已經可以去就讀。

點樣計算入學年份?

因為我啱啱幫阿女去報Pre-school,所以睇過一啲表格。
計算方法如下:
eg. 囡囡 2017年6月28日出世
今年9月要就讀Pre-school
申請表上面有寫,1/9/2016 – 31/8/2017係今年3歲9月入學嘅收生年期。所以9月1日後出世嘅小朋友就要報讀下一年度。

報讀公立學校需要咩文件?

1.出世紙/護照
2.住址證明(水、電、煤)
3.Council Tax信件

點樣報讀公立學校?

首先上Council網站,睇返自己屬於邊區,入面有一欄Education。

入面可以報讀小學、中學。如果你係插班生,都係喺呢個網站報讀。不過如果你選擇讀私立學校,就要自行去心水嘅私立學校報名。

入學優勢條件

好多家長都好緊張,點樣可以更易入到心水學校呢?其實由Council抽籤之後,都係會大致就以下條件去睇:
1.地址距離
學校同住址距離,越近機會越大。
2.兄弟姊妹
如果有兄弟姊妹喺呢間學校就讀,都會增加入學機會。
3.家長是教職員
4.宗教信仰
好多基督教學校都要你去指定教會,可能需要你有穩定去指定教會聚會一段時間(如:半年至一年)。每間學校唔同,記得Check清楚啦!

媽媽幾時可以踏入職場?

其實小朋友到4歲,就讀Reception時就會返8點半到3點半。而且好多學校都有Breakfast Club同After School Club,咁小朋友就可以由8am到6pm都留喺學校。咁媽媽就可以選擇出嚟工作,唔使咁擔心!同埋呢邊嘅僱主都好好,你可以同佢講定,例如你6點要接阿女,可能佢5點半就會俾你放工,我自己之前個僱主都會咁做,都唔會扣我錢。

詳細介紹0-4歲嬰幼兒教育相關

daynurseries.co.uk

呢個網址可以幫你搵到你住嗰區有咩Nursery。首先輸入Post code,就可以睇到有咩學校,佢哋嘅排位、環境、基本資料。

Nursery係咩?有咩服務包含?

其實英國係有一年產假,一年之後每個媽媽都要踏入返職場,所以大多數都會送小朋友去Nursery。

返學時間:星期一至五(8am-6pm)
收生:3個月-5歲
包括:食物、尿片
每月平均學費:£1500
*各位家長記得報讀前一定要去視察吓環境!因為可能有好大落差㗎!

可能好多家長都係喺金絲雀碼頭(E14)返工,呢一區嘅Nursery收費係£1800-2000,但家長們為咗俾小朋友就讀好啲嘅Nursery,都好搶手,要爭崩頭同好早去報名!如果讀唔到E14嘅Nursery可能就要跨區去讀啦。

例如我住喺東倫敦嘅斯特拉特福(E15),我睇過2間,個收費都大約係£1000。但質素就好參差,可能比較殘舊,學生同家長質素都比較低,所以唔太想俾自己小朋友去入讀。

建議最好就係自己親身去體驗一下,如果去唔到,都上網睇吓有無啲媽媽Group之類,攞多啲資訊。

2-4歲教育福利

2歲:每星期有15小時免費教育(需要入息審查,唔係每一個家庭都可以申請)

3-4歲:每星期30小時免費教育(雙方父母在職) / 每星期15小時免費教育(父母其中一方就職)

攞我自己做例子,老公有返工,我係全職媽媽,所以我個女每星期就可以攞到15小時免費教育。

阿女今年9月就要讀書,要報Nursery或者Pre-school。所以我就喺我個區,報咗大概3間Nursery,全部都入咗Waiting List,未有offer。我今年年頭就識咗啲同區嘅家長,佢哋教我原來公立學校入面都有Nursery報,我先知道。所以我都報咗一間自己區內嘅Pre-school。但因為我1月左右先報,已經錯過咗個報名時間,所以阿女都係喺Waiting List入面。

咁其實Nursery同Pre-school有咩分別?

Nursery就好似我之前提過,返學時間係8am-6pm,我就俾佢一星期返2日,即係每星期返20小時,所以拎完福利之後,我都要補貼少少錢。

如果我俾阿女讀公立學校嘅Pre-school,佢哋就有分上下午班。
我報讀嗰間時間如下:
上午班:9am-12pm
下午班:12pm-3pm
全日制:9am-3pm
所以就可以剛剛用15小時,就唔使額外補錢。

所以各位阿媽去報讀之前都要留意清楚,唔好好似我咁失策同粗心大意!好彩阿女係下年先讀Reception,嗰時係重要啲嘅。所以我都會做好準備,下一年會早啲留意我嗰區啲學校嘅開放日、報名時間⋯⋯下年一定唔會咁失策啦!

但我都唔擔心嘅!因為我自己唔想跨區返學,加上質素參差問題,所以我先無報其他學校。但如果9月都未等到offer,我都會選擇送我個女去其他區讀。

我都有識開啲家長朋友以前住喺Zone1-3,但為咗校網、為咗多啲綠化地帶⋯⋯都會向外發展住Zone4-6,個個都唔同!嗰個地方可能無地鐵,但都會有火車站方便老公返工。

好多人都問我住邊區,我嗰區校網好唔好?

好坦白同大家講,我嗰區唔喺好嘅校網區。無家長會因為校網而嚟我呢區住,但我嗰區就多職青、young couple居住。喺十年前呢,好多人都驚我住呢個站(Stratford)。但好彩喺2012奧運就揀咗呢個站起運動場,例如奧運場館游泳池、單車館、奧運村⋯⋯所以呢個站就發展咗(East Village,新Post Code:E20)。依家就有3間Nursery同3間新嘅小中學。我自己睇過其中2間小學評分都係Outstanding,另一間太新就未有banding。

如果問我會唔會搬離呢區呢?

我暫時就唔會啦,我都幾鍾意呢個區。因為呢到有個大商場,叫Westfield。但其實倫敦只係得2個大商場,一個係東邊嘅Westfield同一個係西邊嘅Westfield。我樓下仲有個好大嘅公園!所以都有幾個吸引點令我暫時唔會搬走。

=====================

2014年由香港移居英國倫敦, 居住了5年多, 由結婚3日後到步英國, 到現在由2變4。 全職媽媽, 每日絞盡腦汁令2個寶寶放電, 分享及交流倫敦湊仔生活。

FB:周悠溢國•倫敦Sue媽媽