【1-3個月大嬰兒發展全記錄】新手必睇!了解BB每個階段情況&需要!

【1-3個月大嬰兒發展全記錄】新手必睇!了解BB每個階段情況&需要!


孕期唔長唔短,仲記得陀B最辛苦一定係頭3個月。轉眼BB就出世啦,父母們又要重新適應生活。

如果係新手爸媽,冇經驗真係會毫無頭緒唔知點算好!!
等我分享一下關於BB每個發展階段嘅小資料啦~~

BB一出世頭一至兩個月,通常都係食飽就瞓,瞓飽就食。

喊、換片、食奶

記得每次餵完奶,一定要掃風同埋留意瞓咗覺嘅BB有冇吐奶情況!!
到BB滿3個月大,佢哋慢慢會開始會有以下嘅能力。

活動方面: 

佢哋開始可以流暢、自如地擺動身體及四肢,有時仲會用力咁伸直雙腳或者踢腿。

頸仔開始夠硬,可以趴。同時能夠抬起頭,仲會用前臂支撐身體。

扶BB坐起身嘅時,佢哋頸仔夠硬。

已經可以抬起頭,而且頭仔仲唔會晃嚟晃去。

開始將手放到嘴邊吸吮,食手或者食手指。

亦開始識放鬆手指,打開手掌,同時亦識抓住喺手旁嘅物件。

會用力擺動身體同手,去嘗試觸摸懸垂/身旁嘅物件。

視覺方面:

BB會開始觀察四周圍嘅環境,會注視人嘅臉孔 (即係認人)。
能夠認出熟悉嘅人,視線亦會追隨熟悉嘅人而移動。
視線和頭部亦會追隨物件而左右轉動。

聽覺及語言方面: 

頭部會隨聲音嘅方向轉動,鍾意聽音樂。
聽到熟悉嘅聲音會笑,聽到媽媽嘅聲音會笑得更加開心。
開始模仿或發出某些聲音,如「咕咕」聲和「呀呀」聲。

社交溝通方面:   

會以微笑與人溝通,特別係鍾意對住熟悉嘅人笑。
妹妹見到和牛B家姐通常都會笑得好開心,因為家姐好鍾意逗佢玩~

仲會開始模仿照顧者嘅表情。

而且仲會用哭鬧、發出咕咕聲、同唔同嘅表情同身體語言去表達自己嘅情緒及需要。佢哋開始喜歡同人玩,但當你停止嘅時候佢或者會覺得未玩夠,就會喊~

而作為家長,BB係一張白紙。

亦只係剛剛嚟到世界3個月左右,所以對世界好陌生,亦需要有安全感。其實父母多啲安撫BB,佢哋就會有安全感。同時都可以培養佢對你嘅信任,從而建立自信。

之後就可以令佢能夠逐步離開我哋嘅懷抱去學習同埋探索,發展成一個獨立、有自信嘅人。

呢段嬰兒時期,對BB日後發展好重要。
建議多抱抱BB,同BB傾計、唱歌,同佢玩

不過以上資料都係俾大家參考一下,始終每個BB都唔同都係獨一無二。
所以發展速度、身體發育情況都唔同。
分享只係想俾大家知,大概發展情況會係咁樣。

讓新手父母可以大概了解到BB每個階段嘅情況及需要。

==========================

新手媽媽努力地學習中,分享我的親子育兒點滴、餵哺母乳貼士、親子活動好去處。

Facebook:和牛b的成長日記