【髮型師親授!】小朋友在家剪髮秘技(男生篇)

【髮型師親授!】小朋友在家剪髮秘技(男生篇)


最近疫情嚴峻,好多小朋友都出唔到去剪頭髮,各位爸爸媽媽要做埋髮型師,幫小朋友親自操刀。但拎起把鉸剪同電剷就有啲心驚驚,怕一個唔覺意就失手!今次ilovemama邀請到Since Salon嘅Creative Director – Joseph 教大家點樣幫小朋友喺屋企剪頭髮。今次就會教咗男仔先!

Joseph – Creative [email protected] Salon

準備工具

在家剪髮準備工具

男生篇:

  • 剪髮袍
  • 分區夾
  • 剪髮梳(白色/米色)
  • 牙剪、魚骨剪(透薄用)
  • 電剷(配有髮套)
  • 剪髮面罩(可省略)
    撕開之後貼喺額頭位置,減少水或頭髮碎跌入小朋友眼睛。
  • 棉條(可省略)
    圍剪髮袍之前先圍喺小朋友嘅頸度,減少髮碎跌入身體。

髮型設計教學

是日小Model Rio

介紹返今日為我哋示範嘅小Model Rio(檸茶與飯飯的魔衣櫥)!Joseph就留意到Rio本身嘅髮型係刻意留長咗頭頂嘅Section,而側邊剪短,呢種剪法叫做Undercut, 比較適合父母幫小朋友剪,相對嚟講難度性低啲,唔需要諗長短部分嘅連貫,只需要諗頭頂分區點樣做。不過前蔭好容易跌晒落嚟,遮住條眉。Joseph建議小朋友可以露多少少額頭,個感覺會Smart啲!

Undercut剪法前蔭易滑落遮眉

另外都要留意小朋友頭髮嘅毛流走向,好似Rio本身嘅頭髮都比較向前生,所以就算留到好長都好,點撥都係會跌落嚟。Joseph就打算今次同佢嘅分區會擺多少少去另一邊剪短,留返小部分頭髮長少少,頭髮自然冇咁容易成日跌落嚟。

分區擺多少少去另一邊剪短
今次會示範嘅剪法叫做Double Cut

今次會示範嘅剪法叫做Double Cut,短同長嘅部分會做個自然嘅銜接,連貫地由短至長。

用分區夾將頭髮分區

首先用分區夾(Long Clip)將頭髮分區,分好界之後打橫、水平咁夾起頭髮就可以。

先將太長的頭髮初步剪短

 可以先將好長嘅頭髮初步剪短,令一陣用電剷嘅時候更加暢通無阻。

電剷教學

電剷設有長度調校

留意電剷齒位調校
如果大家喺屋企幫小朋友剪,揀個細細嘅電剷都夠用。通常剪髮剷都有得調校齒位嘅距離,將佢推前推落,推到最上就會最貼,推落嚟就有個距離,唔會剪得咁貼。電剷配有髮套嘅就比較安全,唔怕剪得太貼,如果唔係耳仔位攝咗喺電剷嘅罅,都有機會整到流血。如果你加咗個套,就建議將個齒推返上去。

注意頭髮生長方向,逆向剷效果更佳
倒生頭髮,由上而下剷

注意頭髮生長方向,逆向剷效果更佳
跟住小朋友頭髮生長嘅方向,如果佢向上,你就由上而下剷,反之亦然,咁樣就會剪得到晒啲頭髮同埋效果最自然。男仔好多時後面嘅頭髮會倒生,如果向上剷就會剪唔到,調返轉由上而下剷就比較容易修到。

頭骨凹凸不平,切忌剷太貼

注意頭骨凹凸,切忌剷太貼
剷嘅過程中,可能會發覺小朋友頭皮上有深淺不一嘅情況。因為頭皮係凹嘅話,視覺上就會呈現比較深色,而如果頭骨係凸或者正常嘅狀況,視覺上就會淺色啲。所以如果你知道小朋友嘅頭皮係凹凹凸凸,就留意唔好剷得太貼,否則啲凹凸位、深淺位係會更加明顯。

Double Cut 剪法連貫
由短至長,自然銜接

銜接位要自然、連貫
Double Cut 著重剪法連貫,好短同好長嘅頭髮之間自然銜接,可塑性同髮型嘅變化都多好多。處理由短變長嘅頭髮,唔需要將電剷成個推入去剷,只需要輕輕向上剷(詳細手法請觀看影片),如果唔係就扁晒㗎喇。下一步再想修得Smooth啲,就可以拆咗個髮套,記得齒位要校返冇距離,最貼近嘅。

將剪髮梳打橫,再用電剷由右至左剷走多餘頭髮
用白色或米色梳可以清楚看到需要修剪的位置

配合剪髮梳,仔細修剪
今次Joseph想側面剪成完全垂直嘅水平,只要喺一個平嘅狀態,將剪髮梳打橫,用白色或米色梳就可以清楚睇到凸出嚟嘅頭髮係要修剪,再用電剷由右至左剷走多餘頭髮。保持住把梳係垂直嘅,不斷再向上一層修剪。

順著頭型位置移動方向

順著頭型位置移動方向剪
Joseph提醒大家「頭喺圓嘅」,幻想而家呢個位係6點,你就要好似個鐘咁樣移動位置剪,6點去到7點位、8點位⋯⋯咁你就會令到個髮型係有個弧度。

剪刀教學

練習使用平剪刀動作

使用鉸剪需要練習手勢
其實用鉸剪或者牙剪都可以剪到側邊,但相對嚟講技術就高好多。如果媽媽們有興趣,可以買把價錢平啲嘅剪髮刀,Keep住練習呢個動作!如果唔係基本上好難揸到把鉸剪,做到你想要嘅效果。

魚骨剪可營造參差效果
將剪髮梳打橫擺,由下至上修剪

魚骨剪可營造參差效果
如果大家想將接駁位修剪得再Smooth啲,又有練習到揸鉸剪動作,就可以用呢個魚骨剪!佢比正常嘅牙剪個牙口係闊啲嘅,可以將一啲好短嘅頭髮,做到一種參差嘅效果。同樣好似用電剷修剪咁樣,將把梳打橫擺,只係電剷係由右至左剪,而用魚骨剪就係由下至上,一層一層向上修剪。

前蔭前短後長更型格
如不想太齊,可用剪刀向上修剪

前蔭前短後長更型格
前蔭的部分,大家可以選擇噴濕剪或者乾剪。如果唔係剪碎,而想剪齊嘅話,就唔好用隻手夾起頭髮剪。將啲頭髮晾喺剪髮梳上面,移動到想要的斜度,貼住梳剪就可以。如果唔想太齊,可用鉸剪由髮尾向上修剪,揀1、3、5、7、9或者2、4、6、8卡啦卡啦地做一個修葺。亦都可以將把鉸剪擺入少少,剪得個感覺再參差啲。

想增加層次,可將頭髮分為3區
用手指垂直夾起頭髮,再用牙剪修剪

如想增加層次,可用牙剪修剪
將頭髮由頭頂開始分Section,一個長方形咁樣一行、兩行、三行,由個頂開始用個牙剪剪髮尾,髮尾就會比較參差啲。 牙剪同鉸剪唔同之處就係佢唔會一剪就斷晒,剪錯咗都唔會即刻崩咗,要重複剪好多次先斷晒,亦都比較容易控制。Joseph就建議用手指夾住一行頭髮垂直拉起,拎得比你預想要剪嘅位置低少少,再由下而上移動住剪,咁係會再自然啲嘅。

媽媽即學即剪,即刻上手!

髮蠟造型

用少量髮蠟即可完成造型

切忌將髮蠟全部塗抹於前蔭
最後教埋大家點幫小朋友Gel頭!首先唧少少髮蠟喺手,捽勻晒喺手度,盡量唔好搽個蔭先,均勻地搽咗後面、或者底部唔相關嘅地方,最好就係搽到隻手得返5%,先好搽落去個前蔭度。Joseph話好多時香港人習慣一蠟頭就擺晒喺頭頂,又或者媽咪有時幫小朋友去啲飲宴蠟頭,一攞完啲Product就即刻擺喺個蔭、頭頂,咁就笠晒㗎啦!

完成啦!

希望今日嘅教學可以幫到媽媽手!剪得唔好唔緊要,唔好放棄,慢慢就會越剪越好㗎啦!如果大家有任何問題想問,都可以喺影片下方留低你嘅問題!Joseph下次會再教埋大家點樣幫女仔剪髮,記得留意啦!

====================

Facebook:SINCE SALON
Instagram:sincesalon