【喺母嬰健康院打齊針就等於全面保護?認清輪狀病毒!】

【喺母嬰健康院打齊針就等於全面保護?認清輪狀病毒!】


隨住天氣變涼,唔少BB、小朋友都會唔舒服。特別係一到冬天,就會有較多BB有腸胃問題,輕則肚痛,重則要吊鹽水,住院治療!如果BB突然變得胃口差、嘔、屙得嚴重(稀便)、昏昏欲睡、小便減少⋯⋯咁好有可能就係輪狀病毒作怪啦!

正係因為輪狀病毒咁普遍,又咁多病徵,小編就訪問到兒科醫生林展輝,為大家拆解輪狀病毒啦!即刻聽吓醫生點講啦~

咩係輪狀病毒感染?

輪狀病毒係一種RNA病毒。病毒喺電子顯微鏡下面呈現車輪狀,故命名為輪狀病毒。佢通常會以糞口途徑傳播,人類只要接觸到受污染嘅食物、水或物件,就有機會受到感染!

受感染的兒童每公克糞便可排出 1000 億隻病毒。

感染後會有咩病徵?

輕度的話會有水漾腹瀉。若不幸有重度腹瀉,可能會有脫水嘅情況,同時好有機會伴隨嘔吐同發燒。

唔好以為腹瀉只係小事!其實根據2015年全球數據,腹瀉係造成 5 歲以下兒童死亡嘅第 4 大原因!其中因腹瀉而亡嘅個案入面,有29.3%係因為輪狀病毒感染所致。

呢個年紀嘅BB最易感染!

輪狀病毒感染常發生於 3 個月 – 2 歲,最高峰感染時期為 6 – 11 個月。事實上,輪狀病毒係非常普遍嘅一種病毒,幾乎所有兒童喺3 – 5歲都曾試過感染輪狀病毒。

香港中文大學就曾有統計過香港小朋友感染輪狀病毒嘅情況,每24個5歲以下感染輪狀病毒嘅小朋友入面,就有1個需要進行住院治療,情況普遍。

各位家長都唔好喺小朋友大個咗之後放鬆!事實上,5歲以上嘅兒童都有感染嘅風險。甚至喺巴西有研究發現, 6 – 18 歲嘅急性腸胃炎患者入面,高達四成喺糞便樣本內檢測到輪狀病毒!林展輝兒科醫生提及:「好少數量的病毒已經可以引起腸胃炎」,各位家長真係要提高警覺!

咩季節係病發高峰期?

喺溫帶氣候地區,感染輪狀病毒較常見於天氣較涼嘅季節,而熱帶地區更係會全年流行!

若嬰兒不幸感染輪狀病毒,有什麼治療方法? 

目前仲未有專門用嚟治療輪狀病毒嘅藥劑,林展輝醫生建議:「各位家長主要都係透過食藥、俾營養水BB飲、飲多啲水等方法紓解病徵;如果有發燒情況的話,就食退燒藥。」

當然,如果情況嚴重,持續且出現脫水現象,就可能需要靜脈注射輸液同住院治療。

要記住輪狀病毒最嚴重嘅情況係導致死亡!輪狀病毒係導致  5 歲以下兒童死亡其中一大病原體,每年造成約 13 萬人死亡。

有方法保護BB免受輪狀病毒疾病困擾嗎?

要記住三大要點:保持良好的個人衞生、食物衞生、環境衞生

除此以外,國疾病管制與預防中心 (CDC) , 預防接種諮詢委員會(ACIP) 同香港衛生防護中心(CHP) 都建議用接種輪狀病毒疫苗去預防輪狀病毒腸胃炎。雖然世界衛生組織(WHO)曾建議將輪狀病毒疫苗納入所有國家免疫規劃。可惜嘅係,口服輪狀病毒疫苗未納入香港兒童免疫計劃入面㗎!

不過家長依然可以經醫生建議帶小朋友去接種口服輪狀病毒疫苗。而香港市面上註冊嘅口服輪狀病毒疫苗有兩種,分別為不同的價數。不同價數疫苗含有唔同嘅抗原成分種類,如含有四種抗原成分(病毒型號)嘅流感疫苗,就稱為「四價流感疫苗」。

咁係咪價數越多就越好呢?林展輝醫生解釋:「醫生係會考慮疫苗嘅價數啦、覆蓋嘅病毒型號同埋疫苗嘅有效期等等,幫BB揀最適合嘅疫苗。」

何時接種口服輪狀病毒疫苗?

其實最早喺出生6星期起,就可以接種第一劑疫苗。接種輪狀疫苗係有年齡限制㗎!快啲問吓醫生!林展輝兒科醫生提及,唔少家長會因為忘記時間、預到太趕、BB唔舒服⋯⋯等等原因而過咗限期時間。所以各位家長記得留意啦~

接種輪狀病毒疫苗可能有邊啲副作用?

林醫生:「我個人認為,輪狀病毒疫苗嘅副作用不算大,一般即使有副作用(腹瀉、嘔吐、發燒),時間都好短暫。」

何時要向醫生查詢輪狀病毒疫苗的詳情?

正因為寶寶的輪狀疫苗接種時間有限,建議喺懷孕嘅時候就向醫生查詢詳情。

鳴謝:林展輝醫生

本健康專題由MSD贊助。
HK-ROT-00116 Apr/2021