【港日戒片大不同!】4、5歲都用緊片!唔為戒而戒,切忌壓力

【港日戒片大不同!】4、5歲都用緊片!唔為戒而戒,切忌壓力


◇戒片◇⁡

喺紗羽差唔多開始識行嘅時候,我父母就個個月都係咁提議我叫我幫紗羽戒片,話佢喺片到大便佢都會唔舒服,又有清潔問題等等。⁡

我每次嘅回覆都係:⁡
一來,我完全唔急,二來,保育園有保育園嘅schedule,到時到候老師就會通知我哋小朋友ready戒片未,唔需要我哋操心。而且0歲~1歲班內都未有同學仔除片大小便,如果淨係紗羽一個要求,老師又一打三,根本唔會有可能特別淨係照顧到你⁡

上星期同父母視像,佢哋又提起戒片問題。話朋友個孫仔「成三歲都仲用緊片大便!!!」「無片就唔識痾!!!」又話「朋友新抱話如果唔用片痾,監小朋友去坐鴨仔會爆肛,係咪而家啲尿片生產商想賺錢嚇你哋呀?」⁡

我諗咗好耐除片同爆肛有咩關係…💬答案應該係無關係⁡

我估個媽媽嘅意思係,小朋友明明無意欲去大便,但係大人係都要逼佢嘅話,咁小朋友就即係無便意都要逼自己,而唔係自然排出,先會導致”爆肛”嘅情況發生啫😅⁡

然後我就好奇,喺story做咗個簡單survey睇吓⁡
1) 大家嘅上一代係咪都好似我屋企一樣,好戥你心急同小朋友戒片⁡

2) 父母本人對於戒片呢會事有無好心急⁡

3) 父母本人認為應該幾歲開始同小朋友戒片⁡
等等⁡

結果發現,我呢代嘅父母都無特別好想快啲令小朋友唔再需要用片片,投兩歲(~三歲)嘅佔大部分。一傾之下,多數媽媽都認為應該等小朋友ready,或者識得表達自己先開始都未遲⁡

幾年前自己未有小朋友嘅時候,見到隊友朋友個仔,成四五歲都用緊片。當下嘅我有少少錯愕。鏡頭一轉,上個月去朋友屋企開christmas party+ stay overnight,見到四&五歲嘅女仔都係着住片瞓覺。我唔清楚香港個trend係點,但原來喺日本,小朋友用片片用到小學前都唔係一件令人側目嘅事⁡

我無辦法了解我上一代點解咁執著呢個項目。⁡
究竟係荷包負荷問題,衛生問題,面子問題(愈早=愈叻)定係咩問題呢…⁡

上一代當然有上有代嘅想法以及佢哋嘅「正確做法」,但我哋呢代嘅教育,資源,環境,同選擇都比上一代充裕,有時好難可以得到一個共識⁡

疫情令到我同家人到今時今日都無機會見面,亦因為咁,間接減低我同佢哋喺育兒上嘅衝突。我始終認為,只有父母先係最清楚最掌握小朋友成長嘅人物,戒唔戒,幾時戒,父母自然會調整,唔應該有壓力😖我哋嘅絕大部份做嘅決定都係想小朋友著想,希望上一代能夠理解😓

================

新手媽媽☆將香港與日本之間嘅育兒大不同事物,喺日本嘅生活日常分享俾大家💛請多多指教

Instagram:osaka.hk.mama