【嘶哮病同哮喘大不同!】在日港媽實錄!瞓覺時大聲喘氣要小心!

【嘶哮病同哮喘大不同!】在日港媽實錄!瞓覺時大聲喘氣要小心!


◇嘶哮病◇

呢個星期,紗羽淨係返咗一日保育園…

星期一,一早起身就見到佢左眼眼角有啲紅腫,老師又話佢有啲肚瀉叫佢休息一日,加上再之前幾日有啲鼻水,就同佢放學去醫院睇眼+肚瀉,順便攞咗啲感冒藥旁身。夜晚突然痰上頸咁…

星期二,朝早發燒燒到39度,又肚瀉又痰上頸,就俾咗啲整腸藥同感冒藥佢食。食完當日無咩點好,肚瀉勁咗,夜晚好喘,好似要好用力咁先呼吸到,但拍痰又唔出,又無鼻水,燒都係37度左右,唯有俾佢斜斜地咁瞓。成晚係咁醒,又出哂汗,好唔舒服咁,我就差唔多係抱住佢過夜…

星期三,朝早燒到38.3,肚瀉頻率係差唔多係1~1.5小時一次,但唔多。成個人好慘咁…喊都無力,與此同時我過咗兩日瞓得勁差又擔心嘅晚上,個人勁崩潰…爸爸就話請半日假一齊照顧紗羽。見佢話請假+紗羽食完藥好似仲差咗咁,就去多次醫院,諗住如果可以抽下痰都好吖

去到醫院醫生一睇一聽心口,就知佢係「クループ症候群」,係感冒菌感染誘發支氣管收縮嘅病。喺醫院聞完一次氣同即刻食藥(類固醇),返屋企休息嘅時候,瞓覺即刻無咁大喘氣聲。後尾同親戚傾,先知中文係「嘶哮病」,上網一搵啲症狀中哂。而源頭,係來自保育園…

我最想講嘅係,佢第二日好喘,喘成晚嘅時候,其實我係完全無任何危機意識。自己同家姐細個都成喘,特別係家姐一病就喘到一定要吸藥,我當時係以為「喘啫 無事嘅都呼吸到吖 家姐喘都見好多吖而家咪都係生勾勾😂 抱住就瞓到 自己辛苦啲囉」如果唔係爸爸肯請假,我都未必帶佢去多次醫院

醫生同網上資料都話,其實嘶哮病可以好危險。醫生話,如果見到bb呼吸嘅時候,鎖骨同鎖骨之間凹陷,就係佢已經有好嚴重嘅呼吸困難,要即刻送院。

睇返網上資料,無論港台日嘅網,都係話嘶哮病嘅喘聲同哮喘喘聲嘅分別在於,嘶哮病喘聲嘅特點係似「狗吠聲」。但係我又真係唔覺得似…頭一段video係佢未食啱藥時嘅喘聲(唔係最嚴重嗰時),第二段係佢喺醫院食完藥返黎之後嘅分別,可以參考下。

最後就係…佢呢三日休息完,又要差唔多從頭適應過保育園😪😪😪…本身日頭已經盡量唔餵人奶,因為呀姐去到唔食奶,但係佢病得好慘嗰陣淨係食人奶。本身戒緊抱睡,但瞓唔好嗰陣又抱睡…me time byebye之餘,今日連我都肚瀉,yeah💀

================

新手媽媽☆將香港與日本之間嘅育兒大不同事物,喺日本嘅生活日常分享俾大家💛請多多指教

Instagram:osaka.hk.mama