【Holidaymama】大自然好耐無見啦!簡單生態遊x親子遠足路線!

【Holidaymama】大自然好耐無見啦!簡單生態遊x親子遠足路線!


👣親子遠足路線 : 東涌 -> 沙螺灣
#石屎路 #BB車 #生態遊 #東涌

想唔想同小朋友去一個簡單嘅生態遊,睇下彈塗魚、招潮蟹、蟹仔、螺仔?

閉關好久,最近疫情似乎受控。今日大晴天,我哋決定出去活動一下 ☀️

Nat媽媽一家今日去咗行 #東澳古道 ,東澳古道可以從東涌行到去大澳,不過路途比較遠,我哋決定行到沙螺灣就折返。

✨點解將目的地定喺沙螺灣?
– 從東涌地鐵站搭38號巴士去逸東邨,之後就出發行去沙螺灣。沿途一路都係石屎路,有輕微上落高低起伏,但冇樓梯,所以我哋可以推住細佬一齊行👍🏻 #BB車行山路線

– 沿途右手面可以遠望機埸跑道,360纜車,港珠澳大橋;久唔久就見到飛機起飛同直升機飛過,細佬Nathan勁興奮 😃 #睇飛機

– 💡重點💡 沙螺灣係一個泥灘,會見到彈塗魚、招潮蟹、各種講唔出名嘅蟹仔、螺仔等等。Natalie喺泥灘痞咗好耐,仔細觀察,睇呢樣果樣,完全係樂而忘返💛
🤣 仲俾我哋影到彈塗魚彈走嘅一幕 #泥灘生態

– 沙螺灣附近有士多補給食物飲品,仲經過咗千里眼呢個大型藝術裝置

– 去到沙螺灣,如果唔想沿路行返東涌,可以搭船,不過船期比較疏:shorturl.at/hkt08

👀Natalie今日前前後後行咗大約4個鐘,應該係佢嘅個人行山記錄了👍🏻 大人真係唔好低估小朋友嘅能力😊

👣 如果唔使推住BB車,其實沙螺灣一路行可以去到大澳,大家可以參考吓網上資料:https://www.oasistrek.com/tung_o_ancient_trail.php

💡 呢條都算係一條少少熱門嘅行山路線,去到某啲靚景點,都比較多人聚集休息影相,建議去到人多嘅地方都係要帶口罩😷

==================

自從做左Nat媽媽之後,忽然發現時間太少但想做的事太多,記性太差但想記下的事太多,的起心肝開始寫低做過的/玩過的/用過的/吃過的/經歷過的~

Facebook:Natmama親子育兒生活誌