【HolidayMama】親子行山路線推介!初級路線!一望無際海景勁治癒!

【HolidayMama】親子行山路線推介!初級路線!一望無際海景勁治癒!


☀️靚景親子行山路線推介:南朗山

南港島線通車之後,九龍人去港島南區就方便咗好多。今次呢條路線喺黃竹坑站出發。

📍從黃竹坑站B出口開始,落地面之後沿住南朗山道熟食市場旁邊嘅斜路向上行,見到新加坡國際學校就右轉上山,再行一陣就會見到加拿大國際學校,之後就會開始有樹陰,望右邊會見到泊咗好多船嘅的布廠灣。 以細佬嘅腳程,行到呢度用咗25分鐘~

再行多一陣,就見到有條樓梯,指示行去南朗山休憩花園,呢段樓梯好短,好快就有一個亭休息~

離開第一個亭之後,就係一條長長嘅樓梯,完全冇遮擋,好天都幾曬㗎 ☀️ 不過呢條樓梯一路行上去,一路都見到好靚嘅風景!行咗大約20分鐘,就到南朗亭喇✌🏻

行到南朗亭望到嘅風景已經好靚🤩 望到一望無際嘅海景,同埋海洋公園嘅機動遊戲設施!呢度絕對係適合瘋狂打卡嘅地方 📸 影影下相,仲喺南朗亭附近見到隻小野豬🐷

如果覺得唔夠喉嘅,可以行去南朗山山頂!山頂有發射站,附近仲有直昇機坪,不過由南朗亭行上去山頂嘅路就冇咁好行,樓梯冇鋪得咁靚,所以細佬係冇挑戰呢一段~

行完影完相之後就沿原路返返去黃竹坑地鐵站!由南朗亭行返去熟食市場用咗大約40分鐘(細佬的速度,不過全程冇扭抱,算唔錯㗎啦😂)。返歸之前我哋喺熟食市場食咗個下午茶~ 放完電要補充下😁

💡 沿途冇洗手間或者補給點,要喺黃竹坑地鐵站解決咗先!
💡三四點後開始多人,可能想去睇日落🌄
💡保持社交距離,做好防疫措施 🛡

==================

自從做左Nat媽媽之後,忽然發現時間太少但想做的事太多,記性太差但想記下的事太多,的起心肝開始寫低做過的/玩過的/用過的/吃過的/經歷過的~

Facebook:Natmama親子育兒生活誌