【HolidayMama】寧靜文青小島之旅!藝術花園xCafe! 打卡食嘢放電一直落!

【HolidayMama】寧靜文青小島之旅!藝術花園xCafe! 打卡食嘢放電一直落!


龍鳳寶寶👫第一次挑戰去較遠嘅離島旅行 (之前嘅愉景灣同馬灣,對我哋黎講,交通較方便。)

我哋選擇去較少人嘅寧靜文青小島~坪洲遊玩。 本來想搭10:20班船,但豬隊友遲咗起身,所以最後搭遲一班,搭11:05班船。

航班時間表

我哋10:40到達碼頭,但都已經見到唔少人係度排隊。 (所以應該都唔會真係好少人,只會係相對較少人吧!) 上到船,諗住坐窗口位俾小朋友睇吓風景,但由於生得太矮,坐係度係睇唔到。 大約40分鐘嘅船程,冇得望風景,咁唯有看圖書。 (但其實又驚睇玩眼,所以依程船有少少難挨。仲好「浪」吓,會暈船浪嘅要食定止嘔丸啊!) 11:45左右到達坪洲碼頭,因怕多人爭位食飯,所以先搵餐廳食午餐。

~第一站~文青café

孖媽最鐘意去文青cafe–Island Table Grocer Cafe食蛋糕和飲咖啡扮年青。

~肉醬千層意粉

~坪洲至尊

~Cappuccinno

~自家製檸檬特飲

~蕉糖芝士蛋糕

食物質素唔錯,尤其肉醬千層意粉不會感到太膩。 喺我哋用餐期間,已見到好多人門外排隊,好彩我哋早入。 (建議到12:00前坪洲,先食午飯,再四周遊玩)

~第二站~南乳芝麻餅店(麵飽舖)

南乳芝麻餅非常鬆化可口。(果然是坪洲名物)

~第三站~秘密花園

以前係牛皮廠,製作皮類製品,佔地約4萬餘尺。依家係三級歷史古蹟,活化成一個藝術花園,四周充滿由廢物造成嘅藝術品。 而且仲有烏龜同魚睇~小朋友睇得好開心~ 穿過秘密花園,係另一個門口咁啱見到有人舞獅,小朋友第一次睇,好興奮🤩🤩。 原來穿過秘密花園,可以去到東灣沙灘。

~第四站~東灣沙灘

不過當日真係好熱好曬,沙灘上完全冇位可以遮蔭,所以小朋友玩咗一陣,我哋就返番入小街度行。 (本來仲諗住行山🤪,但當日氣溫成29度,而且萬里冇雲,所以放棄咗喇)

~第五站~茶屋達磨

買咗2杯飲品(抹茶鮮奶和熱情果茶🥤)同埋焙茶法式燉蛋。降吓溫同埋休息吓。 (注意店舖只有門外的木櫈) 休息完,繼續遊玩。

~第六站~仙姊廟

沿著海邊行去仙姊廟,在小山坡上,外形特別。 仙姐廟係香港僅餘兩間保留拜七姐習俗嘅古廟之一,據聞求子相當靈驗。(不過我2個夠哂數)

地圖按此

以上係其中一個說法,亦有其他說法係求姻緣。求甚麼也好,信則有,不信則冇。而且不同人有不同宗教信仰,只係當作景點看看也不錯。

~第七站~大利

再行去坪利路過對面嘅小島🏝,見到海上有好多水母。 坪利路行到最盡嘅右方有個小沙灘,有遮蔭。 如果小朋友要玩沙,這裡唔錯呀~ 而且仲有一些居民放置嘅舊玩具和車呔整成嘅鞦韆。 用嚟打卡都唔錯,但自行判斷俾唔俾小朋友玩,因始終有點殘舊。

~第八站~坪洲遊樂場

最後我哋去返碼頭附近嘅海邊遊樂場玩。 小朋友始終都係鐘意去遊樂場,雖則冇乜特別,但有得溜吓滑梯已經好開心。

原來除咗可以搭船返中環外,仲可以搭船去愉景灣呀!!!! 船程只須10分鐘🤩🤩,如果由愉景灣返屋企不太遠嘅話,可以考慮吓~

航線資料

上船位置:坪洲街渡碼頭(坪洲市政大廈對出)

依架船冇冷氣,但好通風~小朋友好鐘意坐,因為可以睇到外面個景~🥰🥰 好快就到偷景灣,食埋晚餐就返屋企,結束離島一日遊。

=================

畢業於科大生化系碩士和教大教育文憑,曾於小學任教數學、常識、體育和音樂科十三年。現為全職媽媽兼任 Miss SwanSwan,創作邊玩邊學的活動,教養一對三歲的龍鳳胎,亦是親子網站的博客。

FB:Little twin stars龍鳳寶寶