【HolidayMama】係初夏嘅味道啊!夏天必到打卡點!超元氣太陽花海

【HolidayMama】係初夏嘅味道啊!夏天必到打卡點!超元氣太陽花海


唔知大家知唔知Frozen裡面嘅 Anna有條裙係有好多 太陽花?

阿囡知道元朗有個太陽花田,即刻話要去 安娜之花 花海 。

今年已經係第四年舉辦太陽花節,今次仲引入咗有香檳色向日葵「 傲雪」和紅色向日葵「紅透半邊天」!

我哋喺元朗西鐵站落車轉乘76k巴士,喺石湖圍站落車。

(但原來76k嘅總站喺朗屏邨,其實可以喺朗屏西鐵站落車,再行去朗屏邨巴士總站搭76k)

因為30分鐘一班車,所以如果唔趕時間嘅話,可以喺朗屏邨總站上車。我哋係元朗站等咗近20分鐘,但如果搭多個站去朗屏,應該啱啱有車,可以遊巴士河,好過小朋友企喺巴士站等咗20分鐘。

車程大約15-20分鐘,落車後過對面馬路,跟住指示牌行5-8分鐘左右就到,原路風景清新,有小溪,另一邊有樹蔭,不難行。

但路有些窄,要提小朋友小心走路。

嘩~~一大片 太陽花田真係好吸引好壯觀!!

可以行入花田裡影相,但必須放底d袋係膠籃度,以免個袋整到咁靚嘅花呀~

除咗花田,仲有不少打卡位,有風車田、荷蘭 風車、風車隧道同埋南瓜車等。

農莊仲有一個小食亭,以售賣飲品為主,亦有薯片同埋杯麵呀。

價錢合理,每支飲品賣10元,買夠20元,仲送 冰凍菠蘿一片。

小朋友最鐘意食。

其實今日都算熱和曬,所以小朋友影咗一陣已經覺得好辛苦。
打卡真係大人會鐘意多d。
所以我哋留咗35分鐘左右就走。

後記:

建議時間早d去,起碼無咁多人又無咁熱和曬。
不過早唔早到,都要睇豬隊友嘅造化~~

~信芯園農莊~
日期:2021年4月17日起 至另行通知
時間:上午八時正至下午六時正
入場費: $50

交通:
九巴76K、紅色小巴17或綠色小巴75、76,喺石湖圍落車。
村內不設泊車位,新田郵局一帶有私人停車場,步行時間約10-15分鐘。

因阿囡趕住去跳舞,所以搭小巴返元朗站食飯。
如果入開元朗,仲可以去埋其他地方玩。
下次有機會再為大家介紹。

~同場加映~

Sailor Moon 打卡位
YOHO MALL 形點一期(港鐵個層)1樓

=================

畢業於科大生化系碩士和教大教育文憑,曾於小學任教數學、常識、體育和音樂科十三年。現為全職媽媽兼任 Miss SwanSwan,創作邊玩邊學的活動,教養一對三歲的龍鳳胎,亦是親子網站的博客。

FB:Little twin stars龍鳳寶寶