【探初生BB有學問!5個重要事項你要知】

【探初生BB有學問!5個重要事項你要知】


最近好多朋友生bb,黎緊仲會有更加多~將會出現一輪探b潮喇!但作為執媽,有d重點係要提下大家既… 其實作為媽媽,尤其係新手果d,本身對於湊bb都有d拿手唔成勢,又餵奶又換片,轉頭又無限大輪迴,仲要抽時間訓教、食坐月餐~所以坐月期間,媽媽唔夠訓,個樣有d頹係好正常架~

如果你本身唔係上門幫手湊b煮飯教餵奶既話,可以等媽媽坐完月先上去探佢既~咁到底探b有咩注意事項呢?

1)洗手洗到上手臂
其實係我要求高姐,本身執媽有d潔癖,不過相信十個護士9個都有!我覺得只要行過出街,個人就已經係烏糟左,而且你抱bb時會用手臂抱佢架嘛!你掂過乜野,bb就間接掂果樣野架喇!想像下你行出街,手臂會掂到欄杆、公開交通工具既門、甚至係坐你隔離滿身大汗既臭男人。試問又點可以比一個免疫力咁低既bb,間接掂果個滿身大汗既男人呢?

2)入門口前除鞋
唔駛解釋喇~平時返屋企都需要做喇!我教我2歲幾既姨甥仔:平時曱甴行過條街,你又行,再著埋對鞋返屋企,咪好似比隻曱甴行入屋企咁囉!歲幾都識,你都要識做喇~

3)衣物要乾淨
唔駛要著新衫咁誇張,但唔好尋日著完今日再著去探b囉!都係果句!對我黎講出過街就烏糟架喇~我有個護士朋友仲誇張,話想探b既人都著醫院防疫保護衣,當然係講笑喇~但聽完佢咁講我即刻覺得自己潔癖都唔算嚴重!同時,如果有養貓狗既話,要留意身上有冇痴左動物毛髮呀~如果係有養開寵物既媽媽應該唔會介意,但冇養開既話都可能會介意架~

4)避免太刺激
生完bb同朋友都有雞啄唔斷既話題,生仔有幾痛、會陰有幾唔舒服、點修身等等等… 但最好都要控制音量唔好嚇到bb~你知一班女人既聲浪可以幾大架喇!仲有抱住bb海量selfie 都要留意唔好開閃光燈閃親佢對眼。另外,有好多人都食煙,記住!二手煙係會增加新生嬰兒猝死風險,所以探b前千其千其千其唔好食煙!咁當然家人亦都應該戒煙啦~其他要留意既係新手媽媽真係好忙好累架,探訪一陣就好架喇~唔好阻住媽媽休息同餵奶。

5)唔好錫bb唔好錫bb唔好錫bb!
實在太重要所以要講三次!大人有既細菌/病毒實在太太太多!一個新出世既bb實在對付唔到咁多,成日都有新聞見到bb比人錫完一啖命都冇埋!有時病毒潛伏期係冇乜徵狀但仍然有傳染性。有做兒科病房既朋友話我知,收過唔少bb,擺完滿月酒之後病毒感染,搞到要入深切治療部。雖然bb係好可愛,大人見到會好肉緊好想攬住黎狂錫~但你叫人地呀媽情何以堪呢?又多謝你黎探佢地但又唔好意思出聲話你,所以各位要緊記以上既探b禮儀喇!仲有朋友話過比我知十幾朝時親戚上門拎薑醋,bb之後就流鼻水鼻塞連食奶都冇心機呀陰公!

==================
港產執媽一名
香港出生,正宗香港是我家
志在分享香港產科所見所聞
同時分享產科知識,正所謂「知得多就驚得少」

Facebook:港式執媽