【黑面媽X波包日記】《給波包10年後的信》

【黑面媽X波包日記】《給波包10年後的信》


話說早排準備咗封信俾10年後的孩子,我於台上讀出呢封信時,喊到豬頭咁,而包包在台下只見到喊爆的媽咪就不斷大叫「媽咪!」,內容當然佢仲未明白,所以今日我就試吓用紙筆把這封信寫低,好好保管,留到10年後親手送俾波包:

包包波仔,

今日係19年8月4日,呢刻嘅你地瞓咗喺我左邊同右邊,自從你哋出世之後,我嘅世界就變咗了,每一日都係諗住你哋兩個,無時無刻都渴望對住你地,你哋總係痴住我,有時仲要全日抱住添。你哋知嗎?其實我好唔捨得你哋長大得咁快,一諗到十年後你哋會慢慢有自己嘅世界,唔再跑過嚟我身邊,要我抱要我錫,唔再依賴我,可能唔再需要我,呢刻先發現,其實我係幾咁需要你哋。

媽咪真係好多謝你地,多謝你地兩個嘅出現,多謝你俾咗個機會我成為你地嘅媽咪,多謝你哋帶俾我原動力,多謝你哋帶俾我無數快樂嘅時光,當然亦有痛苦嘅時光啦,無論我快樂定痛苦,我最希望嘅呢,唔係要你地不斷追成績或10行全能,而係希望你哋開開心心,思想正面,健健康康咁成長。

2029年8月4日,呢刻你哋唔知變成點呢?相信你哋各自已經有你哋嘅好朋友,有你哋世界,我哋唔再好似以前咁多時間對住大家,星期六日,可能你哋會想同朋友出街多過同我啦。媽咪好明白咖,因為我以前都係咁,見到你哋咁開心,媽咪都開心。

嚟緊將來你哋要面對好多事情,繁重嘅學習,你哋可能會因為功課而皺起眉頭,會因為同學之間嘅小摩擦而悶悶不樂,會因為唔如意嘅事而唔開心、唔甘心,更有可能我哋會成日鬧交添,唔緊要𠺢,呢啲都係你哋人生必經嘅階段。

媽咪會永遠做你哋嘅聆聽者,做你嘅朋友,媽咪會用一生最大的愛去守護你們,無論發生咩事,媽咪永遠都會支持着你哋,永遠企喺你哋後面,永遠愛你哋,i love you

====================================

愛小孩、愛扮靚、愛下廚、愛拍片、愛黑面的「黑面媽」,是在職媽媽,用心血去培育波波及包包,務求他們得到最快樂的童年。

Facebook Page:黑面媽 X 波包日記