【HolidayMama】「期間限定小旅行」渡假感十足!點影都咁靚!港版小沖繩!棕櫚樹 x 海景堤壩

【HolidayMama】「期間限定小旅行」渡假感十足!點影都咁靚!港版小沖繩!棕櫚樹 x 海景堤壩


如果大家有得揀去渡假旅行,大家會想去邊呢?呢排天氣咁好!真係好想去旅行感受吓陽光與海灘啊!雖然無得去外國,但係喺香港都可以感受一下渡假嘅氣氛!

今日ilovemama派出Mama特派員 Loklokk媽媽 同埋 Loklokk帶大家去港版小沖繩渡假嚕!


Mama特派員 – Loklokk媽媽 & Loklokk
Facbook:媽姬與樂 生活日誌
Instagram:loklokkmama

港版小沖繩位於屯赤隧道附近嘅浩和街。首先我哋嚟到屯門站C2出口,之後大家可以乘搭K52號巴士,到望后石站落車,再步行20-25分鐘。所以呢,帶小朋友去的話,自駕或者的士就方便好多啦!

我哋就選擇咗自駕嘅方式。只要喺Google Map search「浩和街」就可以搵到㗎啦!

浩和街

棕櫚樹+無敵大海景

超大嘅草地,無敵大海景,一整排棕櫚樹,再加上呢個藍天白雲,真係好似去咗渡假咁,超有旅行感啊!

打卡小Tips:大家可以著返啲渡假Style嘅衫,例如:草帽、長裙⋯⋯出嚟個效果就會更似去咗旅行啦!

打卡小Tips:場地比較空曠嘅打卡點,使用道具會更加分!例如:吹泡泡、picnic用品⋯⋯

喺大草地點影小朋友先好睇?
俾小朋友自由哋跑,捕捉佢哋活潑開心嘅樣就最好睇啦!

要影得有渡假感,陽光就緊係唔少得!

雖然當日我哋影去棕櫚樹方向會有背光情況,但係影出嚟呢種剪影感,又係另一番風味啊~

另外呢度夠晒空曠,好適合放風箏㗎!

*注意草地並無遮蔭,大家記得做好防曬措施,或自備帳篷。

電影海報感堤壩

沿住堤壩行,可以一路欣賞海景之餘,仲係打卡嘅好位置!

風吹過頭髮同裙擺,影出嚟個效果真係好靚啊!

一次過影到藍天同閃令令嘅海!

*注意堤壩無圍欄,各位爸爸媽媽帶小朋友去影相時請注意安全!

行到堤壩嘅盡頭就會見到個小燈塔,緊係要同仔仔影吓相啦!

開始日落影出嚟個Feel又唔一樣!

留意返周末人流會比較多,想打卡效果靚啲可以平日嚟~

春日感馬櫻丹花田 &小黃花

海堤附近仲有一個打卡點馬櫻丹花田!一片紫色嘅花,睇到都覺得好有春日氣氛!

周圍仲有好多花可以影!

IG簡約風格白牆

藍天+白牆,IG打卡必備!今日難得同仔仔著得咁靚,影OOTD就啱晒啦~

想知道香港仲有咩隱藏親子小旅行好地方?記得睇留意《期間限定小旅行》啦!下次再帶大家去「小旅行」啦!

上一回:尋找鬱金香花海!大埔白鷺湖 歐陸風格建築x浪漫湖景

活動資訊

浩和街
地址:新界屯門浩和街(屯赤隧道附近)
開放時間:24小時
交通方法:

  1. 巴士K52 (至望后石站落車) 需步行20-25分鐘。
  2. 自駕 / 的士

注意事項:

  • 附近無士多餐飲,亦無廁所 。
  • 附近無時租車位。
  • 車輛流量比較多,各位家長要加緊留意小朋友,切勿隨意走出馬路。