【HolidayMama】「期間限定小旅行」九龍賞花一日遊! 偽韓黃風鈴花之路 x 太陽花之路

【HolidayMama】「期間限定小旅行」九龍賞花一日遊! 偽韓黃風鈴花之路 x 太陽花之路


春暖花開~近排真係好好天,好想出去放風啊!雖然因為疫情唔可以四圍去,但出門去吓公園散個步都係唔錯嘅選擇!欣賞吓啲花花草草,俾小朋友喺大啲嘅空間跑跑跳跳放吓電,嚟一個短暫嘅小旅行啦!

今日ilovemama派出Mama特派員 Loklokk媽媽 同埋 Loklokk一齊出發去九龍賞花一日遊!


Mama特派員 – Loklokk媽媽 & Loklokk
Facbook:媽姬與樂 生活日誌
Instagram:loklokkmama

第一站:偽韓黃風鈴花之路

黃風鈴花之路位於南昌公園。首先我哋嚟到南昌站D1出口,

南昌站D1出口
南昌站D1出口

向左直行到十字路口,過完右手邊馬路,一直行就會見到南昌公園啦!

沿途都可以見到唔少開得好靚嘅黃風鈴木,一路行過去已經影咗好多相。

南昌公園地圖

南昌公園面積唔算好大,但係勝在多綠化地。啱晒一家大細去散步,大大個草地任小朋友跑!而且公園入面設有洗手間,一入門口就見到,非常容易搵得到。

南昌公園

一入園,一直向前行到中心就可以見到左右兩邊都種滿黃風鈴木嘅小石路(地圖上紅色圈起地方)!

打卡小Tips:因為黃風鈴木都比較高,所以將手機盡量靠近地面再仰拍,就可以人花合照(兼影到長腿效果)!

企喺小石路中間,影出嚟嘅效果真係好似去咗韓國咁樣啊!

打卡小Tips:大家不妨執幾朵黃風鈴花做拍攝道具,更有氣氛!

仲可以將黃風鈴喺地面砌成各種圖案。必砌圖案⋯⋯當然係心心啦~如果有寵物,仲可以將佢放喺心心入面,砌一個再大啲嘅心心,就可以叫小朋友企或者踎入中間,影出嚟個效果都非常可愛㗎!

仲咗石仔路,周圍都有花咗花嘅黃風鈴木!真係度度都打到卡!

公園入面都開咗好多其他花,全部都開得好靚啊~

除咗喺樹下影相,我哋仲發現咗個秘密拍攝點!
公園中間樓梯行上斜坡(地圖上橙色部份),可以喺高處一覽成個公園!見到一片黃色嘅花,都覺得好治癒啊~

第二站:太陽花之路

香港都有太陽花之路?無錯!今日就帶大家一齊「走花路」!

太陽花之路其實位於荔枝角公園,但要記得,荔枝角公園並唔近荔枝角站㗎!首先我哋嚟到美孚站D出口,一出門口就可以見到大大粒荔枝就知道無去錯地方啦~

美孚站D出口
荔枝角公園

眾所周知,荔枝角公園真係好~~大!除咗太陽花之路,其實都有好多隱藏打卡點,就等我哋一一帶大家去睇吓啦!

荔枝角公園地圖

簡約風格木橋

喺D出口見到大型荔枝像之後向左手邊方向前進,跟隨路標前往「極限運動場」方向嘅途中,會經過一條木橋!藍天再加上餘暉照過嚟,非常有旅行感!

藍色愛麗絲小屋

呢個大熱打卡點,正正位於「極限運動場」嘅側邊!各種鮮豔嘅花圍繞藍色小屋,真係十足十愛麗絲夢遊仙景入面會出現嘅場景啊!

「極限運動場」右側有條小徑可通向「極限運動場」後方

走入童話花園!

有比手掌更大嘅玫瑰花!

另一個不可錯過嘅打卡位就係花園旁嘅位置。啱啱種有棵開得非常靚嘅紅杜鵑花同黃風鈴木,正正可以同「極限運動場」嘅黃色紅色牆做呼應,影出嚟顏色好鮮豔,好有夏日感!

之後我哋就朝住寶輪街入口(曼克頓山入口)方向前進。雖然當日天氣比較熱,但係小徑有好多樹影遮蔭,沿途仲見到唔少開得好靚嘅花,真係非常適合一家大細去散吓步~

黃風鈴木小徑

行到公園嘅盡頭都有一段小路旁邊種咗幾棵黃風鈴木!後面仲可以影埋個天,非常靚!

櫻花樹群

好多人都唔知,其實荔枝角公園都有得賞櫻㗎!今次我哋去到,有幸見到幾棵盛開。櫻花花期短暫,大家要捉緊時間去賞花啦!

富士櫻、河津櫻

太陽花之路

終於嚟到太陽花之路!小徑左右兩邊都種有太陽花。比起日常見到嘅太陽花細朵,但都一樣可愛~

九龍賞花一日遊就到此為止啦!有得打卡,又有得賞花,仲可以放電!如果想慢慢賞花,會比較建議大家可以分開兩個公園遊覽。以上相片都係用手機拍攝,希望各位都可以跟住打卡影到靚相啦~下次再帶大家去小旅行!

活動資訊

南昌公園
地址:深水埗深旺道20號
開放時間:24小時
交通方法:地鐵南昌站D1出口,步行4分鐘。

荔枝角公園
開放時間:24小時
交通方法:地鐵美孚站C1、D、F、G出口,前往藍色愛麗絲小屋最近出口:D