【Mama專訪】超乎大家想像!疫情下嘅意外經歷!印度生仔實錄

【Mama專訪】超乎大家想像!疫情下嘅意外經歷!印度生仔實錄


如果有得俾你選擇,你會想喺邊度生你嘅小朋友呢?相信大部份媽媽都會選擇返自己熟悉嘅地方去生!但天氣不似預期,計劃都未必似預期⋯⋯就好似呢位媽媽,陪同老公去到印度工作嘅時候懷孕,原本打算回港生仔。點知一個疫情,就將計劃打亂,仲經歷咗一次,估都估唔到嘅印度生仔體驗!到底印度嘅醫療設備係點㗎呢?啲服務又O唔OK?即刻嚟了解下啦! #我諗媽媽一世人都無諗過自己會喺印度生仔 #意想不到



媽媽資料檔
姓名:LingLing
小朋友名:Ivan(俄文名)中文名:奕霖
小朋友年齡:8個半月
Instagram:lingling_3l



LingLing媽媽係一位全職媽媽。喺未成為人母前,係一位地勤人員,因為工作關係,認識咗依家嘅俄羅斯人丈夫,就咁樣佢就嫁到去世界嘅邊端,成為戰鬥民族嘅一份子!

因為疫情,所以不得不做出呢個選擇⋯⋯

LingLing嘅丈夫都係航空業嘅一份子,當時佢被公司委派到印度新德里公幹大概兩年。而喺呢段時間,LingLing懷孕了。得知呢個消息之後,佢哋都好高興,但佢哋必須討論一個問題「在哪裡生寶寶好呢?」

LingLing怕言語不通,所以早已同老公說明唔想喺俄羅斯生產,而且第一胎佢都希望可以喺自己熟悉嘅地方生產,加上產後可以得到媽媽嘅幫忙同照顧,所以同老公講咗一定要喺香港生。至於印度,佢係斬釘截鐵同老公講「打死都唔會在印度產子」。印度兩個字,相信大部分人聽到後都好抗拒、甚至乎反感,覺得印度好落後、環境衛生惡劣等等問題。但居住咗一段時間,LingLing慢慢地發現印度無大家想像中咁恐怖,不過佢仍然接受唔到喺印度產子。所以同老公商討後決定於懷孕30週前飛返香港安胎待産。

但萬萬想不到一個疫情打亂所有計劃⋯⋯

印度政府突然宣布封關,所有海陸空交通暫停直至另行通知。結果就一直封關,一直無航班回港,LingLing由懷孕24週等到28週⋯⋯每一次新聞消息都話要繼續延長封關,一次又一次失望、傷心。LingLing當時已經作出最壞打算喺印度產子。

呢個時候,突然傳嚟來一個好消息!因為有大量港人濟留印度,特區政府可能考慮派專機接載港人,於是乎佢主動聯絡香港入境處,說明身體狀況同處境,希望將自己納入為第一批可乘搭專機嘅港人。但因為需要長時間安排,當LingLing被通知有專機時,已經懷孕32週,航空公司唔接受佢登機,主診醫生亦都唔建議,所以最後無奈地只可以留在印度產子。

印度產子帶來十萬個憂慮⋯⋯

「其實真的非常不開心、恐懼及無止境的擔心,因為對於印度這個地方一點好感也沒有,又想到BB護照出生地寫上印度二字亦覺得反感。」

其實LingLing最為擔心就係唔知道印度醫療水平如何,好擔心醫生有無能力去處理突發狀況。畢竟生仔就好似半隻腳踏咗入鬼門關,佢好驚自己唔可以順利生産,然後喺印度死去。另一邊廂,因為封關,自己媽媽又唔可以飛嚟印度照顧產後嘅自己。非常擔心初為人母,唔知點照顧好初生嬰兒,又無得坐個好月,好擔心自己身體狀況唔好而導致無足夠精神體力照顧好BB。

唯一值得慶幸嘅係LingLing嘅丈夫可以一直陪伴左右。因為就算可以返香港產子,喺疫情下係禁止丈夫陪產。而且唔肯定老公能否及時飛到香港,畢竟疫情影響,實在有太多的未知數。

相反地,LingLing嘅丈夫一直都希望佢可以喺印度產子。佢認為印度醫療其實唔差。「每次陪伴我產檢,都知道醫生及護士非常專業、服務很好、態度很好。」而且喺印度產子的話,就可以一直陪老婆到生產嗰日,唔使擔心會錯過老婆生仔呢個重要時刻,唔使擔心老婆自己提早回港、唔使擔心老婆因乘搭專機而有可能感染肺炎,又唔使再分隔兩地,所以佢好滿意、開心。

俄羅斯人推薦嘅醫院⋯⋯

呢間位於印度新德里嘅私家醫院係由當地俄羅斯領事館人員推薦,當地所有俄羅斯人每逢生病、產子都會揀呢間醫院。一嚟環境、服務好,二嚟醫生專業,更有識講俄文嘅醫生。由於俄羅斯人英文唔太好,溝通上好多時候都會出現問題,難得有識俄文嘅醫生,大家都十分滿意,加上每位俄羅斯媽媽都順利喺呢個醫院生仔,所以LingLing兩夫婦都選擇咗呢間醫院。

至於收費方面,就比香港私家醫院平得多啦!所有產檢連測試、超聲波少於港幣一萬元。而生產同住院費用大概係港幣一萬五千元。LingLing係住獨立房間,總共住了四天。

生產前,醫院帶媽媽參觀產房

生產前嘅恐懼⋯⋯

本來生仔已經好令人擔心同恐懼,再加上疫情,就更令人不安。因為印度封關,所有商場都關閉,好多嬰兒用品想買都買唔到,只有尿片、奶粉、奶樽呢幾樣可以喺醫院買到,其他物品即使打算上網購買亦因疫情關係唔會送貨,甚至乎禁止網購。LingLing整個人都處於繃緊狀態,好擔心買唔到任何嬰兒用品,「怕寶寶出生後,什麼都沒有。」

而且因為封關,超級市場食物都被搶購一空。很多時候都買唔到肉類,好驚BB會營養不足!

印度封關後,超市很多時候被搶購一空

去到38週,LingLing嘅恐懼感變得更加強烈。因為產檢時被醫生告知胎水變得好少,有可能無得自然分娩,要剖腹。LingLing一直打算自然分娩,從來無打算過開刀,更係擔心醫生嘅技術!加上印度醫院係無笑氣提供,而又唔太建議打無痛。「超級怕痛的我,打針抽血都會哭,完全想像不到沒有笑氣、沒有打無痛,怎樣生產?」LingLing對呢次產子更加恐懼不安。

踏上呢場未知嘅印度生子之旅⋯⋯

LingLing嘅預產期係10/06/2020。而8號嗰日做產檢照超聲波,發現胎水變得越嚟越少,醫生就再安排佢去做胎心機,檢查胎動及BB心跳。結果一切正常,但由於胎水變得好少,醫生建議即時入院催生。LingLing當時緊張到已經流下眼淚,老公一邊安撫一邊又忙着辦理入院手續。

辦理完入院手續後,上房等待

下午五時左右就入住,然後換好衫,就注射催生藥,之後護士再清理私處嘅毛髮。由於事出突然,無諗到會當天入院催生,所以「走佬袋」無跟身,老公只好返屋企拎「走佬袋」,與此同時LingLing喺房不斷走動、做青蛙蹲,希望可以有助生產。

「慢慢地開始感受到有陣痛,輕微的,間歇性的,感覺有點像初期的經痛,這種痛還可以接受。」食完晚飯,醫生就話要做內診,「終於體驗到很多媽媽說的可怕內診,聽說都非常疼痛。」

醫生正準備生產工具

「主診醫生在內診前,都會跟我說一聲她將會做甚麼,非常有禮貌,然後叫我盡量放鬆,會有點痛。的而且確是頗痛,我亦叫了一聲,但還是可以接受。醫生說只是開了一指,叫我慢慢耐心等候及感受陣痛有否變得頻密。到了晚上12點,陣痛感開始變得強烈,而且多了,根本難以入睡。去到三點更加強烈,雙手不斷緊握,在旁的老公開始擔心我能否承受更強烈的痛。終於捱到去天光,完全睡不着,醫生再做內診,只是開了三指而已!這種沒完沒了的感覺不知道可時才完結。

我情緒開始失控,用手敲打床邊,又不停流淚。醫生見到我好辛苦,詢問要否打無痛,但由於她說最好不打,所以我都聽從醫生的建議,繼續忍痛下去。然後醫生開始做清腸的程序,注入了一些液體,不久便把所有東西排出,這個過程護士一直在洗手間裏陪伴着我,又幫我換套新衣服,因為當時已經見紅。去到9點左右,醫生又再一次內診,這時候終於開到5指了,繼續等待。去到中午12點,開到7指了,亦穿羊水,於是乎醫生說馬上推入產房準備生產。

去到産房我已經痛不欲生,不斷大叫,而且一直捉緊老公的手。但醫生好冷靜跟說不要浪費太多氣力在大叫上,叫我慢慢調整呼吸,然後等到全開,她指導我每當感到非常疼痛便用力推,其他時間就儲氣休息。而護士們會在我休息時間餵水,幫我抹汗,因為不斷大叫導致嘴巴變得非常乾燥。

而我推了不知道多少次,終於有曙光,醫生說只要推多一下寶寶的頭便會出來!在過程中,她亦告訴我將會進行『剪陰』,以免造成撕裂。最後我用盡全力吸氣推動,醫生更問老公想不想看到寶寶的頭,當老公一走近,寶寶的頭真的出來了!我痛到已經不自覺地說廣東話!

最後在當地下午兩點半左右,BB出世了。醫生即刻馬上將他抱給我,那時寶寶還連着臍帶,第一次感受到他身體的溫暖,聽到他的叫喊聲,真的很感動很感恩,我捱過所有痛楚,他最終順利來到我身邊⋯⋯我流着淚,望着他,那一刻才知道他是一個男寶寶,因為印度法例規定醫生不可以透露BB的性別,所以我們一直都不知道寶寶性別。」

印度法例規定醫生唔可以透露BB性別,因為重男輕女問題太嚴重,怕有人因為陀女而墮胎

「接着醫生抱回BB完成剪臍帶程序,再交予護士們清潔BB身上的血液及作全身檢查、量度體重。」

出生後,護士幫BB清潔

其後醫生幫LingLing清走胎盤以及縫合傷口,緊接護士們幫佢清潔身體。當BB清潔完畢,護士將BB放去媽媽懷裡,俾BB熟悉媽媽嘅味道,然後俾佢嘗試吸啜母乳。過一陣就會推媽媽返房間休息,寶寶就由護士們照顧。「護士話只要我準備好,隨時可以同BB同房。由於太想見BB,結果睡了兩小時便叫護士安排帶BB到房間。就是這樣我便開始展開忙碌的人生。」

生完休息後,同BB接觸

由產檢到順利生產,對印度醫院大改觀⋯⋯

由第一次戰戰兢兢產檢到最後順利生產,LingLing對印度醫院都所改觀。「可能始終是私家醫院的關係,一定比政府醫院好得多。醫生、護士服務態度一直都非常之好!環境亦非常整潔乾淨!」

LingLing形容印度醫院每次產檢都非常細心。甚至知道佢係第一胎,醫生都會俾好多建議。當時因為印度封關關係,大型商場關閉,但當逐步放寬,醫生更係有主動跟佢講邊個商場有營業,可以去購買嬰兒產品!

而生產前會做肺炎測試,為咗避免孕婦舟車勞頓,醫院更係會派工作人員前往家中採取樣本。

臨生前,醫院派人上門做肺炎測試,採取樣本

「醫生專業的評估,能夠使我順利生產,而且技術方面亦好好,因為傷口好快便復原,而每進行一個步驟前,都會清楚說明,好讓我知道將會發生甚麼事。」每一次內診,因為疼痛關係,LingLing總係會忍唔住叫一聲,但醫生總會同佢講聲抱歉,態度真係非常好!

而護士方面,同樣是有禮貌、細心!每次幫佢清潔傷口、換新衫、換產後衛生棉都非常溫柔!有一次LingLing要產後排尿,但就一直都排唔出。佢一直坐喺廁所,護士就一直在旁陪住佢。而且因為當時身體較為虛弱,護士更係一直用手扶住佢,默默地陪佢排尿。生完第一、兩天,LingLing仲未上乳,佢哋會幫手按摩一下乳房,協助我親餵。因為LingLing未調較好姿勢,BB未吸啜到,其後開始漲奶,護士們都會擔心佢會乳塞,所以一直幫佢按摩。有時候聽到BB喊聲更係會主動問是否需要幫忙。

另外醫院仲安排咗攝影師同蛋糕,恭喜LingLing順利產子!

順利產子後,醫院有些簡單恭喜儀式

到之後產後檢查,亦一樣細心!醫生護士都會好主動關心兩母子嘅狀況!

「所以由一開頭擔心印度的醫療,完全對印度醫療沒有信心,但最後經歷完由產前檢查到生產,真的完全改觀,對各方面都好滿意。」

新手媽媽的徬徨⋯⋯

喺辦理住院手續時,院方提供三天住院。而醫生見到LingLing身體狀況各方面都好理想,如果有需要甚至可以產後第二日夜晚即刻出院。但因為LingLing老公擔佢唔夠休息同整到傷口,所以建議佢留多一兩日院。最後佢由8號下午五時入院到最後12號下午出院。

對於新手媽媽,真的會感到非常徬徨。

由於媽媽同奶奶都因為印度封關,未能前往幫手。所以所有事就淨可以兩公婆共同解決。之前LingLing同過老公提及關於坐月事情(略略提及過唔可以用生水、唔可以吹風、唔可以洗頭沖涼等等⋯)但因為文化差異,西方人真係完全唔理解唔明白。但佢依然有聽LingLing所講,除咗煮飯,其他家務都由老公一手包辦,減輕唔少佢嘅一點負擔,可以盡量有時間休息。

「而且老公雖然不是神隊友,但至少不是豬隊友。」

佢會幫BB沖涼、掃風,BB半夜喊醒,又會主動起身抱佢、安撫佢,而且經常提高警覺,BB夜晚一有啲啲動靜就會飛奔到BB床邊!他仲知道LingLing非常在意母乳不足問題,亦會不斷作出安慰。「但我真的給予自己太大壓力,經常因為這個問題而情緒低落,媽媽都很擔心我因為此事而產後抑鬱,但幸好有朋友都是同一時期的新手媽媽,彼此之間不斷訴苦、鼓勵、支持,還有媽媽每天的關心,好友們的信息,日子一天一天地捱過去,加上慢慢開始上手,整個人開始可以放鬆少少。」
之後LingLing都會自己嘗試調整心情同想法,例如翻睇BB由出世開始嘅照片同影片,盡量令自己開心。「每當看見BB笑、親餵後滿足的樣子,就提醒自己一切問題都不重要,最重要他能夠健康成長。」

BB身份之謎⋯⋯

相信各位朋友都好好奇,咁BB依家係咪會擁有印度身份?
如果喺美國産子,即使父母雙方都唔係美國人,BB仍然可以攞到美國護照㗎!但印度就唔係咁講法啦,政府規定父母一方必須係印度人,否則BB係無法取得印度護照,只係會擁有印度出世紙。

由炎熱嘅印度去到寒冷嘅俄羅斯⋯⋯

因為LingLing老公喺印度嘅工作已經完成,所以佢哋一家已經前往咗俄羅斯,當時大概係產後6個月。

返咗俄羅斯差唔多三個月,若然要比較印度同俄羅斯嘅湊B日子,LingLing寧願選擇印度。「雖然在印度湊B的日子好累好辛苦,但卻比較自由,因為沒有第三者去干涉你湊B!自己做自己認為對的事情,知道怎樣的方法會比較適合寶寶。」

返回俄羅斯之後,LingLing同老爺奶奶同住,所有事情馬上變得複雜。首先老一輩嘅湊B方法,再加上文化差異,同佢本身嘅方法有好大分別。特別喺啱啱返俄羅斯嘅第一個月,因為環境、時差、人物都有極大轉變,BB要從頭適應。

本身BB嘅睡眠時間同質素都唔太好。喺印度時,其實已經搬過一次屋。當時住所旁邊正在起樓,而樓下單位又進行大裝修。每日都受到嚴重噪音滋擾,導致BB日間好難入睡,夜晚又經常驚醒,所以佢同老公提出搬屋。搬到新屋後,BB睡眠情況大有改善,睡眠時間變長、睡眠質素都變好,仲可以自行入睡。但返到俄羅斯後又打回原形⋯⋯於是因為BB的睡眠問題,引發起同老爺奶奶之間嘅磨擦。幸好因為語言溝通上有限,未去到嗌交、亦未有嚴重婆媳糾紛,但或多或少影響了彼此的感情。另一方面,作為新手媽媽變得好易精神緊張,情緒失控。因為一直以來LingLing都好擔心BB睡眠問題,所以又再變得好大壓力。老公成為磨心,爭執都變多。

「其實老爺奶奶是很好的,由始至終都好接受我,雖然語言文化好大差別,但他們從來沒有介意,把我當成自己女兒看待。只是在湊B的習慣、方法上彼此沒有共識。所以為了盡量不令到老公難堪,很多時候都變得隻眼開隻眼閉,不想又逼到自己落深淵。」

「當然奶奶肯幫手湊B並不是完全不好,她幫忙減輕了很多家務,我多了休息時間,而且我們兩公婆可以間中二人世界、去拍拖,所以都很感謝她。」

至於天氣方面,印度天氣熱,俄羅斯天氣凍,LingLing表示兩者佢都可以接受,只係BB需要適應一下。

而環境方面LingLing就覺得俄羅斯優勝。佢指出印度空氣污染指數比較差,就算係未有疫情嘅時候,佢哋出門都會選擇戴上口罩,長遠嚟講對呼吸系統唔太好。

另一方面BB正值加固時間,住喺俄羅斯食物方面比較有保障,有更多選擇,有好多大型超級市場、商場,購買BB用品都非常容易;相反印度選擇較少,街市衞生較差。

總括而言,對於喺外國湊B,LingLing表示佢仍然習慣當中。「因為我不能像在香港那麼熟悉環境,遇到問題可以隨時找家人朋友幫忙。特別現在與老爺奶奶同住,嘗試磨合,盡量學習控制情緒以及放鬆。」

如果可以,我最想⋯⋯

「相信這個不單是我個人的願望,亦是很多人的願望。希望疫情可以完結,然後馬上回港見家人朋友。再沒有疫情,可以讓寶寶探索這個世界、接觸更多新事物,然後健康快樂地成長。」

LingLing最掛住嘅就係香港嘅家人。前前後後,佢已經有差唔多兩年未能回港。媽媽知道女兒要嫁到好遠已經好不捨,本來佢都承諾咗一年至少會回娘家兩次,但好難過地因為疫情所以實現唔到。另外LingLing提及佢都好掛住香港美食「由懷孕起已經經常發夢回港大吃大喝!想念打邊爐、米線、點心、魚蛋粉車仔麵、港式奶茶⋯⋯實在太多⋯⋯」希望佢嘅願望都可以實現啦!