如果各位爸爸媽媽同我一樣鐘意食自助餐，喜歡款色多而且每樣都試想少少，咁呢個地方應該可以Bookmark咗先😀。Um…呢度難度係半粒星🌟，唔駛迫唔駛擔心疫情，老少咸宜輕鬆之選，慢慢享受山徑嘅清幽恬靜🌲！

呢度乜都係有少少，紅葉、茫草、水塘、斜路、天空之鏡、瀑布、山羊 同埋 遊人 甚至係疲累嘅程度，其實都係得果少少。比較特別嘅係環境開揚，輕輕鬆鬆可以從高處俯瞰到大半個錦田八鄉加西鐵路軌同車廠。

我哋由西鐵錦上路站出發，沿馬路旁經小路上山之後，行咗大約二十分鐘就可以從高處見到錦田同八鄉，相對其他景點的確輕鬆得多🏕️。之後行多陣分別見到 人煙稀少 嘅大小水塘，可以安心放低呀仔俾佢跑跑跳跳。行山徑相對平坦，斜路唔多，兩旁間中有紅葉、茫草同飼養嘅黑山羊一隻，可以俾小朋友自由探索🐞🌸。

全程大約三小時左右，完成前可以去附近農場度食新鮮 燉奶、雞蛋仔、格餅 同飲鮮奶🐄，別有一番風味。最後行番出錦田公路乘坐巴士或小巴便可回到元朗市中心🚌，非常方便。

詳細路線：

我哋一家今次由西鐵錦上路站（D出口）出發行到去雷公田。

首先，我哋先沿錦河路往荃灣方向嘅行人路行10分鐘，去到一個分叉口（https://goo.gl/maps/x2wyGxxaGNzkaLRw7）轉右入馬鞍崗村公所，經河背村路到河背營地（https://goo.gl/maps/EgfHqkathgdg3sqp8），之後就在大欖河背水塘家樂徑行上河背水塘（https://goo.gl/maps/ZYpFpMZXFp7YFdEA8）。

睇完呢個水塘可以落番家樂徑去清潭水塘（https://goo.gl/maps/CTGYH91LBhupYvze6），沿途左手邊個景其實好開揚，望得番錦田同八鄉。加上基本上沿一條大路行，斜路又無乜，臨完成仲會途經農場鮮奶（https://goo.gl/maps/oAD3FxARC68kMaCq9），有興趣可以一試佢嘅燉蛋，蛋有蛋味嘅，都濃嘅。

我哋一家以荃錦公路嘅巴士站（https://goo.gl/maps/Trn325cqRVhUCYPVA）為終點，可選51號巴士或72號綠色小巴番元朗或錦上路。全程大約有11公里，邊行邊影在3.5小時內可以完成！

＝＝＝＝＝＝＝＝＝＝＝＝＝＝＝＝

一圖一文滿載親子回憶
一點一滴記錄成長片段

Facebook：泥圍爸爸的育兒時光