【HolidayMama】一家大細舒展筋骨!港版大峽谷x芒草群x天空之鏡

【HolidayMama】一家大細舒展筋骨!港版大峽谷x芒草群x天空之鏡


⭐新常態之下,泥圍爸爸每星期都會一家大細去郊外舒展一下筋骨💪。最近搵到有條以屯門做起點嘅路線有港版大峽谷之餘,行行下仲有芒草群 、天空之鏡同埋日落 🌄暮光嘅靚景,滿足曬秒秒鐘都想為太太同仔仔留倩影📸嘅泥圍爸爸。

我哋孭住呀仔一邊行一邊影靚景,偶然會放低小朋友在草地、泥地同石地散散步,全程用咗大約5️⃣小時就可以完成。可能因為全程所需時間頗長,路上嘅遊人唔算太多,就算中途行到無力,亦可以乘坐小巴離開🚌。

沿途除咗有不同嘅景點外,不時會見到有大大小小嘅油畫,為路上帶來不一樣嘅藝術體驗🖼️。此外,附近亦有一個萬里無人嘅大草地,種有高高低低嘅芒草群。如果喜歡同芒草打卡嘅話,相信呢度可以慢慢影都得。

有時候細心觀看,自然會發現靚景原來已經出現😄。

詳細路線:

我哋一家由屯門良景山邊上山,行咗廿分鐘咗右嘅斜路之後,經過波蘿山到達有「港版大峽谷」之稱嘅良田坳峽谷。呢度遊人都幾多,有啲影相靚位都要先排一排隊。

沿住海邊方向找到下山嘅路,大約半小時候會到達稔灣路,之後會見到左邊小路有間東覺禪院,旁邊有一個萬里無人嘅大草地,種有高高低低嘅芒草群。如果喜歡同芒草打卡嘅,當日呢度係零遊人,可以慢慢影都得。

至於前面提及過既油畫,由波蘿山行到鴨仔灣海邊一路行就會見得曬19幅!

最後,我哋沿住稔灣路同深灣路,行左大約一個半小時到達流浮山影日落就完成大半天行程。

以下為相關的Google Map地標連結:

屯門良景山邊
屯門波蘿山
良田坳峽谷
東覺禪院旁的芒草群(人少,個人推介打卡點)
下白泥淺灘
稔灣路岸邊(人少,個人推介打卡點)

油畫創作者:車米人-畫畫三姊妹

================

一圖一文滿載親子回憶
一點一滴記錄成長片段

Facebook:泥圍爸爸的育兒時光