【2019幼稚園面試】 K1親子面試熱門問題

【2019幼稚園面試】 K1親子面試熱門問題


在2020/21入讀幼稚園K1的小朋友家長,相信踏入7月起,已經漸漸感受到面對一連串選校任務的壓力。大部份幼稚園在每年7月、8月舉辦簡介會,然後到11月-1月便是幼稚園面試高峰期。面試模式按每間學校而定,例如親子與老師/校長對答、測試小朋友互動的小組遊戲面試等。而以下熱門問題例子就可以幫助預備接受親子面試的家庭。

家長不妨預先與小朋友練習回答問題。記得除了答案內容,眼神接觸與態度都非常重要。語言上可以盡量教導小朋友以完整句子作答,態度則保持笑容,望著老師。

小朋友預備篇


1. 基本問題

→ 你叫咩嘢名呀?
→ 你幾多歲呀?
→ 你係男孩子定女孩子呀?
(註:家長宜教導小朋友認出男孩、女孩的特徵,老師亦可能以圖片或公仔實物,要求小朋友辨別性別)
→ 你爸爸、媽咪叫咩名呀?
→ 你有冇兄弟姐妹/哥哥姐姐/細路妹妹?
→ 屋企有邊個親人一齊住呀?
→ 你鐘意食啲咩呀?
→ 你鐘意睇咩卡通片呀?入面有咩人物㗎?
→ 平時爸爸媽媽會帶你去到邊度玩呀?


2. 當日問題

→ 今日邊個同你一齊嚟呀?/(指向家長) 佢係邊一個嚟呀?
→ 你搭咩車/交通工具嚟到學校㗎?
(註:家長與小朋友練習時,可特意改動題目中的字眼。即使題目字眼有少許變化,小朋友都能明白)
→ 你今朝食咗早餐未呀?食咗啲咩嘢呀?


3. 能力測試範圍

→ 顏色認知:認出顏色名稱、指出指定顏色物件、跟從指令,例如
【拎起黃色物件,放返落黃色嘅籃】
→ 形狀配對:將圓形、三角形、正方形拼塊放在相對形狀的地方
→ 認讀數字(0-9)/拿出數件物品,小朋友需要由1開始數起
→ 五官題(叫小朋友指出自己 / 圖片上 / 洋娃娃的眼、耳、口、鼻位置)
→ 日活常識題(E.g. 媽咪去超級市場或街市,可以買到啲咩?嗰度有啲咩?)


題目形式

玩具題

→ 串珠仔、用匙舀珠仔、切開魔術貼水果玩具(考核小肌肉運用)
→ 疊積木(將積木疊起、說出積木顏色、形狀)
→ 拼圖(通常只有4大塊,例如是動物圖案)


圖片題

老師會向小朋友展示圖片,小朋友需要回答有關該圖片的問題。圖片內容可能圍繞 小朋友與爸媽生活小朋友熟悉的物件

→ 圖片中,媽媽在做什麼?爸爸在做什麼?(睇電視、睡覺 等等)
→ 家中物件(如客廳物件、廚房物件 等等)
→ 餐具(匙羹、叉 等等)
→ 水果
→ 交通工具
→ 動物
(註:除圖片之外,老師亦有可能以實物發問,例如「呢一隻公仔係咩動物嚟㗎」、「呢一個水果叫咩名呀?」


親子閱讀題

→ 家長與小朋友進行簡單閱讀,及後老師向小朋友發問(E.g. 剛才嘅故事入面有咩動物呀?小朋友嘅衫係咩色㗎?)


4. 其他問題

→ 你鐘唔鐘意唱歌呀?可唔可以唱一首歌俾老師聽呀?

→ 跟隨外藉老師做動作、跳舞,及聽從簡單指令,例如「Stop」

→ 觀察題:老師可能讓小朋友之間、或家長與小朋友互動,從而觀察小朋友的社交能力、合群性。小朋友不應表現呆滯或太霸道。

→ 禮貌題:面試完結前,老師或會給予小朋友一粒糖果或一張貼紙,希望測試小朋友是否懂得說「多謝」;而進入及離開面試室,應該說「早晨」、「再見」


家長預備篇


1. 對學校 / 教育理念睇法

→ 點解會嚟報讀我哋學校?
(註:家長需要先熟讀幼稚園辦學理念,並表達家庭與學校的理念有什麼相同之處)
→ 你對小朋友喺幼稚園嘅成長有咩期望?
(註:家長宜事先了解幼稚園風格,例如重視兩文三語 / 祟尚快樂學習的Happy School才調整期望)
→ 對你嚟講,點樣係你理想中嘅家校合作模式?你期望老師同家長之間嘅聯繫係點樣?
→ 如果小朋友有手工、在住所附近搜集資料功課,家長有時間配合進行嗎?
→ 你對「贏在起跑線」、「怪獸家長」有咩睇法?
→ 小朋友有冇上過咩興趣班/計劃讓小朋友報咩班?


2. 日常照顧小朋友問題

→ 平日邊個負責照顧小朋友?
→ 父母職業是什麼?每天平均花幾多時間與小朋友相處?
→ 小朋友喺屋企會做啲咩?親子時間會陪小朋友做啲咩?
→ 放假會帶小朋友去邊度玩?最近去過咩嘢地方玩?
→ 喺屋企會講咩語言呀?


3. 小朋友性格/能力問題

→ 小朋友性格係點樣?優點同缺點係咩?
→ 你覺得仔仔 / 囡囡有咩你最欣賞嘅獨特之處?
→ 小朋友食飯、去廁所嘅情況係點樣?
→ 小朋友戒咗尿片未?


4. 家長管教問題

→ 小朋友初次返幼稚園唔適應,唔願返學,你會點同佢做心理準備?
→ 小朋友平時出到街扭計,你會點處理?
→ 你會怎樣著手協助小朋友改善他的缺點?
→ 小朋友與工人姐姐的相處關係是怎樣?