【HolidayMama】周末玩轉挪亞方舟~帶小朋友搭時光機返爸媽小時候!

【HolidayMama】周末玩轉挪亞方舟~帶小朋友搭時光機返爸媽小時候!


剛剛嘅假期我地小JM家就去咗挪亞方舟玩,仲參加咗復活節特備活動。因為馬灣無得揸車入,所以就要去搭穿梭巴士。

而今次我地就揀咗係旺角MOKO乘坐穿梭巴士前往挪亞方舟。

^記得留意班次及時間喔!乘坐穿梭巴士車程都只係二十分鐘左右,可以話係非常方便,人流亦唔算多。

適逢挪亞方舟開業十周年,今年復活節更帶來一個老少咸宜嘅懷舊歲月活動 - 「童遊反斗時光機」!講到明係「懷舊歲月活動」,當然就係同昔日嘅香港歲月有關啦!而今次挪亞方舟就用咗一個全新嘅角度帶出有關「傳承與創新」嘅活動主題添!小JM仲同爸爸再次一齊入廚,今次仲整砵仔糕同麵餅添!

入場時會收到一本歲月通行證,可以行用背面嘅遊戲劵去參加想玩嘅項目。

^歲月通行證

而每項遊戲所需要嘅遊戲劵數量及時段亦會係內頁見到。想玩多幾項又唔想撞時間就要小心安排啦!

有興趣參加活動嘅就要快啲出發去挪亞方舟玩返轉先得啦!

唔講太多,即刻睇下我地今日玩咗啲咩啦!

懷舊歲月活動體驗
維他奶砵仔糕工作坊

難易度:****(5星為最難)
所需遊戲劵:三張

小JM以為食出名,有得整野食之餘仲可以即時食埋成品,當然就係開心到一個點啦!呢個工作坊正好啱晒小JM,而且仲係用麥精維他奶來整砵仔糕添架!導師會遂個步驟教小朋友去完成砵仔糕,之後仲會即場幫你拎埋去焗!麥精豆奶砵仔糕味道特別,但不失傳統特色。只要加入紅豆及粘米粉等材料就可以製成香甜煙韌好美味嘅新式砵仔糕啦!

^未開始已經眼甘甘望住啲紅豆。

自己砵仔糕自己整!

^爸爸同小JM合力完成砵仔糕漿,準備分入小碗拎去蒸啦!

^二人合力係快手嘅!

蒸完出來唔夠幾分鐘已經俾小JM食咗落肚啦!

^完成之後記得拎埋個維他奶盒去洗淨再回收呀!

養生花茶體驗坊

難易度:**** (5星為最難)
所需遊戲劵:三張

來到養生茶坊,第一件事就係要換返套茶館師傅制服,之後先再慢慢跟導師學習調配三款養生花茶!而今次學習調配嘅花茶分別有:桂花雪梨茶、蘋果山楂茶 及 檸檬薏米茶。

^爸爸教小JM執材料整茶包及入袋。

^封好之後仲要記得貼上標籤,咁先算完成架!

^係爸爸協助下小JM終於成功調配三款養生花茶,仲將花茶包裝好,準備送俾媽媽飲。之但係,何解呢位小師傅個樣會咁古惑架呢?

情尋康樂棋製作室

難易度:**** (5星為最難)
所需遊戲劵:兩張

康樂棋,我相信大部份爸媽們都應該玩過。而家嘅小朋友係物質咁豐富嘅情況之下,又有幾多個真係玩過、體驗過呢?未玩過都唔緊要,只要來到呢個製作室就可以落手落腳製作一副獨一無二嘅專屬康樂棋!

^連盒都要自己摺架!

^小JM明顯未玩過,所以都唔知點入手好。唔緊要,仲有爸爸幫手!

^爸爸三兩下手勢就已經摺好晒個棋盒啦。

^整完棋盒仲要D.I.Y. 埋張棋紙。導師會提供一張具有懷舊特色嘅棋紙及貼紙俾大家。大家可以按個人喜好將貼紙貼於棋紙上即成。

^你睇! 兩個一齊D.I.Y. 棋紙幾開心。完成之後要去揀埋骰仔及棋子就完成架啦!

懷舊香江製麵館

難易度:***(5星為最難)
所需遊戲劵:四張 (包一款口味麵條)

聽師傅講,以前學製麵無返三、五、七年時間都學唔識。仲要用好大勞力,而且造麵方法仲好多,如木棍打、手拉、刀削之類。但而家係度學整麵呢,就只需十數分鐘而已,咁就自然整到具個人口味嘅麵餅架啦!

^小JM好專心聽師傅講解
專心嘅小女孩原來都可以好有魅力。(笑)聽完師傅講解之後,小JM就同爸爸一齊動手整麵啦!

^小JM已經自動波開始製作,又真係似模似樣咁喎!

^攪完一輪,製麵機終於出麵條啦!小JM超興奮呀!

^整好麵餅緊係不忘要影相留念一下啦!

^包好晒準備可以入袋,但入袋前記得要加返個標籤喔!標籤仲有埋自己個名架!

^完成後又點少得影相留念呢~之但係點解要CHOK呢?

^斑馬同獅子都來咗麵館同小朋友們打氣!

溫馨小提示:
因為麵餅無加入任何防腐劑,所以建議盡早食用。食用前記得唔好壓住到,以免壓扁麵餅。

巨型懷舊遊戲競技場

難易度:***(5星為最難)

波子棋、彈珠台及層層疊你玩過未?爸媽們一定唔會陌生,之但係呢度嘅巨型版本你又敢唔敢挑戰?係懷舊遊戲競技場內設布三款巨型嘅懷舊遊戲小朋友一齊挑戰。

巨型波子棋

你以為同普通波子棋弓樣玩法?咁就錯了!其實係要將波波拋入顏色圈先會有分架!

超大彈珠台

彈珠台,小JM玩過,仲拎到小禮物。之但係呢個超大彈珠台就真係考起小JM了。

^ 來啦!全力一擊將個波推出去啦!

層層疊

就話要你疊高高,但而家呢個玩法就係要你將佢一槌打散!想做大力士?都真係唔易架!

^原來小JM細細粒都幾大力架喎。

每玩完一個遊戲記得蓋印呀,儲齊三個就可以換取小禮物架啦!想知係咩?唔話你知,等你自己贏仲好啦!

 

古董巴士 合拍區
難易度:*(5星為最難)

挪亞方舟與九巴合辦咗古董巴士合拍區,展出「大水牛」麗晶5型雙層巴士及「亞比安」55型單層巴士!呢兩架咁有歷史價值嘅巴士就連爸媽我倆都未見過添!係呢個展區,小朋友仲可以穿上九巴制服扮演一下小司機添架!

其他活動推介:
童趣天地
空中奇遇繩索
動物全接觸
動物標本 多面睇

===============================

童遊反斗時光機
日期:  2019年4月19日至5月13日
(逢星期六、日及公眾假期)
入場費:
成人HK$168 小童及長者HK$138

===============================

15541032_729782757198315_5534628084094868981_o80後情人節媽媽與元宵節寶寶。曾任職Playgroup導師、Marketing Firm既新手全職媽媽,喜歡細數生活中與小JM既點滴動人時光,紀錄及分享育兒既小心得、幼兒食譜分享、親子旅行及購物分享