【面試極秘檔案🗂️檔案.4】驗收時間!熱門面試題目實戰!熱門題目大全!

【面試極秘檔案🗂️檔案.4】驗收時間!熱門面試題目實戰!熱門題目大全!


🗂️檔案.3 家長都係面試關鍵!NG行為你一定要知!必知「家長功課List」

經過一連4集嘅洗禮,由傳聞講到小朋友事前練習,再講到家長準備⋯⋯萬眾期待!終於嚟到要打BOSS嘅驗收時間,嚟一個模擬面試啦!一連串熱門問題x回答準備小Tips,面試前必睇!

Yuki @ Mama応援団
育有一子 Enoch(應屆面試生)

經驗:
– 曾任職幼稚園老師5年
– 現正修讀教育榮譽學士(幼兒教育:領導及特殊教育需要)

教育理念:
「教養孩童走他當行的路,就是到老,他也不會偏離。」 一箴言 22:6
幼教智囊團
一群有多年面試學生經驗的現任本地幼稚園老師組成。由有11年教學經驗,6年行政經驗的幼稚園主任所帶領。

不過首先,喺實戰之前,我哋要知道幼稚園面試到底係點「玩法」。正所謂,知己知彼,百戰百勝。我哋即刻同Yuki一齊嚟個大!解!構!為呢場「硬戰」部署一下啦~

了解面試形式

要製定「策略」嘅第一步,當然要了解一下學校嘅面試形式。事關每間學校都會有唔同嘅情況,多數會分為小組、一對一、家長面見,但記住要預先搜集定相關資料啦!

今集我都喺幼教智囊團度刮到唔少料返嚟!首先就同大家一齊分析下,唔同項目嘅重點啦!

1)小組活動重點

參與程度

透過小組活動,老師會觀察小朋友對唔同活動嘅參與程度。喺我以前教嘅學校,老師會設計一張評量表,裡面會有:很少參與、部分參與、積極參與,老師會按小朋友嘅表現俾剔。同時,老師都會喺備註部分具體寫返小朋友嘅特別情況,例如:哭鬧、離唔開家長、太緊張、長期定點望住某一個位置⋯⋯都會記錄落嚟!

⭐Tips:如果學校有喺面試前提及會有小組面試,家長都可以預告定俾小朋友知:「我哋除咗同老師玩,仲有其他小朋友都會一起玩。」俾小朋友有個心理準備會接觸陌生人。

2)講故事重點

「專注程度」

老師主要會睇小朋友有無專注喺故事入面,所以老師會因應故事,提出一啲小任務小朋友,考驗小朋友作唔作出到回應。

例子一:
指出書中圖案,請小朋友講出係咩嚟;又或者講出名稱,請小朋友指出嚟。
例子二:
因應故事問一啲相關嘅日常生活常識,例如:有隻小白豬玩完污糟晒咁點算好?
等等

3)音樂活動重點

「音樂感 & 投入程度」

音樂活動嘅時候,老師會睇小朋友嘅音樂感、投入度。如果歌曲係有動作的話,會想睇吓小朋友會唔跟住律動、做一啲指定動作。從而睇下佢哋大小肌肉嘅發展。


咳咳!今次真係要嚟個正式嘅面試實戰啦!Yuki同埋幼教智囊團提供咗時下最熱門嘅面試問題,同埋回答上嘅Tips,即刻去睇吓啦!

熱門問題大全

Q1. 你叫咩名啊?
⭐Tips:老師會希望小朋友可以望住老師講出自己全名。
小朋友有時候會講咗自己嘅花名出嚟,例如:BB、哥哥等等,咁樣係NG㗎!

Q2. 你今年幾多歲?
⭐Tips:家長可以預早教小朋友,面試日子當日嘅歲數年齡。

Q3 你係男仔定女仔?
回答正確就可以,主要都係考小朋友嘅認知水平。

Q4. 今日邊個同你一齊嚟啊?你身邊係邊個啊?
⭐Tips:老師會透過對話睇吓小朋友嘅語言組織能力,講到完整句子會加分㗎!
如果語言能力較好的,可以試吓講:「媽媽陪我嚟/呢個係媽媽」。

Q5. 你屋企有咩人㗎?
⭐Tips:詳細清楚講到每位成員,會加分!
說話能力較好嘅小朋友,屋企入面如果有小動物都可以提及,同埋可以能講埋名字就更加好(eg. 有爸爸/Daddy、媽媽/Mammy、小旺狗狗、仲有我4個人)。但如果未能提及,淨係講到「家人」其實都可以。

Q6. 你今天搭咩車嚟學校?
⭐Tips:較具體嘅答案。
「坐車車嚟!」呢類嘅回答過於空泛。到底係搭咩車呢?如果可以答到「行過嚟/爸爸嘅車/巴士/的士⋯⋯」具體嘅答案會更加好,亦都睇得出小朋友嘅詞匯量!

Q7. 平時邊個同你玩?
⭐Tips:可以係工人姐姐,但回答入面唔可以淨係得工人姐姐。
有好多家長會怕小朋友會提及工人姐姐。但其實提及係無問題㗎,但如果答案入面淨係得工人姐姐就會顯得家長缺少同小朋友相處嘅時間。各位家長,都應該多花時間同小朋友相處,等佢哋可以記得你哋啦~

Q8. 平時你鍾意玩/做咩?玩咩玩具?
⭐Tips:咩回應都可以,但同家人一齊嘅活動更佳。

Q9. 你最近放假同父母去咗邊度玩?
⭐Tips:面試前可以同小朋友去令他較為深刻,但又唔刻意嘅地方(eg.公園、做運動、行山)。如果小朋友可以講到自己鍾意嘅地方就更加好!

Q10: 玩積木
老師會請小朋友用積木搭高或者砌圖案,同時會問小朋友積木嘅顏色等常識問題。


以上面試內容加入咗好多由在職幼稚園老師提供嘅熱門面試問題同埋實用Tips,希望可以幫到大家啦!各位爸爸媽媽帶小朋友去面試前,不妨參考一下,同小朋友練習一下啦!

⏯️重溫本集: