【面試極秘檔案🗂️檔案.3】家長都係面試關鍵!NG行為你一定要知!必知「家長功課List」

【面試極秘檔案🗂️檔案.3】家長都係面試關鍵!NG行為你一定要知!必知「家長功課List」


🗂️檔案.2 為面試做好準備!從日常學面試技巧!

一講到幼稚園面試,好多家長都會非常緊張地幫小朋友做好多準備,例如報好多「面試班」、做好多相關嘅練習同訓練,但大家好多時都忽略咗一點⋯⋯就係家長本人,都要做!好!準!備!

點樣先叫Ready好?有啲咩嘢做咗絕對係NG?即刻同大家大!解!構!

Yuki @ Mama応援団
育有一子 Enoch(應屆面試生)

經驗:
– 曾任職幼稚園老師5年
– 現正修讀教育榮譽學士(幼兒教育:領導及特殊教育需要)

教育理念:
「教養孩童走他當行的路,就是到老,他也不會偏離。」 一箴言 22:6
幼教智囊團
一群有多年面試學生經驗的現任本地幼稚園老師組成。由有11年教學經驗,6年行政經驗的幼稚園主任所帶領。

面試前準備

1)父母衣著

帶小朋友面試時,總會幫小朋友打扮得好好睇睇。其實父母都應該要穿著得宜。

NG衫配搭:T-SHIRT、背心、短牛、運動裝

適合配搭:
媽媽:連衣裙、長褲
爸爸:恤衫、長褲、西褲

適合嘅衣著,可以令老師都可以感受到家長係一齊重視呢場面試!

2)了解子女

而最重要呢,就係要了解子女啦!例如,平時小朋友主要照顧者係邊個?主要使用嘅語言係?放假時會同小朋友做咩活動?小朋友最鍾意玩咩?作息時間如何(影響報上、下午班)⋯⋯相信作為佢嘅爸爸媽媽,你哋都識答㗎啦!

3) 做好「功課」

除咗衣著,爸爸媽媽都要「做足功課」!事關老師會透過同家長傾計,或者填寫問卷,睇下家長係咪真係了解學校。

了解學校

大家可以預先瀏覽學校嘅網頁,了解呢間學校嘅教學方法、教學理念,諗下自己點解會揀呢間學校。

⭐有啲學校會用唔同嘅教學法,例如:蒙特梭利、華德福等等,家長要預先了解呢啲教學法。當老師問到相關內容,都可以表現出你對呢間學校嘅了解。

熱門問題

講到呢度,面試前要做嘅準備就略略同大家講完啦!不如嚟一個模疑面試,考考大家一啲面試入面老師會問嘅熱門問題,睇下大家會點樣答先!

1)如果小朋友返學時大喊,喊到大喘或者嘔吐,你會點處理?
2)如果小朋友喺街大喊甚至磥地,你會如何處理?
3)你點睇HAPPY SCHOOL?
4)家長對小朋友入讀本校的期望。

其實以上題目嘅背後都大有來頭㗎!以上題目可以睇到家長係咪有心為幼兒選擇學校,以及有無教育理念,係咪一味想退俾學校教。

事實上,每間學校都睇重「家校合作」,只有家長同老師合力教育幼兒,先幫助到幼兒成長。唔好小朋友一踏入學校之後,就將所有教育責任推俾老師啊!


面試時留意

做好晒準備,係時候同大家分享面試時嘅Tips啦!

1) 禮貌談吐

面試老師其實好睇家長嘅談吐。喺面試前帶小朋友輪候或者小朋友喺大肌肉場玩嘅時候,老師、主任或校長其實已經會觀察小朋友同家長嘅表現,做評分。

之前都有試過家長喺幼稚園大聲鬧小朋友。會有同事行去附近聽下發生咩事,但唔係主動介入。其實老師係想觀察家長嘅處理小朋友情緒嘅方法,去了解呢個家庭平日嘅教養係點。

2)避免代答或者搶答

小朋友面對陌生人會有同平時唔同嘅表現,係非常正常嘅。所以家長要避免太緊張催促小朋友答問題、代小朋友答或者搶答。不如俾多啲時間小朋友慢慢回答,或者引導小朋友觀察,然後俾佢自己諗一諗。等小朋友自己回答,先可以俾老師觀察到小朋友對事物嘅認識、語言理解同表達能力如何。

3)避免常常介入老師與幼兒的傾談、避免找藉口

經常替小朋友搵藉口,例如:「佢平時呢個時間要瞓啦,所以好呆」、「佢平時識㗎,呢個係蘋……咩啊?」,會令小朋友習慣會有家長保護同提示,降低小朋友同老師傾計嘅動機,或者嘗試嘅態度。 過度保護絕對係NG!

4)玩教具或玩具時避免家長代勞,多鼓勵和引導

老師喺小朋友玩玩具時,除咗會從中觀察小朋友嘅認知、小肌肉發展、手眼協調能力,亦都會觀察佢哋嘅解難能力。所以當小朋友玩玩具時遇到困難,家長係唔應該直接代勞,而係鼓勵小朋友自己去嘗試咗先!

如果喺集體玩玩具時,小朋友出現爭玩具嘅情況。老師都會多加留意家長嘅處理方法。呢個時候家長自然嘅表現,正正透露到家長日常嘅管教方法!

處理例子:係喎~呢個玩具本身係你玩嘅,俾小朋友拎咗。但係你搶嘅動作都係唔好㗎喎!不如一齊開口問下:「可唔可以俾返我?」

所以話呢,幼稚園面試又點止係小朋友去面試咁簡單啊!做家長都要做唔少準備先得㗎!

下一集《面試極秘檔案 – 幼稚園篇》繼續同大家大解構幼稚園面試,ByeBye!

⏯️重溫本集: