【面試極秘檔案🗂️檔案.2】為面試做好準備!從日常學面試技巧!

【面試極秘檔案🗂️檔案.2】為面試做好準備!從日常學面試技巧!


🗂️檔案.1 解碼幼稚園面試傳說!不為人知嘅老師情報分享!

去幼稚園做足準備,in得開心至醒得你!上一集就同大家拆解咗幼稚園面試嘅傳聞啦!今集就教大家點樣同小朋友準備面試!小朋友面試唔同大人面試,比起背一啲model answer,更著重喺小朋友自然嘅表現!所以,要為面試做好準備,就要從日常生活入手啦!即刻等前幼稚園教師Yuki同埋佢一班幼教智囊團,教大家點從日常生活入面學習「面試技巧」啦!

Yuki @ Mama応援団
育有一子 Enoch(應屆面試生)

經驗:
– 曾任職幼稚園老師5年
– 現正修讀教育榮譽學士(幼兒教育:領導及特殊教育需要)

教育理念:
「教養孩童走他當行的路,就是到老,他也不會偏離。」 一箴言 22:6
幼教智囊團
一群有多年面試學生經驗的現任本地幼稚園老師組成。由有11年教學經驗,6年行政經驗的幼稚園主任所帶領。

打招呼,真有禮貌!

日常家長同小朋友之間嘅對話,可以多啲使用禮貌用語,因為小朋友會直接模仿㗎!面試時見到老師時記得講:「老師,早晨!」「老師,午安!」做一個有禮貌嘅小朋友,個個老師都鍾意㗎!

所以平時去街都可以教佢哋講「叔叔、姨姨早晨!」,咁見到老師時都會識得打招呼啦!

自我介紹

如果係面試國際學校,有機會有外籍老師或者需要普通話自我介紹。可以預備兩文三語嘅介紹。

一起聊聊天,了解生活小常識

老師會問一啲簡單問題,睇下小朋友對生活小常識嘅理解。例如:「今日搭咩交通工具嚟搵老師玩啊?」 考下小朋友對「交通工具」嘅理解係啲咩。

玩遊戲,顯功力!

一大班小朋友玩嘅時候,可以睇得出好多嘢!例如睇下小朋友識唔識得分享啦,會唔會同其他小朋友輪流玩?識唔識得自己獨自玩?

⭐Tips:避免推撞、打人、搶奪玩具、尖叫!

面試入面老師都會安排小朋友玩唔同遊戲,到底佢哋喺呢啲小遊戲入面觀察到小朋友咩能力

例子一. 切水果
– 認知能力:顏色、水果名稱、水果數量
– 小肌肉能力:切、握
– 語言理解與聆聽:老師會給指令拿其中的水果分享給老師一起吃,小朋友要留意老師說拿哪一樣。

例子二. 入形狀
– 認知能力:形狀名稱、數量
– 手眼協調能力

例子三. 大肌肉場
老師會透過瀡滑梯等動作觀察幼兒大肌肉活動嘅能力。

例子四. 講故事
– 留心聆聽故事內容,理解老師的提問,嘗試回答。


喺屋企都可以透過一啲小活動,預先練習嘅!各位家長,不妨跟住試做啦!

陪玩與溝通

小朋友專心玩嘅時候,可以俾佢哋有自己玩嘅時間。當小朋友玩熟習後,家長再加入對話,陪佢一齊玩。家長一開始可以試下形容自己嘅動作或者問小朋友「呢個係咩顏色 / 呢個係乜嘢啊?」去引導小朋友。

重複重複重複

小朋友嘅學習係不斷重複操作先會記得。所以切忌因為心急想要小朋友快啲學識,淨係教咗兩三次就提問相關嘅知識。咁樣會令幼兒無所適從,並且覺得沮喪。

⭐Tips:切記心急!

喺學習或面試期間,切忌將小朋友作出比較,例如:「小明都學識顏色,你大過佢咩色都唔認得!」小朋友嘅表達未必跟得上佢嘅理解能力,有時候表達唔到,唔代表佢唔知道。加上小朋友已經有一定程度嘅理解能力,其實係會聽得明成人做比較時,帶有嬲嘅語氣。咁樣係會影響小朋友嘅情緒,甚至會自我懷疑。

遊戲學習、多操作

建議家長可以以遊戲方式同小朋友學習唔同嘅知識,多啲俾佢實際操作嘅機會。唔好只係空講圖片、圖卡,或者螢幕教學。

其實小朋友好鍾意同你玩㗎,多啲互動啦!


生活細節=面試訓練

作為家長,除咗多啲安排練習活動俾小朋友,一啲生活上面嘅細節,都可以成為為面試準備嘅訓練㗎!

面試時會見到陌生人之餘,仲要同佢對話,小朋友會緊張都係人之常情。家長切忌心急:「你叫老師啦!」「答問題啦!」呢啲句子絕對係NG! NG!

日常可以俾幼兒一啲面對陌生人嘅小任務,例如:去公園、超級市場、餐廳,請小朋友幫忙埋單或者點餐等等。

多啲鼓勵佢哋,當小朋友做得到以上小任務,可以大大聲稱讚、誇張啲都可以!亦可以獎勵小餅乾等零食!小朋友得到獎勵就會開心,知道自己做得好好。

小朋友去公園玩都可以大有收獲!因為小朋友可以學習面對陌生小朋友,亦都會學到輪流玩、一齊玩、排隊玩等等嘅社交禮儀。

學習同練習時千祈唔好操之過急!要留意小朋友嘅心情同作息時間。各位家長,要相信你小朋友嘅能力啊!

以上就係今集內容嘅分享!想知道更多有關幼稚園面試嘅Tips同資訊?記得留意我哋下一集《面試極秘檔案 – 幼稚園篇》啦!

⏯️重溫本集: