【面試極秘檔案🗂️檔案.1】解碼幼稚園面試傳說!不為人知嘅老師情報分享!

【面試極秘檔案🗂️檔案.1】解碼幼稚園面試傳說!不為人知嘅老師情報分享!


嚟到暑假,有人歡喜就有人愁!喺一眾同小朋友出去玩嘅父母入面,總有一批爸爸媽媽正喺度苦惱⋯⋯幼稚園面試!有關面試嘅傳說一籮籮:面試時家長一出聲就扣分?要讀學前班先加分?報名表一定要親手交?聽得多就越驚,壓力就越大!

咪自亂陣腳啦!等我哋由前幼稚園教師Yuki同埋佢一班幼教智囊團,帶大家從老師角度睇面試呢件事。話俾大家知邊啲要避雷啦!

Yuki @ Mama応援団
育有一子 Enoch(應屆面試生)

經驗:
– 曾任職幼稚園老師5年
– 現正修讀教育榮譽學士(幼兒教育:領導及特殊教育需要)

教育理念:
「教養孩童走他當行的路,就是到老,他也不會偏離。」 一箴言 22:6
幼教智囊團
一群有多年面試學生經驗的現任本地幼稚園老師組成。由有11年教學經驗,6年行政經驗的幼稚園主任所帶領。

傳聞一:面試時家長唔可以同小朋友講嘢?

其實幼稚園面試有分好多種模式,有小組,有個別,當然都有家長陪同。當小朋友同家長一齊面試,有交流有溝通,係好正常嘅事。有時候家長太刻意唔講嘢,小朋友反而會覺得你同平時唔同,可能會令佢好焦慮㗎!我相信坊間有呢類傳聞係因為家長怕一開口就講錯嘢,只要留意說話嘅內容,就Okay啦!

傳聞二:小朋友有讀PN(學前班),是否會較易取錄?

有無讀學前班其實無好大影響關係㗎!因為好多面試都喺11月,入過PN嘅小朋友都仲係適應緊PN嘅生活。所以學校多數都只係會睇面試時嘅即時反應。當然,小朋友有機會喺PN已經適應得好好,有一定程度嘅自理能力,識得返學嘅規則,表現可能會比較有信心。但呢個都係要睇小朋友本身自己嘅能力嘅~

傳聞三:報名表一定要親身交先有誠意?

其實喺疫情期間,好多學校都改咗做網上交表。當然有好多學校一直都係,而有啲學校就兩種方式都有。但其實兩種方式都無關係,唔會話你用網上交就無誠意。

反而係你好早交,但文件唔齊,個影響就比較大啦!所以報學校嘅時候,要預先睇返每一間學校嘅需要,準備齊晒所有文件,準時上載就可以。

傳聞四:張證件相係關鍵

疫情下,個個都戴住口罩,張證件相都真係幾緊要嘅。不過面試當天,只要個look醒醒目目都會留下深刻印象,好多時候都係面試表現比較直接影響到個取錄結果。當然如果喺同分嘅情況下,學校都會著眼於家長嘅表現、談吐。如果分數都仲係完全相同,其實仲會睇埋報名嘅先後次序。所以話,張相係點,確實係會留下印象,但未必會成為取錄嘅關鍵。

⭐留意返有部份學校都會接受嬰兒期嘅相,但大多數都需要交近照。

傳聞五:一定要整PORTFOLIO

其實好多學校都唔睇PORTFOLIO㗎,其中一個原因就係收太多,未必即時睇得晒!當然,學校其實都係較為著重於面試表現,所以就算檔案做得幾靚,小朋友喺面試時都係無反應,無自信,校方好有可能會懷疑家長「做假」!建議各位家長可以了解個別學校嘅要求先,唔需要盲目地跟風整PORTFO~


有關幼稚園面試就同你一一打破咗啦!作為前教師,自己都面試過形形色色嘅家長,自己都留意到某啲行為可能會令老師大扣分㗎!

趁人少少,就同大家Share一下呢個不為人知嘅情報啦!

「長篇大論」

家長切勿長篇大論講育兒理念!講曬由細到大發生過所有嘅事以致你今日會用呢個育兒嘅方法。絕對係NG!

「佢平時唔係咁」

家長好多時都會講「佢平時唔係咁」。但其實一見就知佢平時都係咁,所以呢句可免就免。因為小朋友個表現係點,老師睇到係咁就係咁。就算你講佢平時唔係咁都無辦法令我哋了解到小朋友平時係點。同時亦反映家長嘅態度,或者轉個講法:「佢今日真係有啲情緒,我哋嘗試處理緊」,反而反映到家長大方面對,亦嘗試處理。

「校長唔好亂叫」

家長要認清楚邊個係校長先好提示小朋友用有稱謂嘅方法打招呼!(因為有啲校長好介意人哋嗌錯人㗎!)

「提早半個鐘到學校」

好多家長都會預早出門口,打算可以預早同小朋友做準備。但其實係唔需要早太多到學校門口準備,比原定面試時間早大約10分鐘就可以。好多時間家長過於緊張到達,但學校又未入得,加上天氣又好熱,小朋友可能又著住西裝,熱到個頭都濕曬,有時候等得耐更係會攰同開始有情緒,反而會影響到面試嘅發揮!(一切都係睇學校俾嘅面試通知書上嘅時間作準,不早也不遲。)

「現場偷拍」

有部份家長會希望記錄自己小朋友喺面試過程嘅表現,或者其他原因而現場偷拍,例如:拎手機出嚟扮覆短訊,又或者將電話放喺恤衫袋,然後凸出鏡頭錄影⋯⋯雖然未必會發現(但多數都會發現),但一旦被發現,想面試成功都幾難。

「管理面部表情」

雖然疫情下大家都戴住口罩,但要留意眼部表情都有好多!所以對於老師嘅提問、小朋友嘅反應都一概平常心處理啦!老師同家長交流時都會透過眼神睇到家長嘅自信,同時都會睇到你哋對小朋友嘅微表情、微動作。同小朋友溝通時,好多家長除咗望小朋友,都會不期然瞄吓老師,但其實唔需要太刻意老師,專心同小朋友溝通就可以。如果唔係老師會覺得你時時刻刻都係扮緊嘢,突登做俾老師睇,咁就唔多好啦!

以上就係今集內容嘅分享!想知道更多有關幼稚園面試嘅Tips同資訊?記得留意我哋下一集《面試極秘檔案 – 幼稚園篇》啦!

⏯️重溫本集: