【幼兒料理】勁開胃 – 豆腐秋葵雞肉奄列咖喱飯

【幼兒料理】勁開胃 – 豆腐秋葵雞肉奄列咖喱飯


一歲咖喱磚嘅功勞,Bella今餐好叻將成碟飯好快食哂!呢個囡平時見到我哋食外賣咖喱飯,成日都想分一杯羮,不過我哋嗰啲真係會辣到噴火,每次都話等媽媽會煮比佢食,拖下拖下今日個lunch終於動手。

今次做左#豆腐秋葵雞肉奄列咖哩飯,亦加左啲雞柳粒,呢隻一歲咖喱甜甜哋勁開胃,之前都有煮過椰汁咖哩薯仔雞飯,淋飯一流,有啲媽媽成日話我知小朋友唔食淡口野,呢款則可試!下次再用佢研究多幾個幼兒菜式比大家,今次就煮住呢款先啦! 

幼兒料理:豆腐秋葵雞肉奄列咖喱飯

材料(一人份量):
硬豆腐1/6磚
雞柳2條,我事先用香草及鹽麴醃,也可用鹽及菇粉代替
秋葵2支
雞蛋一隻
飯適量
一歲咖喱磚一塊

做法:

1. 先用滾水略煮秋葵3分鐘,瀝乾水切粒。

2. 豆腐同樣切粒略滾3分鐘,瀝乾水備用。

3. 用少量油把雞柳粒煎熟備用。

4. 蛋液加入2湯匙水打勻,平底鑊中放油,油滾後轉細火,倒入蛋液等待蛋成型至8成熟,熄火用餘溫令蛋凝固,慢慢取出鋪上白飯上。

5. 鍋中或鑊中放150ml水煮,加入一塊咖哩煮溶成咖喱汁即成。

6. 咖喱汁淋在碟中,放入豆腐粒、秋葵粒及雞柳粒即成。

呢款牌子除左咖喱磚,仲有白汁磚,下次再用佢整款幼兒食譜比大家參考,有興趣可以留意我哋facebook更新。

======================

慢活型媽媽~ 喜歡做幼兒特色料理~ 分享好物情報~

FB:許許與小Bella