【HolidayMama】高鐵短線遊推介~5日4夜南寧親子遊!

【HolidayMama】高鐵短線遊推介~5日4夜南寧親子遊!


暑假去到中段,想即興同小朋友去個旅行,搭高鐵去內地玩下都係個唔錯嘅選擇嚟架~今次介紹一個5日4夜嘅南寧親子遊俾大家。南寧東站係連接高鐵(香港段)嘅新站點,由香港西九龍站出發只需大約4小時車程就到達。成人來回票價大概港幣$870元,小童身高120-150cm約為成人車費半價,身高唔夠120cm嘅仲可以免費!好抵玩!一家大細出行,駕駛前往香港西九龍站當然最方便。而家駕駛轉乘高鐵仲有泊車優惠,每日只需港幣$100,泊多幾日都好划算 !

高鐵行車時間表

高鐵票價

DAY 1
喺香港西九龍站搭高鐵去南寧東站只需要4個鐘頭左右,下午3:33上車去到嗰邊大概係夜晚7:32#。最擔心小朋友肚餓問題,放心喺高鐵車廂內有得買飯盒,味道唔錯架!落車後可以先去酒店放低行李,然後再去食個晚飯或宵夜喇~

今次推介嘅親子酒店位置方便,又有親子套房,小朋友見到一定鍾意!

親子酒店
南寧邕江賓館

地址:南寧臨江路1號
電話:+86 771 218 0888
(親子套房)價錢:約人民幣600~1000元
交通:從南寧東站步行至火車東站,乘坐地鐵1號線(火車東站 - 石埠),於新民路落車可以直接步行至南寧邕江賓館。或由南寧東站搭的士前往只需大約30分鐘車程。

中山路小吃街
酒店離夜市好近,步行過去就已經可以喇!中山路小吃街愈夜愈精彩,有好多唔同種類嘅小食同埋各式各樣嘅餐廳,沿途仲有特色嘅商舖俾大家去買手信,大家一定會食到樂而忘反!

地址:廣西壯族自治區南寧市中山路小吃街

想搵間好坐又好味嘅餐廳,推薦大家試下復記老友粉。佢除咗有南寧傳統嘅小吃之外,仲成日大排長龍,好多當地人都會去食架!

復記老友粉(中山路店)

地址:廣西南寧市青秀區中山路美食街
電話:+86 771 258 2561

食飽飽就梗係早啲同小朋友返酒店休息,一家大細抖夠DAY2將會有一連串好玩嘅親子活動等緊大家。

DAY 2
起身喺酒店食啲野就要拿拿聲出發喇~

第一站:青秀山旅遊風景區
青秀山旅遊風景區係自治區級風景名勝區,2014年更加被評為國家AAAAA級旅遊景區,係廣西十佳景區之一,所以都成為南寧市嘅旅遊地點。
風景區入面有好多唔同嘅園林造景,富有熱帶雨林特色、中國民族特色、具有歷史文化、異國風情嘅園區,各具景觀特色,大人小朋友一齊睇盡至美風景之餘,更是打卡好地方!

地址:廣西南寧市青秀區鳳嶺南路6-6號
電話:+86 771 5560662
門票收費:
普通票 – 人民幣20元
半票(60歲以上老人、學生憑證)- 人民幣10元
開放時間:06:00am – 00:00am
交通:乘坐地鐵城環1線或城環2線到青秀山站。

桂小廚(萬達茂店)
又嚟到補充體力食好野嘅時候喇~為咗爭取時間去下一個主題樂園,一於去南寧萬達茂商業廣場食網上好紅嘅廣西菜。

網上評價好高嘅桂小廚,食飯時間一般都座無虛席,裝修以桂林山水為主。網民除咗大讚環境好又乾淨之外,仲有唔少招牌好味又啱小朋友食嘅菜式添!

地址:良堤路6號南寧萬達茂商業廣場3層
電話:0771-4975535
交通:於青秀山旅遊風景區乘搭的士前往萬達茂,車程約20分鐘

第二站:南寧萬達主題樂園
同小朋友去旅行又點少得去主題樂園玩呢?南寧萬達樂園主要分主題樂園及雨林樂園兩個特色主題遊樂區。主題樂園有20個小區俾小朋友玩機動遊戲刺激一番之餘,仲可以睇到唔少地方名勝嘅縮影,所以去樂園前記得準備定自拍神器影返夠本呀!

大家記得唔好錯過樂園嘅重頭戲 – 百鳥劇場,聽佢個名以為係一個普通小劇場,其實係一套5d電影嚟架!雖然只係睇10分鐘,但大家會有種意猶未盡嘅興奮,所以千萬唔可以錯過,一定會帶俾大家前所未有嘅驚喜!

另外,最新投入運作嘅園區熱帶雨林係以東南亞原始雨林以及文明古跡為題材嘅室內運動樂園,樂園內設置攀爬、攀岩、戲水等五十多種遊樂項目,去到可以玩到以唔同運動為主題嘅玩樂設施,愛刺激嘅小朋友又點可以錯過呢?

呢個係最新開幕嘅熱帶雨林室內運動樂園,大人小朋友真係不容錯過呀!

地址:廣西南寧市五像新區良堤路6號
電話:+86 4001835151
門票收費:每個項目收費,人民幣20至60元不等
開放時間:10:00am – 22:00pm

DAY 3

第一站:廣西南寧鳳嶺兒童公園
呢個廣西最大嘅水陸綜合性娛樂主題公園,同時都係廣西唯一集水陸遊樂、購物餐飲、休閑觀光為一嘅主題樂園。

「陸上」嘅歡樂世界分咗三個主要區域,媽媽們出發前可以留意定小朋友嘅年紀同自理能力去選擇啱佢地玩嘅園區。針對可以自理同自己去玩嘅小朋友,媽媽們可以帶佢地去夢幻海灣區,園區內有碰碰車、旋轉木馬等遊樂設施,多嘢玩到玩唔晒!

小朋友仲細,未識自理的話,鳳嶺兒童公園亦有專區有齊啱佢地玩嘅遊樂項目,好似釣金魚、挖沙、親子座嘅遊樂設施都係一應俱全架!

如果大朋友都想玩埋一份,追求刺激嘅機動遊戲的話就要去夢幻樂園,雖然係兒童公園,但都設有驚險刺激嘅機動遊戲:旋轉大轉盤、過山車、海盜船、跳樓機等等,令爸爸媽媽都可以盡慶一番!

夏天咁熱除咗去歡樂世界玩盡入面嘅娛樂設施之外,仲可以去水埋水上樂園玩水消暑,小朋友一定玩到唔捨得走呀!

地址:廣西南寧市青秀區月灣路1號
電話:+86 4006889827
門票收費:水世界每位人民幣105元,歡樂世界每位人民幣95元,摩天輪每位人民幣42元
開放時間:9:30am – 18:00pm
交通:於市區乘37路、45路、98路巴士到鳳嶺兒童公園站;地鐵乘交通1號線到達東盟商務區站後,A出口出步行約15分鐘

DAY 4

第一站:南寧美麗江南農莊
美麗江南係南寧舉辦親子活動嘅熱門地點,當中更打造咗江南水鄉同四季花海等嘅獨特景觀。農莊一直都堅持自然生態路線,可以令小朋友真正感受大自然。
除此之外,美麗江南農莊喺夏天嘅時候都會開放水上樂園同埋擠牛奶體驗,一定要玩埋先走呀~

地址:江南區沙井街道金雞村五隊
電話:+86 18607719871(需先預約)
門票收費:每位人民幣125元
交通 : 搭的士由市中心前往,車程約40分鐘

第二站:百益上河城
百益上河城前身就係南寧絹紡廠,而家搖身一變就改造成一個創意街區,充斥住唔同嘅打卡點,等媽媽同小朋友都可以一齊打卡影餐飽!當中除咗有一啲特別嘅裝置之外,都有啲塗鴉牆充滿住嘻哈嘅感覺,同時亦保留咗原有嘅舊有建築韻味,行到邊都可以做個小model啦~

地址:南寧市亨洪路45號
電話:+86 0771 4309898
開放時間:9:30am – 18:00pm
交通:搭的士由美麗江南農莊前往,車程約28分鐘

DAY 5
最後一日大家都玩到攰喇~過咗個充實嘅小假期,一家大細食完早餐就可以返高鐵站搭早上11:14嘅車返香港喇,返到香港都只係下午3:13#,可以喺香港西九龍站輕輕鬆食個下午茶先返屋企呢。

今個暑假仲唔bookmark定呢個5日4夜輕鬆親子遊,同小朋友一齊玩轉南寧啦!

# 以2019年7月發佈之行車時間表作參考。