【凌亂客廳ByeBye!】如何教小朋友有趣和有效地收拾玩具?

【凌亂客廳ByeBye!】如何教小朋友有趣和有效地收拾玩具?


如何有趣和有效地收拾玩具?

以前好多幼稚園家長返黎同我講:「點解佢係學校咁乖肯收拾既?佢係屋企唔執玩具架!」其實因為幼稚園既環境佈置、同老師用既方法都可以幫助到佢地,令收拾唔再係一件苦差,而係一件有趣既事!

當未有玩具櫃出現前,我同大部分家庭一樣都係搵一個大籃/箱裝起d玩具。後尾發現玩具愈黎愈多,玩完就咁放係地下又再去拎第二樣⋯甚至同我倒晒出黎🧟‍♀️呀媽我實在受夠了成地玩具凌亂既屋企,諗諗下都係時候教下Holland B點收拾同埋玩完一份先再玩第二份。

💡事前準備1 :材料選購
想小朋友學收拾,咁緊係要幫玩具搵個屋企先。玩具箱?我唔想再案件重演 — 「倒玩具」或者出現「摷玩具」既情況。我決定今次會係一份份玩具或一籃籃分左類整齊擺放,好似人地蒙特梭利玩具櫃咁。不過我只係平民,只能取其精髓,用平民既價錢做到我想既要野。

最後簡左Ikea三層書櫃,我買左兩個。簡玩具櫃一定要符合小朋友既高度,因為小朋友先係用家,以幼兒為中心麻~我預可以用到5、6歲架!(幼稚園既櫃都係咁上下高度)

其實Ikea有另一個櫃都好吸引 —「兩層高既八格櫃」。我兩者考慮左好耐,最後唔要八格櫃既原因係 — 只能放8樣玩具,到3歲左右就唔係好岩洗了⋯除非屋企好大可以放幾個八格櫃啦?!價錢方面兩個書櫃荷蘭呢邊買$500港紙左右,好抵啦!

買完櫃,咁仲有籃同盤要買。木盤呢,坊間一般都好貴。我見Ikea有$60-70蚊既都,但因為size唔岩我個櫃。最後我搵到個再平d十幾蚊,同埋都有手握位,不過係膠盤。呢d配件都係本地家品店買,價錢相當合理👍🏻

💡事前準備2:影玩具寫真
買好配件,就要幫主角影返輯相。因為我期望Holland B可以好好咁收拾同擺放玩具,防止每一層會出現過多既玩具同亂塞既情況。所以每份玩具都會有自己既位,好似月租車位咁。而玩具相會係櫃、籃/盤上出現。

由於玩具櫃位置有限,部分玩具我會收起再得閒替換製造下新鮮感。所以玩具相既佈置都希望係容易替換,於是包書膠同透明膠貼紙係呢到就發揮到好大作用啦。

*「玩具相套」製造方法請參考圖片

💡執行
一開始真係要睇實Holland B玩玩具,因為每玩完一份玩具就係學習既好時機!玩完一份玩具就可以講「Please clean up/請收拾」或者唱下clean up song。同埋要幫下佢,一齊收拾,身教既重要性!

之後等佢拎好份玩具,我會捉住佢雙手一齊係玩具櫃前,一齊搵下玩具相同手指指下份玩具應該放邊,放完就誇張地拍手讚賞。

而當小朋友能完全掌握好「圖片配對」呢個模式後,其實可以按返小朋友既程度將玩具相換成「形狀、動物、車輛、水果、食物,甚至高階版 — 數字、中文字、英文字母」。

我自己個人十分喜歡整齊,所以呢個收拾玩具既方法十分岩我心水。而且又可以係收拾過程中運用到手眼協調、邏輯思維既能力,動下腦筋搵下份玩具相,其實對於小朋友黎講都係一種樂趣!

另外綜合左媽媽們既疑問,係呢到再作小小補充。

💡每個小朋友能力都唔一樣,掌握「圖片配對」呢個收拾模式要幾耐冇一個好正式既時間答到大家。但據過往經驗,約兩歲多既小朋友需要大約兩星期左右去掌握呢個模式。

💡玩完一份玩具,要即時提小朋友要「clean up」擺返好,之後先可以容許小朋友拎第二份玩具。呢個係大原則。

💡唔建議小朋友企係玩具櫃前面到玩,玩玩具需要有特定地方。例如:玩具墊上或兒童檯上。

💡當玩具太多類別,愈細既小朋友,其實愈要仔細分。例如食物一籃、交通工具一籃、樂器一籃、煮飯仔野一籃。如果多到有d分唔到類,咁要檢示下玩具既價值、意義啦。意義不大個d就收起吧!🙈

💡預備功夫雖然較多,同開頭要睇得好實,教亦花時間。但長遠黎講,呢個收拾模式只要小朋友學識左,以後就會乖乖自動收拾。

💡執行呢個「收拾模式」前,請確保小朋友明白「完成/Finish」既概念,例如:食完一餐飯、睇完一本書、玩完一份玩具,之後先可以收拾同擺放玩具。注意小朋友世界有時「唔想再繼續=完成」。

大概一歲前可以明白「完成」既概念;一歲左右明白咩係「收拾」(將物件放入一個容器內);一歲後先可以將兩者連繫。

點先知佢明白咩叫「完成」?如果未識講野,Baby signs幫到你!詳細可參考👇🏻
https://www.ilovemama.com/hollandb2/

如有疑問或更好既提議,歡迎到Holland B FB page留言😊

================

前幼稚園老師,育有兩女,現為全職媽媽。2020年由香港移民到荷蘭,與荷蘭老公團聚。

大女十歲,曾於約克國際幼稚園及保良局陳守仁小學就讀。細女十個月大,以全母乳及Baby-Led weaning餵食。

雖然人在荷蘭,但心繫香港。喜愛分享育兒日常、幼稚園點滴、香港與荷蘭文化差異之處。

Facebook:Holland B – 荷靚B