【Mama心聲】媽媽辛苦了… 你必定經歷過的9項變化!

【Mama心聲】媽媽辛苦了… 你必定經歷過的9項變化!


不得不承認生完bb之後,外型同儀容確實係同做女嗰陣差好遠,最主要係無時間,加上每日都貼身照顧小朋友,就連搽潤唇膏我都驚會癡落佢哋度。生完禧家姐之後都仲可以做下運動同facial,到左弟弟岀世之後,就連去廁所既時間都要趕,何來仲有時候保養。

- 以前一路都有定時染髮,又會轉下髮型,而家我直情頭梳都少用,一起身就將頭髮束起最方便

- 以前返工,會好用心劃眉,一筆一筆好似雕花咁雕上去,而家我索性戴副粗框大眼鏡岀街,遮埋條眉,順便遮埋啲斑

- 面部護理療程少之又少,過往每個月最少兩次到美容院做深層清潔加保濕treatment, 而家連喺屋企貼塊面膜都要鬼鬼祟祟,怕會嘈醒小朋友,嚇親佢哋。覺得自己塊面真係鞋到似沙紙

- 條唇成日甩皮,除左搽無色潤唇膏之外,完全無其他修護

- 手甲以前每兩星期換一次款,襯返啲節日,而家會將指甲剪短,唔想整到小朋友,又唔洗擔心會花同㫁

- 腋下脱毛療程我之前都有join, 但係好耐無去脱,生完肥曬,手臂粗左,已經無膽再著小背心,定期自己用剃毛刀清理,務求乾淨就可以,甚麼用剃刀會令毛孔粗大同閉塞,我已經放棄無理了

- 個身形更加不堪設想,肥腫難分,做左紮肚叫做修返啲個肚,但成個身依然係好圓

- 由於餵母乳既關係,導致胸型走樣,要等斷奶之後做返多健胸運動

- 臀部係其中一個重災區部位,好難減,索性著鬆身衫褲或深色褲去遮

唔知仲可以忍到呢個咁醜樣既自己幾耐呢? 我應該係決心未夠,終有一日我會頂唔順自己去大執一下。

=================

我叫Mandy, 是一位80後全職媽媽和blogger, 育有兩位寶貝(禧禧同熙熙)。

感恩能夠成為全職媽媽,可以見證及陪伴小朋友成長並透過日誌記錄禧&熙既生活點滴。喜歡鑽研烹飪,為小朋友煮岀有營食物,享受湊b生活並喜歡吃喝玩樂,行街及扮靚。

FB:禧。熙。之生活點滴