【HolidayMama】簡易行山x超大草地!郊野半日遊!無敵大草地任你放電!

【HolidayMama】簡易行山x超大草地!郊野半日遊!無敵大草地任你放電!


好羨慕外國有無拘無束嘅大草地俾小朋友自由奔跑?其實香港都有㗎!今日介紹嘅呢個郊野半日遊,簡易行山路線+超大草地,俾小朋友任玩任跑放電!講到要帶小朋友去玩,果然係去戶外最好!

由石硤尾主教山出發,山腳有韆鞦有健體設施,大人同小朋友都可以使用,

旁邊樓梯上大約5分鐘,會見到分岔路,住棠蔭街方向行,沿路係樓梯同微斜既山路,小朋友都可以自己行,

去到山頂位置有個涼亭可以小休片刻,跟住就開始落山喇!

落山既路比較斜,不過都唔難行,

好快就去到大坑東遊樂場😍又大又靚既草地可以休憩、跑步、做運動或者自己帶一啲玩具黎玩,而且人唔多,不過由於疫情關係,草地範圍唔比食野!但場外有長櫈有小食亭,亦可以食啲小食補充下先再入去草地放電~

建議下午3~4點出發,主教山路徑大約20~30分鐘完成,我地係山腳玩左陣韆鞦,係山頂休息左陣,所以用左一個鐘,黃昏係大坑東草地玩完之後,可以去南山邨打咭食同食晚飯❤

活動資訊

大坑東遊樂場
地址:太子界限街63號
開放時間:07:00-22:00

*如果地鐵前住主教山,可以係深水埗或石硤尾站落,山腳有士多同便利店買糧水,沿路係無垃圾桶,記得自己帶走垃圾呀!

*大坑東遊樂場係欖球場同草地足球場,如果同一時間比人借曬就入唔到,不過我地暫時未遇過呢個情況

特別推介,附近有好多木綿樹,5~6月份木綿花落,風一吹就會好似落雪咁🥰

====================

記錄檸茶與飯飯的瘋狂變裝

Facebook:檸茶與飯飯的魔衣櫥
Instagram:fanfan_ot