【港小朋友確診全記錄】詳細病發經過+藥物/用品準備清單

【港小朋友確診全記錄】詳細病發經過+藥物/用品準備清單


有一晚瞓到半夜,想幫比比冚被,點知發覺佢成個身都好熱,用個探熱針一探,竟然發燒到38度。即刻將屋企嘅平安退燒藥俾佢食咗先。

(當下完全冇諗過小朋友有機會中omicron 仲以為係老人家所講嘅發骨節)

到第二朝小朋友都幾精神㗎,但係礙於屋苑附近好多確診個案,所以我哋就同小朋友做快速測試。

為咗可以更加確定個機會率,我哋前後一共用咗兩個唔同牌子嘅測試包做快速測試。但結果都係顯示為陽性。

有見及此當下我哋成家都做咗快速測試,但係只係顯示到我同妹妹都係陽性。

唯有叫爸爸同包包立即同我哋隔離,我同妹就留守喺睡房,除咗要去洗手間,其餘時間都只會留喺房間入面。

比比本來都好精神,但係確診當晚開始,就出現咗發高燒及嘔吐,最難捱係臨天光個段時間,嗰陣時小朋友會發得比較高燒,想瞓但係因為不停咳又未能熟睡,同時要留意住小朋友個呼吸,本身屋企都有血氧儀,所以相對來講就比較容易留意到小朋友個狀況👍🏻。(有機會小朋友手指太幼細,血氧儀未必測試得到嘅時候,建議夾喺佢哋嘅腳趾公或者耳珠都可以順利測試到小朋友血氧嘅情況)

發現確診後,最緊要保持冷靜,增強自己免疫力,感恩就係我哋都唔算好重病徵嘅個案。

以下都係我由確診到康復期間嘅個人分享,希望都可以幫到大家。

確診後嘅頭三日,身體會比較攰。
亦有可能會有以下嘅反應
例如
發燒、流鼻水、咳、有黃痰、心跳快、口淡、周身骨痛、頭痛、喉嚨痛、嘔吐、肚瀉、發冷甚至乎腳痹。

而我自己同小朋友確診後嘅飲食方面主要係清淡。所有比較重味,難消化及刺激嘅食物一律都唔會進食。

早晚除咗刷牙及用漱口水外,
亦都可以用溫暖鹽水/綠茶漱口,有助殺菌。
但記住唔係蜂蜜或者其他味嘅綠茶飲品,係純粹茶包嘅個款綠茶先有用㗎。😂

若果家中如果有康鈣 C或者維他命,就建議每日服食,加強自己嘅抵抗力。

每日最少飲夠兩L 水 /檸檬沖水飲

如情況可以嘅話,都會每日進食一個生果。
最好就係蘋果 因為食橙的話有機會令咳嗽嘅情況更加嚴重。

覺得好攰都係正常反應,因為身體打緊仗,要盡量休息,嗰幾日我哋真係瞓飽就食,食飽就瞓。
足夠嘅睡眠係增強抵抗力嘅其中一個方法。

有需要時先會食藥。

每一次咳到痰出嚟要吐走,沖落廁所兼消毒。咳到痰,啲菌自然會快啲走。
明白到小朋友甚至乎大人有陣時都未必咳到痰出嚟,呢個時候就建議飲橙樹化痰素。

以下有幾隻藥係我個人覺得屋企可以必備嘅。
成人啱用👇🏻

  • 必理痛 (發燒期間服用)
  • 維多C/康鈣c (記住睇足指示啊未夠12歲嘅小朋友係不適合飲用)
  • 必妥碘喉嚨噴霧 (直接噴向喉嚨患處除咗可以舒緩仲可以殺菌,六歲以上小童才適用)

至於大人同小朋友都一律適用嘅👇🏻

  • 橙樹化痰素
  • 川貝枇杷膏
  • Manuka 蜜糖(Manuka 蜜糖能夠消炎殺菌兼同時能夠增強睇抗力。)

另外我自己有睇過一啲關於病毒嘅文章,大概係話由於omicron 係酸性,所以比較怕鹼性嘅飲食。

有見及此,我哋喺確診期間都有另外再飲鹼性水。

確診後第七日就可以再自己用快速測試再檢查。
感恩我哋喺第六同第七日全部都已經變返一條線呈陰性結果。

以上都係我個人嘅做法同埋分享
最緊要明白到自己體質適合什麼方法
同保持冷靜。

當喺屋企隔離確診者除咗瞓覺、沖涼同進食之外,其餘時間係需要戴口罩。

=================

包比媽媽一個80後一打二全職湊兩個既FTM

Facebook:包包,比比&包比媽媽