【 媽媽求教系列之醫生解答篇!】小朋友重複性嘔吐嘅原因|兒科專科 陳欣永醫生

【 媽媽求教系列之醫生解答篇!】小朋友重複性嘔吐嘅原因|兒科專科 陳欣永醫生


早前有台灣有位媽媽求救,佢嘅仔仔去到2歲都仍然係食咩嘔咩,就算係睇晒中醫、開胃酵素、益生菌⋯⋯各種方法都試過,情況都係無改善!原來香港唔少媽媽都有遇到過相似嘅情況,有見及此,我哋小編請嚟兒科專科 陳欣永醫生 幫大家解答疑難啦!

陳醫生表示,重複性嘔吐其實喺小朋友身上偶爾都會遇到,但可以係由好多唔同因素而引致。

導致「重複性嘔吐」的可能因素:

1.腸胃問題

呢個都係最為常見嘅主因。當中比較常見嘅胃液倒流,好有可能會引致小朋友感到反胃,所以容易作嘔。

2.幽門肥大(Pyloric Stenosis)

喺唔同歲數下,都會有唔同嘅考慮因素。如果初生嬰兒,飲奶時成日都有嘔吐情況,有可能係因為有幽門肥大(Pyloric Stenosis)嘅情況。家長如果想檢查一下,就需要帶BB去照超聲波。假如有呢個情況,就需要做手術處理。

3.腸結構問題

除咗幽門肥大呢個因素,初生嬰兒可能都會因為有腸結構問題,如:扭腸、天生腸道發育不良、巨結腸症等問題,而導致重複性嘔吐。

除此之外,仲有「腸套疊」呢個相對下比較罕見嘅因素。但係「腸套疊」病發時就會有非常嚴重嘅肚痛,再嚴重甚至會有因為腸壞死而痾血便嘅情況。但係相比其他因素,呢個情況真係相對比較罕見。

4.食物敏感

另一個「一食就嘔」嘅常見原因,可能係小朋友對某種食物過敏感,例如:蛋 ,當小朋友食用到含蛋類食物,除咗有機會出紅疹,都有可能引發嘔吐情況。

5.腦神經問題

若果小朋友有腦神經方面問題,亦有可能會引致重複性嘔吐。例如患有腦癌導致腦壓變高,就會有突發性嘅重複嘔吐情況。但因為呢種因素導致嘅嘔吐徵狀都係突發性嘅,甚少會有長年累月,或者係幾個月都有持續嘔吐嘅情況。

有個別嬰兒搖晃症嘅患者,都有可能會有重複性嘔吐嘅情況。因為腦部出血導致腦壓變高,慢慢地BB會長期處於迷迷糊糊嘅狀態,然後一兩個星期內突發重複嘔吐。呢個時候各位家長就要多加留意,不過呢個情況都係相對罕見,大家都無需過份擔心!

而有偏頭痛問題嘅人,都可能會有周期性嘔吐問題,可能每隔幾個星期就會有重複性嘔吐問題。

6.肝/腎病

如果小朋友整體上有感染,或者本身患有肝病、腎病,亦會較為容易無胃口、反胃同埋嘔吐。

7.鉛中毒、水銀中毒

如不幸中咗鉛毒、水銀毒,有部份人都會因為咁有重複嘔吐問題。

8.敏感口肌

如果小朋友嘅口肌比較敏感,都可能會出現一進食就會容易反胃嘅情況。

9.心理層面

最後小朋友一進食就會嘔吐,有可能係有心理影響嘅可能性。例如:家長慣性強逼小朋友進食,但當最後佢將所有食物嘔晒出嚟,你就唔會再餵佢,慢慢地佢哋就會用「嘔」作為一個防禦。

如何排除某些因素的可能性?

小朋友的年齡

前文提及嘅因素如:扭腸、巨結腸症、腸套疊呢啲症狀都會喺嬰幼兒時期就可以發現,而幽門肥大又常見於初生嬰兒。所以如果小朋友已經係幾個月大,基本上都可以排除「幽門肥大」呢個可能性,好有可能都係因為胃液倒流嘅可能性會比較高。

其他關聯徵狀

好多因素,例如:腦神經、肝病、腎病⋯⋯除咗嘔吐,都會有其他方面嘅徵狀。

例如有家長提及「心臟穿窿」都可能會引致嘔吐問題,確實心臟衰竭可能會容影有反胃及嘔吐問題,但如果小朋友只有嘔吐呢個徵狀,無其他關聯症狀,例如:氣喘、氣促等等,各位家長都唔需要考慮小朋友有呢方面問題。

尋求醫生診斷

但始終每個小朋友身體都唔一樣,如果發現異常,最好都係搵醫生診斷啦!

鳴謝:兒科專科醫生 陳欣永

圖片來源:褚祐妘|●【爆廢公社】●