【 媽媽求教系列之醫生解答篇!】小朋友確診後症狀點處理?醫生建議必備平安藥!|Dr. Cheryl & Dr. Cathy

【 媽媽求教系列之醫生解答篇!】小朋友確診後症狀點處理?醫生建議必備平安藥!|Dr. Cheryl & Dr. Cathy


最近身邊有好多小朋友感染新冠肺炎,知道各位爸媽都好徬徨同緊張!網上建議嘅預防同處理方法又五花八門⋯⋯BB發燒要沖凍水涼?一發燒就要去急症?小編之前就出咗Post同Story收集大家嘅問題,今日就等
Dr. Cheryl & Dr. Cathy 兩位醫生,解答大家有關小朋友預防同埋感染新冠肺炎嘅問題!

Q:確診新冠肺炎後有痰應該怎樣處理?

一般嚟講,7歲以下小朋友都唔係好識咳痰,所以小朋友啲痰會積聚喺喉嚨係非常常見。建議各位家長可以俾小朋友服用化痰水,或者幫小朋友拍痰,等啲痰可以容易啲出嚟。

拍痰方法

約歲半至兩歲大嘅小朋友,可以先將小朋友面部朝下,patpat位置高過頭部。將手彎掌曲成弓狀,由下至上輕拍背脊。

而大啲嘅小朋友(如:6-8歲),可以叫小朋友直接面部朝下,頭低腳高,瞓喺張床上面。家長將手彎掌曲成弓狀,由下至上,「左右左右」輕拍背脊。

呢個動作可以幫助拍鬆啲痰,令到啲痰可以隨住呼吸氣道同地心吸力出返嚟。

Q:BB瞓覺時呼吸聲變大,是否需要擔心?

因為BB氣道比較窄,如果有痰等其他嘢喺喉嚨,呼吸聲就會變大,屬於正常。反而家長需要觀察BB有無其他症狀,如:呼吸急速、用力呼吸(頸部、肋骨⋯)、危險症狀(嘴唇發紫⋯),如有以上情況,請盡快求診。

Q:BB一感染是否會立即發燒?如發燒,是否需要即時去急症室?

不一定會即時發燒,同時高燒並唔代表病情嚴重。好多家長見到小朋友燒到38、39度,都會好緊張。但其實小朋友免疫系統較成年人弱,好多時一病就會發高燒。想知道小朋友病情是否嚴重,可以觀察臨床症狀,例如:精神狀態尚可,能吃、能睡、能玩,小便次數如常,有反應會回應⋯⋯等等。如果小朋友狀況尚可,只需要搵家庭醫生或者兒科醫生作診斷就可以,並唔需要即時去急症室。

Q:BB發燒要點處理?

向醫生求診後準時服藥。假如小朋友食完退燒水都仍然係高燒不退,亦都可以用濕毛巾定期抹身、多飲水、勤沖涼。

*注意切勿沖凍水涼!

因為沖凍水涼會令皮膚上血管收縮,會更難去散熱。所以各位家長記住要幫BB沖暖水涼,一般37-38度水溫就可以。

Q:確診後濕疹病情轉差,痕癢不止,可以如何處理?

確實係有唔少BB喺確診後濕疹變嚴重嘅情況。因為發高燒時體溫變高,令皮膚表面水份蒸發變得更快。當皮膚變乾,就會容易無咗天然屏障,令到致敏源有機可乘,所以容易濕疹惡化。

濕疹惡化處理方法

最緊要注意保濕!建議可以一日3次搽補濕膏。至於應該使用Lotion、Cream定係Ointment呢?就要視乎返小朋友喺邊一個位置有濕疹,例如:面部就可以使用Cream/Lotion、關節位置就可以使用Ointment。而應該使用邊一隻牌子嘅補濕膏?其實最緊要係試過之後,小朋友可以接受到個濕潤度同黏度,願意持續使用就可以一一「點樣嘅補濕膏最好呢?你肯用嘅補濕膏就係最好!」。

但如果濕疹真係比較嚴重同埋痕癢,咁都可以食用返一啲「抗組織胺類藥物」,可以視乎小朋友年紀俾藥丸或藥水食用。如果真係有比較嚴重嘅地方,我哋都會建議處方輕度或中度類固醇藥膏,去減低皮膚敏感嘅狀況。

媽媽顧慮:類固醇藥膏

好多家長一聽到「類固醇」三隻字就會感到好抗拒,但其實如果喺初步發炎時及早使用類固醇藥膏,係可以大大咁改善病情。越早使用類固醇藥膏,就可以越早控制病情,亦可以使用較溫和嘅類固醇藥膏。但當病情已經惡化,皮膚可能已經變厚,就算想使用輕度嘅類固醇藥膏都已經控制唔到病情,變相就要使用更重度嘅類固醇藥膏。

Q:如何分辨小朋友是否患上嘶哮症? 如果有要點處理?

其實嘶哮症(croup)係由上呼吸道氣管發炎引致。如果患上嘶哮症,就會有狗吠般呼吸聲,但係聲音嘅大小同病情嘅嚴重性不一定成正比。如果有懷疑,建議家長搵醫生診斷。因為輕度同中度嘅嘶哮症唔一定需要入院治療,只需要醫生診斷同處方之後,觀察小朋友有無一啲危險症狀,如:不願進食、呼吸困難、,氣促氣喘、神志不清、小便減少、嘔吐等等。

而Omicron的確主要攻擊上呼吸道,所以確診新冠肺炎嘅小朋友亦有機會出現嘶哮症。

Q:需唔需要買血氧機?

有血氧機係bonus,無都唔緊要!因為市面上血氧機嘅質素可能比較參差,如出現有偏差嘅數據,可能只會徒添家長嘅擔心。

Q:確診後可以點check住小朋友情況?

主要可以觀察以下項目:

  • 神志是否清晰?能否對答如流?
  • 有沒有氣促氣喘? 有沒有呼吸困難?(如:頸部肌肉用力、胸口凹陷、腹部用力)
  • 有沒有嘴唇發紫?
  • 有沒有食慾不振?
  • 有沒有不停嘔吐?
  • 小便有沒有減少?

有以上情況,請盡快求醫。

Q:點揀啱小朋友嘅退燒藥?

如果無藥物過敏同長期病患的話,一般會根據體重,可選用paracetamol (撲熱息痛) 服用,每四小時一次。但假如小朋友仍然係高燒不退,可以先採用前文提及過嘅抹身、飲水等方法。但如果想要有更強力退燒效果,都可以試ibuprofen嘅藥物,但需要透過醫生處方會比較穩陣一啲。

*Paracetamol (撲熱息痛) 除咗有口服,亦有塞肛版本。各位家長喺使用前,記得睇清楚標籤,留意用量同使用方法。最好係聽取藥劑師或者醫生嘅處方,因為如果用藥過量,係有機會損害肝臟㗎!

Q:有咩必備平安藥?

都知道最近睇醫生係比較困難,唔少家長都會想自備藥物以備不時之需。

但較小嘅小朋友(兩歲以下)如有不適,都係建議去睇醫生。事關小朋友身體不適可能都有好多可能性,例如中耳炎、肺部有雜音等等,都係需要有醫生先可以診斷得到。

如小朋友年紀比較大(兩歲以上),又想擺啲「平安藥」喺屋企,家長可以購入Paracetamol (撲熱息痛)、抗組織胺類藥物如chlorpheniramine、 化痰止咳水 (benadryl expectorant)。

*建議先向家庭醫生查詢

Q:小朋友確診後已無病徵,還需要吃藥嗎?

僅記一個原則:「有需要時服用。」如果小朋友已無病徵,咁係唔需要再服藥。藥物主要係舒緩病徵,如果無病徵,就唔需要再食藥㗎啦!

Q:小朋友應該接種疫苗嗎?

如果小朋友符合資格,其實都建議接種疫苗。因為疫苗係現時唯一方法可以有效預防重症同併發症。

六歲以上,香港現時可接種嘅兩種疫苗都有效預防重症及死亡。但一般嚟講,復必泰喺歐美國家嘅臨床數據比較多, 有效同安全數據較多; 而科興就喺南美洲嘅國家,巴西同智利有較多數據同研究。成人嚟講,第三針都會建議去打返mRNA 疫苗去增強抗體水平。各位家長可以自己平衡,選擇適合自己同小朋友嘅疫苗。

Q:疫苗副作用會唔會好嚴重?

好多家長都會擔心疫苗副作用嘅副作用,特別係怕會有心肌發炎嘅情況。但現時臨床數據顯示,由於疫苗劑量只是成人嘅三份一,打完疫苗後小朋友身上嘅副作用都係比較輕微。同一時間,研究顯示16至18歲男性注射mRNA,如復必泰,有增加心機發炎嘅機會,大約係10萬個人入面有7個人,大部分屬於輕症,用非類固醇消炎止痛藥就可以處理。然而新冠肺炎引發心臟問題嘅機率,就大大比打疫苗嘅高,暫時數據顯示為二百分之一。所以兩者比較下,打疫苗引致心臟問題嘅風險,係比患上新冠肺炎嘅低。

Q:小朋友感染再康復後,隔幾耐可以再打針?

由於不同歲數,打完幾針之後嘅建議都唔一樣,大家可以參考以下圖片。

如果有任何懷疑要向自己嘅家庭醫生查詢,資料只作公眾教育用途,不構成個人醫療意見。

====================

陳婉晴醫生 Dr Cheryl Chan 
香港大學內外全科醫學士
卡迪夫大學實用皮膚學碩士 
卡迪夫大學實用皮膚科深造文憑
香港家庭醫學院院士
澳洲家庭醫學院院士

盧敬欣醫生 Dr Cathy Lo 
香港大學內外全科醫學士 

Facebook:Dr C&C – 90後女醫生教室
Instagram:dr_cherylchan & dr.cathylo