【親子好去處】屯門市中心超方便親子套房!火車主題親子酒店

【親子好去處】屯門市中心超方便親子套房!火車主題親子酒店


慶祝呀仔生日,特別安排咗2日1夜行程,住過酒店就好似去咗旅行~超開心!

我哋揀咗企鵝主題房間,色彩繽紛~啱晒小朋友啦!遊戲室嘅電動車呀仔好鍾意玩,另外仲有波波池、玩具、角色扮演~

酒店大堂同餐廳設計到好似火車站咁~地點方便行去V city 5分鐘咋!屯門係我娘家,梗係要搵埋婆婆同表哥一齊去玩啦!出發~

屯門西鐵站F1出口,一出轉左就見到一隻大企鵝啦!

一路沿住左手邊行,大約3分鐘就到酒店!非常方便

酒店門口有隻企鵝仔車長迎接你~小朋友勁興奮!

升降機設計到成個車廂咁!非常特別~先上2樓酒店大堂,舊有火車站設計,好得意!

14:00 check in,需要比$500按金

呢架火車原來會行走㗎!會不定時開車~小朋友望吓望吓突然開車,勁開心!

共有13層,2樓係酒店大堂同餐廳,5樓喺兒童遊樂場,有游泳池但係年尾先啟用

我哋住嘅係7樓中層,全場都係以企鵝為主題嘅房間

食生日蛋糕同收禮物!超開心啦~全部都係企鵝,色彩繽紛!到處都可以打卡!

我哋將兩張雙人床拼埋一齊~大家一齊訓覺,小朋友好興奮,哈哈!

加油呀⋯好快到100 cm!

升降機大堂有大大個企鵝仔!打卡好靚呀~

落5樓遊戲室玩下先!

有半價!平日玩$75/1小時,1小時已經足夠小朋友玩~

*酒店住客、餐廳食客(消費滿HK$200)及水療中心客人可享5折優惠

營業時間
星期一至日: 上午9時至中午12時及下午1時至晚上9時

電動車車場!好好玩呀,小朋友學下揸車!

呀仔已經揸得好自如!

仲有有幼兒嘅冇電動小汽車

仲有得玩角色扮演!消防員、飛機師、警察、醫生、太空人等⋯

太空人超搞笑!

另一邊有少量玩具玩,積木、車場、波波池等⋯

*遊戲室冷氣比較大,記得帶外套!

左邊入口,有㗎巨型火車㗎~哈哈!影返張相留念先~

我地訂房包嘅自助早餐,餐廳入面有火車廂設計嘅座位,只有幾張枱,想坐嘅睇吓有冇機會啦!

難得嘅兩日一夜三代同堂~小朋友話下次要再嚟過!哈哈~

酒店設有免費接駁巴士,可以到迪士尼同機場!

我喺Agoda訂㗎~嗰日係平日,住嘅4人大房9百幾蚊包自助早餐,我見最平二百幾蚊有細房唔包早餐喇!

玩樂資訊

悅品度假酒店.屯門
地址:香港屯門建豐街 4 號
網站:https://m.facebook.com/hotelcoziresort/

==================

Hello~我係初初,懷孕時已辭去工作,轉做全職媽媽,仔仔出世後開始分享親子好去處,幼兒食譜及我的扮靚減肥心得。

Facebook:初初我要做靚媽