【幼兒吹水小貼士】點同小朋友打開話閘子?傾偈有妙法!

【幼兒吹水小貼士】點同小朋友打開話閘子?傾偈有妙法!


[幼兒吹水小貼士👶🏻]都一段時間無分享 #將軍 的學習片段了,最近無得出街,最常做嘅活動就係同佢喺屋企吹水🗣️,同幼兒吹水其實有少少小貼士可以令佢哋更願意講、講得更多、學得更快🧠。

固定、恆常的生活習慣⏰
之前拍片都提及過,想提升小朋友吸收能力,「重覆」同「建立常規」是很重要的,呢兩點除咗用嚟教日常規矩之外,教溝通亦同樣有效。

而家我同將軍多數都喺兩個時段傾偈💁🏻:等姐姐煮飯期間、瞓覺前。當我持續到第三日,將軍喺第四日臨瞓前就主動同我講:「媽咪,我哋傾偈丫👦🏻」,我話好丫,之後就同佢一齊瞓喺度,佢提我:「我哋蓋被先丫,唔蓋被會凍親架👦🏻」,呢啲對白平時係我講,我連續講幾日之後,佢就學識咗講返比我聽喇😂🥰。

究竟咩時間傾係最好🧐?咩時間唔重要,重要嘅係「重覆」同「建立常規」,家長們不妨定一個大人同小朋友都「放鬆」的時間💆🏻,日日都固定同佢傾偈,好快佢就可以暢所欲言講好多搞笑嘢比你聽,真係好Sweet好開心架❤️~

別吝嗇你浮誇的讚賞😍
我哋聽到人讚自己都會好開心,小朋友個世界最重要嘅人就係爸爸同媽咪,佢哋聽到偶像讚自己,係會有好深刻嘅印象嘅。最初傾偈可能只係你講九成,佢講一成,但當佢願意回答你嘅時候,你就要非常浮誇咁讚佢,例如同佢講「BB好乖喎,同媽咪傾偈好開心係咪呢?」、「BB好叻喎,識得答Yes。」就算佢表面上冇乜反應,佢內心都知道自己咁樣做係啱,知道回應媽咪就會得到讚賞,從而得到鼓勵。

小朋友咁細,媽咪唔知同佢傾咩好?
話題可以依家庭需要、小朋友性格而定,假如佢係小霸王,可以問佢:「今日有冇大叫呀?大叫係唔啱個喎,媽咪會驚㗎,耳仔會痛痛。」小朋友冇反應唔緊要,你再重複講多幾次,然後再講其他如:「如果你想多啲朋友,就唔好蝦人呀。」
而我同將軍呢,由於佢性格文靜啲,我就比較驚佢返學之後俾人蝦,所以我個宗旨係教佢乜嘢都要同媽咪講。我每日講開場白就係:「今日嵐嵐玩左咩啊?」(傾10日,10日都係同一句開場白,唔需要創意的)、「今日姐姐煮咩俾你食啊?」、「姐姐有無玩電話?」(順便幫媽咪管吓頭家😂)
所以話題係應該依據屋企嘅關係、同埋小朋友性格而定嘅,媽咪問吓自己最擔心係乜嘢?從而向嗰個方向引導小朋友講多啲。

=================

詩寧 X 我只想在香港落地生根 喺香港返工、買樓、結婚、生仔,樣樣都唔易?齊分享如何苦中作樂。 前電台主持,著作:《聽日準時轉工啊》;專欄:香港01、MamiDaily親子日常、梓峰教育。

FB:詩寧