【英國移民資訊站】居英港爸大呻「太空人」移民辛酸

【英國移民資訊站】居英港爸大呻「太空人」移民辛酸


之前英國政府🏛宣佈最新嘅港人簽證安排,✅持BNO嘅港人同近親可以下年1月起申請「5+1」嘅特別簽證📑移民英國🇬🇧!但BNO持有人要以家庭單位入境👩‍👧‍👦✈️,令想以「太空人」式移民受阻🚫!今次搵嚟居英港爸👨🏻‍🦱,分享做「太空人」嘅辛酸經歷…同小朋友分隔異地🤦🏻‍♂️?小朋友情緒失控😭?一個人喺英國點樣兼顧家庭同工作壓力🤯?等等📝移民真係唔容易,希望睇完會幫到大家🙌🏻💪🏻 #真實經驗分享 #移民爸媽必睇

過去呢8個月,C爸C媽同小朋友都有過唔同分隔異地嘅組合。呢期其中一個熱話係”好唔好做太空人?” 每個人都有自己嘅選擇同情況,雖然我哋分開嘅時間唔算太長,我就用自身經驗同大家分享一下,俾大家參考下當中可能發生嘅問題。

11月嘅時候C爸C媽留低咗小朋友響香港,兩個過咗嚟英國呢邊揾樓,雖然小朋友又話掛住我哋,但係響香港有四大長老睇住,同埋有個肯同佢玩嘅工人姐姐,大致上都冇乜特別事發生,呢個狀況都係維持左兩三個星期,所以係小朋友角度都尚可接受。

但係當C媽返咗香港,C爸一個人響英國呢邊返工,情況就有少少唔同。小朋友喺香港耐唔耐就會話掛住C爸,情緒有少少波動咁啦。因為始終平時小朋友啲活動比賽都係C爸帶佢去多,所以每逢佢啲比賽日,C爸都會有少少失落感,好彩都有啲隊友爸爸會拍返啲片段俾我睇,但係同現場參與唔同啦。慶幸聖誕同農曆年都能夠返香港,所以感覺未至於太差。

最大件事就係由四月開始,C爸同小朋友兩個先過嚟英國。呢個安排原本係諗住小朋友先過嚟開學,同埋等C媽可以專心處理好香港嘅生意同香港屋企嘅嘢。

其實一開頭都OK 㗎,小朋友好開心,因為屋企又大咗,又有個後園踢波。但係其實只係過咗一星期左右,小朋友就開始掛住香港同C媽,而且越嚟越嚴重。有試過食飯時同臨瞓前「發作」,真係喊到收唔到聲。耐唔耐就會問點解我哋要分開,又唔止一次講情願乜都唔要淨係想同爸爸媽媽一齊,其實聽到果下都幾心傷同埋我又可以點呢。。。。

久而久之,C爸開始覺得小朋友越嚟越反叛同包拗頸,需要深層心理輔導嘅次數就越嚟越頻密。。其實當時情況都幾令人擔心,因為小朋友由細到大都係樂觀底,好少嘢可以打沉到佢,但係當刻嘅情景真係堅恐怖。。

C爸嘅心理狀態都係越嚟越差,幻想下所有家頭細務都係要一個人做晒,又要處理小朋友,home schooling 再加陪玩,有時仲要做埋心理輔導,再加上C媽響香港生意上同需要處理有關移民嘅瑣碎野(例如連希特拉都cut唔到嘅cable寬頻呢啲麻煩野),少不免會有少少負能量同拗撬,咁大家就當然會容易燥底。所以小朋友情緒大爆發嘅事候,對C爸簡直就係火上加油,呢三個月冇家暴發生都算係咁。。

如果長此落去,家庭關係一定會每況越下。咁當然好彩C爸響附近都有啲朋友,同佢哋出去玩完之後,就好似叉完電咁,但係當舊電用完,都係會再爆。因為其實個基本因素無變,根本問題還未解決到。

小朋友同大人嘅情緒其實就係好似一條橡筋咁,扯到咁盡,遲早有一日會斷。。咁好彩我哋只係分開三個月,同埋我哋每次都可以冷靜落嚟,大家放開懷抱咁將所有不滿話俾大家知,如果你話兩至三年,我真係諗唔到個後果會點。所以如果有人問我做太空人好唔好同值唔值,我會答如果只係幾個月同埋大家都有共識嘅話,應該係會捱得過。

但係如果長時間,我就絕對有保留,因為心理壓力呢樣嘢,話爆就會爆,陌生環境再加各種壓力,真係唔講得笑。。再講遠啲,睇吓九七年移民潮太空人嘅下場,我相信大家自己都會有答案。

=============================================================

FB:再一次。英國