【英國移民資訊站】一家四口全年開支生活費大公開!移英必看!

【英國移民資訊站】一家四口全年開支生活費大公開!移英必看!


有唔少香港人都考慮 #移民 去 #英國 🇬🇧✈️!除咗有關申請方法、過程等問題📝,大家對喺英國嘅洗費都好有興趣😳!日常洗費💸、水電煤💧、養車費🚗等等大概要洗幾多?小朋友嘅洗費同香港嘅差別又大唔大呢👨‍👩‍👦‍👦?即刻睇吓移民英國嘅Betty一家四口一年嘅支出啦📈!

食物開支

一年來洗最多嘅錢係屋企日常開支!英國同香港買餸嘅分別,我覺得英國買肉平好多,蔬菜都好平,同埋英國嘅超市真係好多選擇,所以我覺得喺呢度買嘢都會好方便!可能因為香港主要係得百佳同惠康,但呢度個競爭好大,好多唔同類型嘅超級市場,我哋都覺得日常洗費買餸比較平。我哋喺超市一星期會兩次大掃貨,每次洗60磅左右。而中國超市就可能一個月去兩次,每次洗100磅左右,買調味料蔬菜等等。總結食物加日常用品,加埋一年大概7200磅左右!

水電煤

係英國會根據屋企大細,家庭成員數目計算,用我哋上年嘅費用做例子:用電費係45磅/月,煤氣煤氣費大概70磅/月、水費60磅/月。電費電費嚟講我覺得比香港係平,可能因為唔使開冷氣!但調返轉,雖然唔使開冷氣,但冬天需要開暖氣,所以煤氣方面相對貴。總結水電煤加埋大概2100磅/年,最後加埋council tax係1280磅/年。

養車洗費

入油方面,因為我哋架車比較細,大概兩個星期入一次油,大約40磅左右,一年大約1200磅!我覺得英國嘅油比香港平一截!呢邊通常12-13蚊/公升。另外仲有車嘅保險,因為我哋買嘅係細車,同埋馬力比較細所以會平啲,我哋買嘅係全保,每年大概800磅左右。牌費約30磅/年!汽車保養大約200磅/年!另外喺英國揸車每年都一定要做一個MOT嘅Test,如果係無做或者唔合格,基本上都係唔可以喺路面上面揸。而我哋嘅MOT係返廠度做所以應該比較貴,54磅/年!

其他零碎洗費

屋企60mb寬頻上網,400磅/年。手機無限上網plan(2人),大概480磅/年、家居保險300磅/年。而係英國仲有一個好特別嘅費用係世界各地都應該無嘅,TV license for BBC營運,雖然唔算平但係都真係幾有用,除咗可以睇紀錄片之外,仲有專屬小朋友嘅新聞等等,157.5磅/年!另外仲有檢查熱水爐嘅錢,大概係60磅/年。雖然呢個檢查係非必要,但基於安全問題,同埋熱水爐可以延長壽命,我哋都建議大家做!如果你都係住House,簷蓬上會有個去水位,會俾樹葉淤塞、雀仔築巢等等,所以每年都要請人上去清潔,清理費50磅/年。

家庭總洗費:約14,000磅/年

小朋友教育

我哋係四人家庭,兩個大人嘅洗費其實可以控制。但相信好多嚟緊想來英國嘅朋友都會希望自己小朋友係英國讀得好啲,接受好啲嘅教育,所以好多人都會請補習老師等等。英國嘅小學其實無乜功課,有好多時間玩,而我哋都唔想逼到小朋友咁緊,所以我哋都有幫佢報數學補習班上吓,做吓練習,60磅/月、720磅/年。另外,我哋都有請補習老師幫佢哋打好根基,價錢大概25磅/堂,一個月大概上12堂。補習方面,一年大概洗3600磅。

另外,校服方面,有分冬季同夏季校服,冬季校服會比較貴因為有好多衫要着。但其實英國買校服好方便,因為全部都可以喺超市買到,除非學校特別有襟章設計,就可能要去專門店買。而校服嘅選擇都有好多,有貴有平,但因為小朋友大得好快,所以我哋都唔想花好多錢喺校服方面。一個小朋友大約100磅/兩季校服,我哋我哋有兩個小朋友,所以就200磅/學年!

教育洗費:4520磅

一家四口總洗費:18500/年

希望呢個數目,對於準備嚟英國,或者啱啱嚟英國嘅朋友,可以俾大家有個概念,知道大概洗幾多錢!當然呢個係好基本嘅數,我哋唔係特別大使,又唔係特別慳,同埋一定會有計漏嘢!例如:住屋上嘅開支我們可能漏咗無加入去,因為租屋供樓嘅數字變化好大,可能對某啲朋友嚟講數字上會有落差。不過我諗呢個數,四人家庭洗都好正常。希望幫到大家更了解英國嘅生活,計算到將要洗嘅洗費啦!

=======================

完整影片:

=======================