【名幼神話-面試初體驗】神校傳聞多,去過先知!

【名幼神話-面試初體驗】神校傳聞多,去過先知!


名幼神話🏅 <面試初體驗> (續)#國x英x幼稚園

上次講開,靚B去左屋企附近一間名幼interview。因為學校既風格實在同靚媽太唔同 😐,所以無應邀去2nd interview。

係香港,著重英文又有廣東話教學既幼稚園,唔太多。靚媽幫靚B報左3、4間幼稚園,除左上次講果間。靚B亦有去九龍塘一間神校做面試。

依間名幼無人不知,每次面試日都會大排長龍。上年靚B未入學,已經聽聞間學校好巴閉,睇下d新聞,又話考英文,又話睇小朋友表現,非常嚴格。亦聽聞佢地張application form唔係申請就會俾你😑。

面試前幾日,靚媽同靚爸協定左,如果去到排隊要等好耐,就唔等了。今次既面試係靚B第一次既面試,靚媽亦對依間學校相當好奇,係師資真正優良到,令香港家長趨之若鶩?靚媽同靚B唔係報左好多間學校,一去無妨。

👉大排長龍?排好耐?
到達學校,真係如傳聞一樣,好大條長龍,學校兩旁都有大批人等候。看一看龍尾,有指示牌,寫著某個面試時間,可排隊。剛剛靚媽沒早沒遲,就排上隊尾。等了5分鐘就可以入去了。其實,報讀這間幼稚園既人數太多,在旁等候既人係早到既家長,或其中一方家長在校外等候。真正排隊既時間唔係如想像咁耐。

入到校園都要等候,但學校有大量,係大量 😌Net teacher 陪你等,排成人鏈,guide 住你入去面試既地方,時不時同靚B傾計,全部時間都放住兒歌。等既時間同埋安排都好流暢,以海量咁多既人黎講,安排絕對係100分。

👉🏻interview好難
Part 1:4位小朋友圍坐玩lego,媽媽可以坐後面。網上有人話,要小朋友自己坐,講到好似小朋友同媽媽會分開好遠,其實全程靚B同我係零距離 🤔。係就係自己坐,係自己坐一張椅子羅😌。

👉面試時家長唔俾同小朋友講野??
網上實在太太太太太多人,好好好好好鍾意話面試時家長唔可以講野!請問係邊到 講既呢?係面試時老師既要求?還是自己杜撰?

Part 1 玩lego時,靚B成日擰轉面,同我傾計,又叫我一齊玩。我都有同佢一齊砌一兩舊喎。(喂!香港家長,如果一間幼稚園面試,要禁絕你同仔囡既溝通,先叫做考到你個囝囡適唔適合入讀,間學校俾你都唔好讀啦。幼兒既成長,親子關係十分重要!)相反,老師完全無話我同靚B既交流有問題,反而我非常欣賞老師用10分鐘時間,觀察小朋友,同其他小朋友同枱玩時既manner。依種觀念係其餘3間幼稚園面試都無做,但靚媽覺得非常重要(因為你都唔想揀一間,d小朋友好鐘意打人咬人既學校既,right?)

👉問英文好鬼深
Part 2: 去另一間房,坐低唔夠5分鐘已經叫靚媽同靚B去老師面前坐低。靚媽填一份問卷,都係問 「你覺得小朋友有咩長短處呀」、「育兒最大挑戰係咩」依d非常易答既問題 (除非平日你無湊小朋友)。 老師問靚B咩問題?我剩係聽到一題,因為我要填4條問題,一心不能二用,好想聽但真係聽唔到 🤦。 老師拿出一張沙灘圖,問「知唔知係咩地方,你去個到會係玩咩?」 我好喜歡學校問既問題,唔係深淺既問題,係最著小朋友日常生活發展既問題。一個小朋友,如果無去過沙灘,又點會知道去個到會做d咩。面試問題背後既設計,正好反映學校既教學理念。答案同時反映到家長與小朋友的親子關係是如何,日常是誰陪伴小朋友去玩的呢?

最著重親子戶外活動既學校,確係我杯茶。接著,我都偶爾有用1、2秒分神去聽,大概都係問顏色,至於有無問英文,我唔知道,我問靚B佢話無喎 😏(靚B識26個字母,但即抽即問可能會有d錯🤪)。最後,老師叫靚B轉一個圈睇下,靚B問 :「即係咩?」🙊 老師做手勢叫佢轉一轉。靚B轉完,老師俾左塊獨立包裝既餅,就講再見啦。

👉面試過程好快,對靚媽黎講真係非常好既體驗。人講既,唔好信,要信就信自己雙眼自己雙耳。

👉讀過N班係優勢
係咪就唔知啦。但靚B無讀N班。無參加面試班。面試前,亦無準備過。

👉傳聞多多
坊間有好多對依間神校既傳聞,最直接係打電話去學校問清楚,自然唔駛道聽塗說,得個明白。至於校風同實際既校園生活,香港幼兒園一向都唔透明,無campus tour,好多名幼亦無open day。

取錄信係用email通知後,再寄出hard-copy,非常有效率同交帶。亦無玩2nd interview。

不過,靚媽有樣野唔太喜歡既係,全程老師係同家長零交流,可能時間太倉促,要應付咁多考生,所以連問家長一兩條問題既時間都無。如果唔係會接近滿分。當然,面試安排滿分不等於甚麼,因為靚媽為靚B選擇學校,還有其他考慮的呢。

============================

beautyma

作者:靚媽湊B記

一位全職靚媽,對育兒有自己的個人看法,不隨波逐流,不約定俗成,深信媽媽的眼界與堅持是成就每一個快樂寶寶的重要元素。