【名幼神話】面試初體驗—上

【名幼神話】面試初體驗—上


名幼神話 🎖 <面試初體驗> 上 #學XX

今年,我跟靚B參加左四個面試,兩個開放日。有一間幼稚園既面試,令我特別深刻。這間幼稚園近年均於各區開辦分校,雖未稱得上為神校,但實是一所名幼。這所幼稚園就離我家不過5分鐘既路程,參加過學校既開放日,配套、師資、課室空間非常充足,應該是不二之選。

當日,我跟靚B進行既面試分為三部分。「短短」一小時既面試,令我真正見識到香港名幼的威力:「作為一名香港土生土長的小孩,我同靚B都總算經歷過一場好典型既名幼面試,日後靚B長大,又有與人交談既話題。」

<第一部分>
一打開門,四位老師一字排開,手執評核紙,有如見工一樣既panel陣形。白板前另有一位不是以英文為母語既老師,以全英文,要求各 “interviewee” 用英文講自己既名,然後根據指示,將一種水果放進一隻動物前面既籃子。其後,跟著老師唱歌做動作。那刻,我深深感受到那份入名幼既壓力😣。這種未入學,已要求小朋友有著聽懂英語指示既要求,似乎偏離我既預期。

<第二部份>
接著到第二間房,再接受廣東話既個人面試。老師拿出一張圖片,圖中有小孩三人,請靚B指出:「圖中有三人,有男孩子及女孩子,有一位小朋友叫寶妮,佢著紅色衫、藍色鞋、拎左三個蘋果,邊個係寶妮呀?”」 老師期望靚B可以立即回答。

我記得教育局曾發出幼稚園面試指引,面試內容不應要求兒童回答和進行超出其年齡層在智能、體能及情緒發展等方面的活動。靚B今年3歲,以上面試確無難度,不是靚B特別叻,而是理解能力以至語文能力是自然的發展,試問有些還未到兩歲既小朋友,怎可回答如此豐富資訊既題目?這項問題,老師問了兩題,然後就沒有甚麼交流,當然我既存在只像伴讀書僮,全程老師沒跟我有任何溝通,甚至眼神接觸。這與她們強調家教合作的方針,似乎有點落差。

<第三部份>
接著還要去第三間房,我與靚B及一班家長在房間填問卷,在房內外等候,已有大概半小時。終於等到校長親臨,校長一進來就告誡我們:「7至11號就係2nd interview既放榜日,你地miss左既話,就幫你地唔到。」 😱當時坐在學生座位上既我,聽到校長的告誡,令我有如回到校園既感覺😪。

最後,校長要求每位小朋友,把問卷紙拿出來,企在校長前,在眾人面前,接受校長提問,接著收下校長送既禮物。我家靚B知道校長要送禮物給她便笑逐顏開,望著充滿動物既圖畫,向校長說多謝。送禮物至靚B道謝過程不到三秒,校長已急不及待,叫靚B要抬頭,企在地下星星位置,「你望著我講多謝!」

校長既指令,像魔法一樣,令靚B那純真的眼神,咀裡半帶微笑,心底由衷既感謝,消失得無形無蹤。禮貌可由形式表達,但過於形式,就只剩下一句無靈魂既道謝。

未出大門,聽到有位家長說,上年已經試過2nd interview:「唔知自己d答案點先可以符合校長要求呢。」另一位家長又說:「依間幼稚園好出名,好難入,仲難過入好過九龍塘名校家,間學校應該唔錯啦。」

我走出幼稚園大門,不禁嘆了口氣。其後,我們決定拒絕了第二次面試既安排,有人覺得我浪費了一個好機會,可以入讀這間配套師資一流,而且是很多人夢寐以求既名幼。各人對教育既要求不同,剛巧這間學校不是我和靚B杯茶。

============================

beautyma

作者:靚媽湊B記

一位全職靚媽,對育兒有自己的個人看法,不隨波逐流,不約定俗成,深信媽媽的眼界與堅持是成就每一個快樂寶寶的重要元素。