【鄭小B嘅妹妹要嚟喇👶🏻👧🏻】陀第二胎真係辛苦啲!

【鄭小B嘅妹妹要嚟喇👶🏻👧🏻】陀第二胎真係辛苦啲!


我的二寶孕初期 (0-3個月)

有人話陀第二胎辛苦過第一胎! 
我就深深體會到! 🤰🏼喺懷孕初期頭3個月,害喜嘅情況都挺嚴重同辛苦😢 !
冇胃口、食唔落、胃酸倒流、作嘔、孕吐樣樣有齊!跟陀小b嗰時係兩回事!

當時陀小b,整個孕期裡都只係嘔過兩次,今胎未夠3個月就嘔過好多次😫!小b爸都好擔心,仲話: 「今胎嘔咗咁多次,上胎陀阿仔都冇咁辛苦!」 唔止咁,因為血壓低,經常見暈,唔舒服,好多家頭細務都做唔到🤦🏼‍♀。

試過暈陀陀暈足兩日,全日都要瞓喺度。照顧小b,家務等,都交哂俾小b爸,連3餐都係靠佢買外賣返嚟! 不過,最辛苦嘅係肚痛!感覺啲腸胃迫埋哂一齊,拿住拿住痛!仲痛到嘔出嚟!😔而最嚴重嗰刻喺地鐵,沾寒沾凍,標哂冷汗💦,上扶手電梯突然眼前黑咗一刻,幸好冇暈低!🙏🏻 以上嘅狀況,一過咗3個月就好好多了💜!只係間中仲有作嘔及胃酸倒流嘅情況!  


到了踏入懷孕嘅第4個月,☎就收到通知中咗 #妊娠糖尿 ,往後嘅日子就要keep住督手指督到生!同時要控制好食量、少食多餐、戒口、每餐用油都要注意用一茶匙、食飽飯要散步30分鐘🚶🏼‍♀。 

我的二寶孕中期 (4-6個月)

上篇孕記提到嚟到4個月,中左妊娠糖尿!
最初收到消息,Down咗兩日,好驚對二寶有咩影響,又怕要打針!
經過醫院一日Day Camp,聽營養師講解飲食注意嘅地方、少食多餐、少吃碳水化合物等….. 喺醫院食足3餐,每餐兩個鐘後督手指check血糖; 跟姑娘學習用血糖機,返屋企自己督手指!

回家後,都算有乖乖跟足營養師嘅餐單 (早午晚3餐+3餐茶點),餐後步行20分鐘!每隔3日就督手指 (空腹+3餐餐後),check血糖。 不過,我咁為食,間中都會食好西,食完第二日食番清啲或者少食多滋味! 

來到將近23週,返醫院照結構。 終於知道bb嘅性別啦!
係妹妹喔!! 小b爸嘅前世情人。
檢查完,妹妹比正常嘅size偏細,差啲跌出條線!即時好擔心!助產士建議我返去食番多啲嘢,飲多啲奶,但有妊娠糖尿,所以要肥b不肥媽!稍後醫生睇過,有需要嘅話就安排照多次!

而家每個月都要返醫院見糖尿科醫生同產檢兼交功課 (家居血糖監測記錄)。

最近一次,空腹指數唔理想,僅僅合格或超0.2,醫生就需要安排我見營養師,了解返我嘅飲食習慣同調教一下餐單!
因為懷孕後期 (8個月左右啦) 荷爾蒙嘅變化,會令血糖不穩,血糖值會越高!所以必要好好控制飲食同體重! #肥b不肥媽

見過營養師後,佢並唔擔心我3餐所食嘅嘢同份量,但就要戒清一啲零食,例如: 薯片呀、蛋撻呀、蒸蛋糕、果汁…..即使少少都唔好!!要食番多啲雞蛋,豆腐等,還要飲多啲水!!另外,晚上嘅茶點,要多加一份水果!

今個月再返嚟見多一次營養師,餐單跟得好,指數又靚仔嘅話,就可以唔洗再嚟見營養師!  

#小b媽孕記 #二寶 #第二胎 #二寶孕媽 #30w2 #二寶孕

================================================================

WhatsApp Image 2017-06-28 at 13

80後新手全職媽媽,洗衫買餸煮飯家務湊B一手包辦。為了兩位老闆健康,努力學習鑽研三餐、湯水、小吃、甜品。見到你倆食得開心滿足,就是媽媽的推動力及鼓勵!<鄭小b之成長日誌> 記錄了小b飲食,還有小b一些成長點滴。

Facebook page: 鄭小b之成長日誌