【澳洲移民資訊站🇦🇺】報讀政府幼小注意事項!有留班、合併班?!

【澳洲移民資訊站🇦🇺】報讀政府幼小注意事項!有留班、合併班?!


上次請嚟港媽Kimmy分享唔使坐移民監💁🏻‍♀️,又可以入籍澳洲嘅方法🤓!今次就等Kimmy同大家分享一下💭,佢喺澳洲幫四歲仔仔👦🏻同五歲囡囡👧🏻,搵幼稚園同小學嘅經過🏫!同埋一啲喺學校觀察到同香港學校嘅不同之處🆚👀!!

澳洲嘅教育體制。喺香港好多家長包括我自己在內,都好似急住送啲小朋友返學,兩歲幾就開始讀N班。喺維州墨爾本呢度幼稚園係由三歲開始,主要係分為三歲同四歲幼稚園。喺呢邊Kindergarten/preschool好多時都會被簡稱為kinder,又或者Kindy。三歲幼稚園政府嘅學費資助會比較少,所以學費會比較上貴過四歲幼稚園。有啲家長會選擇四歲先至幫小朋友報讀幼稚園,但係原來呢度幼稚園都唔係強制性要讀嘅。

因為上年受到pandemic嘅影響,維州政府為咗增加就業,同埋鼓勵啲媽咪出返嚟做嘢,今年政府特別豁免咗四歲幼稚園嘅學費!平時嚟講呢,學費一年大概要$2000幾左右,Primary 小朋友喺每個州嘅入學cut off日子都會有唔同!大家要留意番啦,喺維州嘅Cut off係4月30號。即係話,譬如小朋友要入讀四歲Kinder佢就要喺入學嗰年嘅4月30號或之前足四歲;而小學嘅入學年齡就係五歲。

呢邊嘅小學係7年制,由prep,又或者叫foundation year即係學前班開始,然後中學就係六年制,由Year 7 至 Year 12。喺維州,傳統嚟講, Year 11至12 就係讀VCE (Victorian Certificate of Education),即係似香港嘅DSE!喺澳洲每年嘅新學年都係一月尾開始嘅。

簡單介紹吓好多時家長搵澳洲學校都會睇嘅幾個網站:

(主要係介紹幼稚園同托兒所)

www.careforkids.com.au

(其餘以下網站就係關於搵小學同中學同埋佢哋嘅評分)www.education.vic.gov.auwww.findmyschool.vic.gov.auwww.myschool.edu.auwww.bettereducation.comwww.school info.com.au

我哋返嚟嘅時候阿仔已經四歲,所以就要幫佢搵四歲幼稚園。 有啲人,尤其係如果爹哋媽咪都要返工嘅,就會可能選擇送個小朋友去child care centre (即係托兒所)嗰度順便讀埋幼稚園。呢度亦都有一啲叫做Family Day Care嘅服務(即係一個合資格嘅child care worker,又或者幼稚園導師攞個牌,喺自己屋企收學生提供托兒或幼稚園服務)。如果你係打算送你個小朋友去托兒所,政府會有相對嘅資助而資助/補貼金額就視乎家庭年度入息而定嘅。家庭收入越高補貼嘅金額就越少。

除咗幼稚園,亦都有啲人會選擇送小朋友去Early Learning Centre 又或者Montessori 學校。 我哋返嚟嗰陣時我都諗住都會做全職媽媽,所以就揀咗報讀政府資助嘅幼稚園。要報讀呢啲幼稚園,就必須去返所屬嗰區嘅council嗰度報名。通常council係會喺入學之前一年嘅六月尾截止報名。

講真,幼稚園間間睇落去都好似差唔多,學費又差唔多,咁點揀呢?我就首先就睇吓佢哋嘅教育方向、設施啦。另外最緊要呢就係睇佢上堂嘅時間!四歲嘅幼稚園每星期要上15個鐘嘅,有啲幼稚園就會將啲時間打得好散,可能分開四日上堂,有啲呢就可能一個星期返兩日long day,即係譬如8:45至4:15。嗰陣時因為仔仔都仲係需要瞓晏覺,所以咁長時間就覺得唔係好適合。而如果打散幾日返,又覺得每日返嗰一陣又要來來回回去接,好似有啲嘥時間。

我另外揀呢間幼稚園嘅原因就係鍾意佢有個廚房,佢哋話會同啲小朋友整嘢食,咁見到其他幼稚園又無呢個設施,佢哋主張啲小朋友Learn through play and experimentation,所以我覺得呢間幼稚園幾可取!報完名之後等咗三丶四個禮拜就收到排位消息, council就話我地最心儀嗰間幼稚園要等輪候位,仲要係排第五,佢叫我哋考慮揀其他幼稚園。但睇咗有兩間都OK嘅都係滿額,咁我就諗council叫得我哋揀其他幼稚園,都會叫其他人揀,如果嗰啲人去咗第二間咁即係個waiting list咪應該短左囉!所以我就決定等落去,好好彩我哋都終於成功喺開學之前等到有空缺!

報完名下一步,就係要登記兩個小朋友嘅打針記錄。喺維州,政府就實施咗No Jab No Play嘅法例,即係未打齊針就唔可以返學玩。打完針之後council 就會將個紀錄存喺ACIR (Australian Children Immunization Register),日後啲小朋友所有打針嘅record都會被儲喺呢個政府機構度。除咗可以俾張卡council去certify,其實你都可以搵本地嘅家庭醫生幫你certify張針卡。

喺呢邊讀幼稚園真係好開心,連我都好開心。因為阿仔讀嗰間幼稚園會要求家長每個term都起碼返去幫手兩日做吓volunteer。我覺得咁嘅安排好正,一來可以睇到個仔返學嘅情況,二來自己又可以玩埋一份。家長volunteer 返到去幫手執下野丶有時洗下野、但係大部份時間都係幫手睇住D小朋友玩,又或者同佢地一齊玩。其實好多時我去幫手嘅時候都無咩特別理個仔,我自己都係返去玩,可以同其他細路一齊畫下畫、整吓勞作又或者讀書俾佢哋聽。

雖然話就話讀完四歲幼稚園,啲小朋友就應該入小學讀prep,但係有陣時個幼稚園老師如果覺得個小朋友心智各樣未夠成熟,佢都可能會建議個家長俾小朋友讀多一年幼稚園先至升上小學。呢樣唔係啲咩特別嘅事,尤其係男仔,因為佢哋比較遲熟。有啲家長可能因為各種理由都會照幫個小朋友報讀小學,睇吓佢哋上到prep點樣再算。因為政府小學嘅學費係一定平過讀政府嘅幼稚園,所以佢哋情願個小朋友可能係prep到讀多一年都好過喺幼稚園讀多年。

係我哋間小學,啲幼稚園小朋友會喺升學之前一年,被安排去小學嗰度三四次喺課室度玩下,等佢哋可以熟習環境同埋俾啲老師認識下佢哋。學校仲會幫每一個prep學生搵一個五年級學生做buddy,等佢哋返學嘅時候都有個大哥哥或者大姐姐陪下佢哋玩。 我哋會叫啲學前班學生做preppies。呢段時間係比佢哋適應新環境,同埋俾老師同佢哋做評估等,老師之後可以按照佢哋嘅能力,安排學習program。

揀小學,家長會睇ranking 之餘,亦都可能會睇埋間學校嘅NAPLAN成績。NAPLAN (National Assessment Program – Literacy and Numeracy)呢個成績係主要睇個小朋友嘅語文同數學能力,相比全國其他同年級學生嘅standard。老實講,有時我都會喺度諗間學校嘅ranking,或者NAPLAN成績有幾多係真係歸功於啲老師教得好,定係嗰間學校多學生出咗去補習,所以學校嘅得分會高啲?

除咗上網搵資料,平時家長其實可以去學校啲open day/school tour參觀下學校平時上堂嘅情況,同校長或者其他教職員傾吓計先,再決定間學校啱唔啱佢哋,但係而家暫時仲封緊關大家為有上網做住virtual tour 先。阿女過嚟嘅時候五歲半, K3都未讀完,當時都有諗過佢入小學應該報Prep 好定係Year one。去學校報名嘅時候,校務處就提議佢讀Year one試吓先,我見佢平時個人都算外向,又多嘢講都覺得佢應該夠成熟去讀Year one所以就即管俾佢試。填報名表嘅時候我都寫低我嘅擔心,「佢係細B唔知會唔會適應到,同埋始終都有啲擔心佢英文追唔上。」我諗係因為咁樣佢哋就安排阿女入去一個年資較深嘅老師嗰班。個老師又安排同班一個相對成熟同有領導能力嘅女同學,同阿女做buddy帶住阿女小息同lunch time一齊玩。阿女好快就適應咗澳洲學校嘅生活~

至於英文方面,有個 EAL(English as an Additional Language)嘅老師同佢上咗一堂,做咗個assessment 之後 ,覺得佢無需要再上呢啲英文輔助班。大部份學校都應該有呢種EAL英文輔助班,所以如果有需要大家搵學校嘅時候就可以問清楚學校呢方面嘅support係點。 我都可能會建議啲家長俾個小朋友過到嚟留班半年俾多少少時間佢去適應。

另外一樣,我諗香港家長會比較少聽到嘅就係composite class,呢個我自己譯為混合/合併班。就係有啲學校有時會將啲唔同年級嘅學生合成一班,例如Yr 1同Yr 2又或者Yr 2 同Yr 3會被安排同一班等等。主要原因係可能學校學生人數比較少,要好好安排資源就將啲唔同年級嘅班合併。有時,如果唔同級數修生數目差別好大,亦都可能會有呢個安排。好似我之前做嘢嗰間基督教學校佢嘅小學部都係得200鬆啲個學生,所以大部份嘅班都係composite,譬如佢有一班六年級嘅學生亦都有一班係六年級同五年級合併嘅。composite class 喺澳洲都幾普遍,大家搵學校嘅時候不妨留意一下。

============================

完整影片:

============================