【BB唔肯講嘢?】過來人4個小方法令BB開金口同講多啲!

【BB唔肯講嘢?】過來人4個小方法令BB開金口同講多啲!


唔知大家嘅小朋友多唔多野講呢?我家個位小姐成日都唔講野,同月齡嘅小朋友都講得多過佢><雖然我都明白小朋友發展各有快慢,但係都會想佢可以快啲講多少少,起碼可以表達到自己想要啲咩,唔使成日都炆憎或者淨係識得喊去表達~

小恩恩依加就快22m,但講野真係一般般,但呢3個月不斷train佢,22m先有啲進步。如果媽媽們都覺得小朋友講嘢比較慢,都可以試吓以下嘅方法!

1. 點讀筆圖書

由於我個女唔會成日肯坐定定喺度睇書,所以買點讀筆係可以令到佢個人專注啲,同時可以引佢興趣去學詞語!每當佢「點」得多,個腦會愈儲愈多,佢講識講「豬」、「班馬」都係因為本點讀圖書~

2. 親身體驗

有啲bb睇書都已經肯跟住講,但小恩恩並唔係咁易就搞得掂嘅bb,所以我係會帶佢望多啲真嘅野!例如我會帶佢去啲動物園,尖沙咀、金鐘都會有唔同嘅動物可以睇,有時佢見到啲動物喺度郁嚟郁去,佢會覺得好興奮,同埋會好容易跟住我講!好幾次「雀雀」、「貓貓」、「汪汪」都係因應見到實物面認識!

3. 我問你答

小朋友其實模仿能力好高,可以嘗試多啲問答嘅對話,例如「你要唔要呀?」、「好唔好?」等等,可以逼下佢答你先可以比佢,當然唔係話問一兩次,佢就會識得答啦!我都有幾次係要買爸爸或者婆婆示範,要佢哋答我,我先會比佢哋,等小朋友知道原來要回答先可以得到。初初嘅階段仲要自問自答XD

4. 句子篇

雖然小恩恩仲未識得答句子,但呢排我都盡量訓練要佢講「媽媽比」、「食飯飯」等句子性嘅對話,其實呢啲字眼佢都識得講,但唔知點解夾埋一齊佢就唔肯講。所以我每次都會要佢跟住我講「媽媽」、「比」,盡量拆開先,要佢講晒呢3個字先,久而久沒,佢就會完整地講到成句架喇!

後記:有時候做家長往往都會比較心急,但千祈唔好因為小朋友唔講嘢而覺得炆憎,反而引佢講多啲,俾多啲耐性同鼓勵肯定佢哋,小朋友受到正面嘅鼓勵會進步得更加快!所以唔需要心急,因為佢哋終有一日都會變得吱吱渣渣:P

==================

一直希望成為年輕媽媽,認為「兒女是上天最大的祝福和禮物」,希望能借分享懷孕、育兒、健康、扮靚、攝影資訊,成為你懷孕路上的同行者。

Facebook:90後 P牌媽咪