【HolidayMama】7間香港士多啤梨園合集！免費入場！超大粒任你摘！

每年12月至3月係香港本地士多啤梨收成季節，捉住季節嘅尾巴，不妨帶埋小朋友去士多啤梨農場摘吓士多啤梨啦！小編一次過搜羅咗7間士多啤梨農場，有部份仲係免費入場，除咗士多啤梨仲有其他蔬果可以新鮮摘返屋企～

1)朗屏士多啤梨園

講到士多啤梨園，唔少人都會聯想到元朗！朗屏士多啤梨園嘅入場費全免，一入場就可以俾大家任摘士多啤梨啦～農場有約10款士多啤梨品種，包括紅寶石、章姬、佐賀清香、紅臉頰等等，每$90/磅起。

同場仲有其他農作物可摘，例如：日本提子、車厘茄等，全部都係按磅收費。

大家亦可以購入飼料餵飼園內小動物，俾小朋友同動物嚟一個近距離接觸！

注意事項

不需要預約
入園前請主動scan安心出行
園內需要自行2人1組，保持社交距離
園內請勿除下口罩
建議入園前先自行用膳

朗屏士多啤梨園
地址：元朗大棠路大棠村
營業時間：8:00-18:00
電話：9251 8926
網址：按這裡
交通方法：從朗屏西鐵站轉K66巴士於大棠站落車

2)大棠有機生態園

大棠有機生態園設有數量有限嘅套餐優惠可以購買，每位成人$160包入場同任摘食士多啤梨券，而小童長者只需$140。

除咗士多啤梨，仲有有機香印提子（$150/磅）同埋有機車厘茄（$40/杯）可以摘，可以一嚐新鮮生果嘅滋味～

另一個必玩項目真係佢哋嘅「巨型滑草場」！$60就可以有得玩20分鐘，現場仲可以租借頭盔同埋滑板。滑草場設有唔同斜度同深度，有唔同嘅刺激感！而且為咗小朋友可以玩得更安全，園方更係喺人造草下而舖咗軟墊，大家可以更安心！不過要留意返，因為安全原因，滑草場只限3至12歲小朋友參與。

唔夠大嘅小朋友都有其他設備可以玩，例如：餵動物、彈彈床、遊戲車等等，喺呢度玩一日都OK!

夏天仲有荔枝可以摘㗎！

收費表：

注意事項

疫情關係，馬房關閉。

大棠有機生態園
地址：元朗十八鄉大棠山道11號
營業時間：10:00-17:30
電話：2470 2027
網址：按這裡
交通方法：乘港鐵接駁巴士K66號線，於大棠山道站下車後步行約15分鐘

3)有機士多啤梨自摘園

有機士多啤梨自摘園位於錦田鄉村俱樂部側邊，一家大細去的話可以一次過玩埋！士多啤梨園免費入場，同樣都係摘幾多收幾多，$120/磅起，有日本、法國、韓國種士多啤梨。除咗可以任摘多款種類嘅士多啤梨，仲可以去錦田鄉村俱樂部餵羊餵兔仔、玩電動車、彈床、BBQ等等。

有機士多啤梨自摘園
地址：新界錦田水尾村230號
營業時間：10:00 – 18:00pm（平日）；10:00am – 22:00pm（假日）
電話：5132 5131
網址：按這裡
交通方法：錦上路西鐵站D出口，乘601特別線(假日)專線小巴，或平日在元朗乘601專線小巴，在「錦田鄉村俱樂部」下車。