【製作調味料】為飯餸增添香氣—自製BB版XO醬

【製作調味料】為飯餸增添香氣—自製BB版XO醬


隨著柯豬和些莉妹長大了,清蒸白烚的食物不一定能滿足到她們的胃口,有咩辦法可以唔駛落咁多鹽糖,而又幫助提昇餸菜的味道?

其中一個柯豬媽常用的方法是使用香草,新鮮或者乾的都可以,各有各好處。最常用到的是羅勒 basil、迷迭香rosemary、香茅 lemongrass、洋芫荽 parsley、檸檬葉 lemon leaves,佢地係醃肉的好幫手,或者切碎/磨蓉做醬汁,令餸菜味道更突出。柯豬媽的 favorite是將新鮮的羅勒葉+橄欖油打成基本的青醬(傳統的青醬還有蒜頭、松子仁、芝士) ,加少少去煮 pasta真係香到無朋友㗎! 上星期做了一盤青醬忌廉通粉番學校做4月之星生日party的食物,全盤清晒之餘連柯豬的班主任食過後都讚不絕口,哈哈,開心到彈起 

如果話你小朋友唔好香草的味道,柯豬媽有另一個食譜同大家分享,就係『BB版XO醬』? 材料非常簡單,只用了櫻花蝦、乾葱頭、蒜頭和油,煮完出嚟齋睇同坊間的XO醬有8成似,但我無加任何的調味料,單靠炒香的蝦、葱和蒜已經非常香口,勁野味!
柯豬媽建議可以只用油的部分,用來煎蛋或炒菜,或者可以整個醬料來配飯或麵一起食,都十分搭配。

『BB版XO醬』的做法:

材料:
櫻花蝦 2湯匙
乾葱 1粒
蒜頭 1粒
植物油 30ml

Image may contain: flower and food

乾葱切絲,蒜頭切碎。用小鍋燒熱油(不要過熱) ,先下乾葱爆香,用最細火煮至半透明時加入蒜蓉和櫻花蝦繼續煮,直到聞到很香很香的味道和櫻花蝦變得香脆,就可以熄火,完成。

Image may contain: food

PS. 櫻花蝦,乾葱和蒜頭都係易燒焦的食材,記得要用慢火,慢慢煮,不可以心急用大火煮,很容易變炭,會很苦的~

PPS. 植物油可以揀油味淡薄的粟米油,葡萄籽油,米糠油,芥花子油等。

PPPS. BB版XO醬攤凍後,放乾淨的容器蓋好可以放雪櫃5~7日,所以不妨煮多一點放雪櫃
隨時拎出嚟用。

Image may contain: food

====================

audreypropic

擁有兩個女兒的80後媽媽,最愛看食譜逛超市睇廚具。多得大女兒對食物奄尖聲悶,
發揮小宇宙運用不同食材創作BB餐,與眾同樂,分享煮食心得。

Facebook:柯豬媽媽 – all about baby Audrey and Sherie 柯豬姐與些莉妹