【週末好去處】寓學習於玩樂!—紙飛機親子餐廳 – Origami Kids Cafe@HolidayMama

【週末好去處】寓學習於玩樂!—紙飛機親子餐廳 – Origami Kids Cafe@HolidayMama


親子餐廳,好多都係主要食野,旁邊會有一個細小嘅區域,劃左係比小朋友玩,大人就可以慢慢享受,食飯唔洗趕頭趕命。今次想介紹 Origami Kids Cafe,哩間親子餐廳最特別嘅係,佢食飯嘅位置和小朋友玩樂嘅範圍,幾乎係等同。餐廳仲要係以創意融合中菜,中菜親子餐廳,咁特別?到底係來食飯,定係帶小朋友來玩耍?

一來到就要先登記,之後會有工作人員出來幫小朋友量體溫,再幫小朋友清潔雙手!之後要除鞋仔,大人都要,大人另外有拖鞋提供,再之後有工作人員安排我地入座,場內亦有BB凳提供。餐廳內嘅餐椅,甚至係BB凳,都係以白色為主,令到餐廳望落好光猛。

紙飛機親子餐廳有著全港首家木粒沙池,天然環保。芊嶠一開始都唔敢落木粒沙池去玩,係見到有啲工具,可以比佢剷木粒沙,佢先肯落去玩。但似乎木粒沙池上層比較吸引,木粒沙池嘅上層就好似上格床咁樣,有啲木製玩具係上面,感覺似一個私人空間,話比爸媽聽,請勿打擾!另外,嶠媽提提大家,上落一定要好小心,因為樓梯都比較窄,有家長陪同上落就最安心!

過少少就有張小木桌和幾張小木椅,小朋友可以坐係到 high tea,有木製茶具、餐具,仲有木製麵包,真係好真實,芊嶠亦自得其樂,好似小主人咁,又斟茶,又切麵包!再隔離有個小帳篷,好似一個小天地咁,芊嶠入左去,仲介紹下入面有啲咩,差啲想係入面訓埋添!

之後可以去一間細屋仔,入面好似劃左兩個細區咁,一邊有木製玩具,有一個木製大農場,小朋友可以坐係隔離,設置農場內嘅設施,好似置身於真農場一樣。旁邊亦有一個木製大停車場,內外都有好多唔同類型嘅木車仔,小朋友可以推住車仔去泊車,好適合男孩子玩!

講到女孩子,屋仔另一區有一個小天地,有張小床仔,晾衫架、亦有小BB車,芊嶠就哄BB訓覺,又放BB上凳坐係到,幫佢戴口水肩,餵佢飲奶!另外,亦有一個醫生出診箱,芊嶠又化身成小醫生,幫BB看病,又餵BB食藥。仲有塊燙衫板,芊嶠又燙下BB啲衫仔,再晾起BB嘅衫仔,哩個位絕對係女孩子嘅天堂!

再前少少,近餐廳食飯位置,有個小BB天地,有個圍欄圍住,怕小BB爬出來會危險,我地當然放劻霖入去啦!入面有木製玩具,又有琴,劻霖都玩得好開心,仲時不時彈下個木琴。芊嶠都有入去陪細佬玩,教細佬仔彈琴!

玩得累,媽媽可以帶小朋友去圖書區,個到有好多本唔同種類嘅書,嶠媽與芊嶠選好書後,就搵左個舒適嘅位,坐係到親子時間,共閱圖書。芊嶠都好投入,嶠媽講故事,都係十分浮誇,唔知芊嶠係咪學左我,自己睇個陣,都會好浮誇咁講出來!

左邊仲有一個位置,小朋友可以認下英文字,爸媽可以同小朋友一齊砌佢地嘅英文名,玩完再係隔離筒仔到拎 LEGO,直接砌上 LEGO 牆上,都幾好玩!去到最右面,就有個小市集,芊嶠推住BB車,帶埋BB去市集買餸,有蔬菜、水果、魚等等,質感都好真實,芊嶠拎起條魚都有啲驚!買完就去比錢,比完錢,拎住啲餸又可以去到隔離嘅小廚房,大展廚藝,誓要做一個地獄小廚神。

=========================
Origami Kids Cafe

地址:香港九龍灣承豐道33號啟德郵輪碼頭B區北面平台
電話:6063 7470 (需預約)
時間:10:00 am – 20:00 pm
價錢:平日:小童 $98/位 (2小時);周末及公眾假期:小童 $138/位 (2小時)
(12個月以下嬰兒及成人免費,成人最低消費是一杯飲品)
網址:https://www.origami.com.hk/

==================

kiufam嶠媽簡介:喜歡分享,想同大家分享與細佬的生活點滴,吃、喝、玩、樂、育兒資訊,家庭生活,親子好去處。

FB Page: 芊嶠與細佬·雞蛋仔