【週末好去處】邊食邊玩無難度!-焱咲自煮理平板燒概念店@HolidayMama

【週末好去處】邊食邊玩無難度!-焱咲自煮理平板燒概念店@HolidayMama


今日為大家推薦一間好玩又好食嘅親子餐廳~

田媽今次約咗兩位閨蜜同佢地的小朋友,一齊去到呢間我地想去咗好耐的親子餐廳。由於兩位哥哥姐姐已經讀緊小學,要搵一間BB到10歲都玩到既親子餐廳唔係咁容易,好彩今次俾田媽搵到呢間位於長沙灣的焱咲自煮理平板燒概念店。

去親子餐廳其中一樣爸爸媽媽會擔心的,就係衛生問題。去到呢間餐廳,一入門口店員就會幫大人小朋友量度體溫。遊戲區喺門口旁一個房間內,入去之前要除鞋同用消毒液清潔雙手。遊戲室通風做得好好,而且設有空氣清新機。

最特別之處,係遊戲室有一塊大玻璃,家長們可以喺用餐區睇到遊戲室內的情況。另一樣窩心之處,係用餐區有兩部電視,播放住遊戲區內的情況。爸媽們就可以好放心,一邊食,一邊睇住小朋友放電。

至於食物方面,一般親子餐廳的食物都係意粉、薯條呢類大路嘢,但係呢間餐廳係食物方面都落足心機。平板燒好似鐵板燒咁,將食材放上面燒熟嚟食。所以食材都無調味,係煮的時候自己加。不過食材用料好新鮮,所以就算唔駛點加調味都已經好好味。

雖然小朋友去度都係掛住玩多過食,餐廳都為小朋友提供兒童餐,咁就唔駛怕食燒烤嘢會熱氣。兒童餐的味道都偏淡口,小朋友可以放心食。而且食的時候都不忘要玩,因為兒童餐會有個飯波神器,小朋友可以一邊玩一邊食。

食完玩完餐廳仲會送小朋友一份小禮物,大人小朋友都盡興而歸!

溫馨提示:餐廳的booking都好full,weekend要預早一個月訂位~

 

焱咲自煮理平板燒概念店
地址:荔枝角長沙灣道883號億利工業中心9樓916室 (荔枝角站D出口)
電話:62950918
營業時間:星期一至日 19:00-23:00

 

==============

Justin全職媽媽,每日嘅任務係帶住囝囝飲飲食食同玩,不斷學習做個好媽媽,發放湊仔正能量!

Facebook:田媽玩樂誌