【週末好去處】人生馬戲團之踩鋼線體驗-闖進歷奇王國!@HolidayMama

【週末好去處】人生馬戲團之踩鋼線體驗-闖進歷奇王國!@HolidayMama


「只要敢挑戰、克服恐懼、踏出的第一步,你會發現原來自己可以做得到!!」
「你好想玩但因為害怕而放棄?你嘅開心就只會停留玩瀡滑梯咋~」
「不如我地坐喺到睇吓其他小朋友玩,再決定上唔上去啦?」

以上係小姐猶疑緊上唔上去高達 5 米嘅 Air Trek 踩鋼線時,我同佢講既一番說話⋯⋯

暑假期間為咗搵節目比小姐放電,搵到愉景灣一個室內遊樂場 EpicLand 歷奇王國,初初係俾三十米長嘅彩色滑梯吸引住(因為小姐生得比較高,唔係有太多滑梯適合佢玩,就算玩到都係一瞬間瀡咗落黎,刺激感欠奉⋯⋯)

我地當日連同我好朋友、一位5歲的可愛小女孩一齊去玩。去到目的地兩位小朋友已經好興奮喇~

OLYMPUS DIGITAL CAMERA

EpicLand 歷奇王國裡面所有玩樂設施都超受小朋友歡迎— 彈彈床、攀石、迷宮、黑色隧道滑梯、三十米長彩色滑梯⋯⋯小姐同朋友仔玩左好多好多好多好多次,尤其黑色隧道滑梯,次次玩完都話好恐怖,但又跑番上去再滑過~哈哈!

OLYMPUS DIGITAL CAMERAOLYMPUS DIGITAL CAMERA

大量的遊戲設施從適合幼童(0-3歲)到大過10歲嘅小朋友都有 (最鍾意呢一點,照顧不同需要)
唯一係Air Trek行鋼線活動,未必所有夠130cm嘅小朋友可以玩到 (網上資料係要求145cm,我都怕小姐差3cm玩唔到,但原來已經改成130cm就可以挑戰)

小姐睇完其他小朋友玩,決定上去挑戰一下。其實我睇得出佢心情超緊張,我係下面望住小姐一步一步行上去,我一邊笑一邊幫佢打氣,但其實⋯⋯我都好緊張,都好怕小姐係上面驚到會差錯腳。整個過程小姐愈玩愈好,第一關開始時,細細步細細步咁行。到最尾兩關,雖然仲係好驚,但都肯放膽去做,一路諗方法去完成。媽媽我喺下面,心情真係好複雜呀⋯⋯(有D感動,又有D眼紅紅)

Workma_4

小姐玩完行落嚟時即刻鬆一口氣,我問:「係咪好驚呀?」

小姐: 「初初我驚到唔記得晒D野,明明記得提自己唔好望地下,但上到去又好奇望咗幾下,就好驚喇!而且我成個人出晒汗,手掌好多汗,捉實扶手時好滑呀~」

我: 「你咁驚做咩唔中途落番嚟呀?」 小姐: 「雖然好驚,但唔可以放棄!我好想完成,其他小朋友都可以唔驚,我都唔可以驚就要求落番黎㗎!」

成長過程的確就如踩鋼線一樣,行唔到就諗下其他方法。驚?唔識去面對?逃避就永遠學唔識面對困難。失敗和困難是一生成長中必需的調味劑,要感激遇到困難,因為它可以令自己學會更多,成長更快,總好過活在完美沒有錯的世界之中。放手吧,試試給小孩學會跌倒的痛吧!比起去上興趣班,學術班更加能夠豐富小孩的人生~

**玩完呢個playhouse,發覺香港好多遊樂場都只係適合幼童至小童玩樂。小學生再行入公園玩,牛高馬大,又會俾人覺得咁大個仲同小朋友爭野玩咁。但其實!!小學生咁忙咁大壓力,佢地真係好需要去玩,去輕鬆一下!!!!**

小貼士:

  1. 最好早上去,09:30剛剛開門係最少人的,大約12:00好多遊戲都要排隊
  2. 記得著襪呀,因為唔可以著鞋入去
  3. EpicLand 歷奇王國網頁內提供愉景灣巴士線號碼: C4/C9 ,但當日我地發現改成為T4/T9
  4. 入場手帶好重要!如果早上玩完出左去食午餐,再入場都係靠手帶識別

EpicLand 歷奇王國
地址:香港大嶼山愉景灣愉景北商場地下G31
營業時間:上午9時半至下午7時半
費用:
星期一至星期五:$148/一大一小 (兒童為1-12歲),額外成人(13歲或以上) $168/位
星期六、日及公眾假期:$188/一大一小 (兒童為1-12歲),額外成人(13歲或以上) $200/位
(入場者須帶上手帶,全日可自由進出)
電話:2441 0098
網址:http://epiclandhk.com/ch

 

 

 

=====================

mama propic

80後在職媽媽,返工、放工、煮飯、湊女|雖然好忙,但仲係擁有人顆熱烘烘 の 港女的心|食、買、玩、係我既生活動力~|你估….工作與家庭之間平衡得好, 一D都唔容易Ka>.<|一齊分享工作、家庭、生活瑣碎趣事,在忙碌之中輕鬆一下~

Facebook page: 在職mama好地坊