【Mama專訪】10年新聞主播轉教小朋友口才 張文采:唔想收咗錢上完堂就算

【Mama專訪】10年新聞主播轉教小朋友口才 張文采:唔想收咗錢上完堂就算


「各位觀眾大家好,我係張文采。」相信呢句說話,唔少家長都見字有聲!任職咗十年新聞主播嘅張文采,離職後除咗有做主持、司儀等嘅工作,原來亦係一個主播口才技巧訓練導師,由大學到小學、細至幼稚園嘅學生都有教。今日ilovemama就邀請到張文采上嚟,同大家分享教小朋友口才嘅心得!

前新聞主播張文采
前新聞主播張文采

新聞主播=讀稿機器?

主播的工作比想像中更高難度

好多人聽到主播就會覺得只係「讀稿機器」,跟住字幕機讀完稿就收工。但張文采就認為:「呢個係一個好大嘅誤解,其實新聞主播每一日都有好多執生、突發嘅情況需要應付。」例如字幕機可能經常會壞,或者有打錯字、打漏字嘅問題, 都需要由主播把關,即時執生。另外一啲突發消息或者意外發生,係一定唔會有稿跟住讀,好多時要靠主播嘅經驗、急才,即時睇住新聞片段、畫面,表達返正確嘅資訊俾觀眾知。以上種種都需要長時間嘅訓練同經驗累積返嚟,當中有好多學問,並唔係想像中咁簡單。張文采補充:「當初我想做導師嘅其中一個原因,都係好想俾人知道我哋行內真係做嘢嘅時候係點樣。」

主播 VS 導師心態大不同 

做導師要滿足學生的需求,上課後有得著

做主播同做導師嘅性質好唔同,一個係面對觀眾,而另一個係面對學生。文采就分享,做主播、主持同導師嘅心態轉變都幾唔同!做主播嘅時候,完成咗一個工作,自己滿足咗就夠,但做導師其實係要滿足到學生嘅需求,「我希望佢哋上完堂之後真係學到嘢、有得著,而唔係我收咗錢上完堂咁樣就算。」原來文采喺擔任緊主播嘅期間,已經有喺大學任教 ANCHORING AND COMMUNICATION,所以而家由自己設計課程,親自教小朋友口才技巧,都可以運用返一直以嚟嘅教學經驗!佢好希望可以透過訓練班,將喺傳媒主播行業超過10年嘅經驗分享出去,同埋等多啲人了解呢個行業。

任職主播期間,亦有於大學任教的經驗

教小朋友口才難度高?

平時喺鏡頭上好嚴肅嘅新聞主播,面對小朋友又會用咩態度?教小朋友會唔會好高難度呢?文采認為教小朋友同教大人好唔同,佢哋嘅專注力比較弱,好難捉住佢哋坐定定聽你講嘢,所以一定要用啲有趣嘅方法,吸引佢哋主動學習!佢通常會用急口令嘅方式引起小朋友注意,當佢哋覺得好得意、好好玩,就會爭住想去做練習。久而久之,經過唔同嘅練習就令佢哋講嘢咬字清晰啲,學識點樣準確啲去表達自己。

教小朋友一定要用有趣的方法

佢認為越細個開始教佢哋口才係越好,因為小朋友嘅吸收能力、學習能力比大家想像中高好多,佢哋細細個就好似海綿咁,吸收咗好多嘢,再慢慢喺日常生活中用返出嚟!

主播口才技巧訓練是甚麼?

文采親自編寫嘅主播口才技巧訓練班會針對小朋友常犯嘅毛病,由發音、懶音、語調、節奏、肢體動作等方面逐一拆解,透過唔同嘅練習同指導,重點改善小朋友嘅口才技巧。過程中佢亦會從旁指導,俾小朋友落咗堂喺屋企都可以做到練習,唔係上完堂就算!

主播口才技巧訓練班會針對小朋友常犯的毛病

第一樣最著重改善嘅地方,就係好多人都會犯嘅懶音問題、咬字問題。好多時小朋友講嘢嘅時候太懶,咬字唔係咬得咁準確,加上喺冇人提點嘅情況下,自己都唔知自己讀錯!例如係我哋而家住緊嘅地方──「香港」 ,其實好多人會讀咗做「香趕」。聽落好似覺得差唔多,冇咩問題?但當小朋友演說或者面試嘅時候,呢啲小細節可能就會影響咗觀眾或者考官對你嘅觀感!

除此之外,另一個好多人會犯嘅錯誤就係用咗唔恰當嘅動作或者表情,例如當你想表達一件好開心嘅事,但木無表情咁講,人哋就好可能誤會咗你嘅意思!喺課堂上面都有啲練習俾小朋友做,例如喺唔同嘅場景,要佢哋用唔同嘅語氣或者表情去表達相同嘅內容。

第三樣嘢就係一定要俾佢哋有實習嘅機會,要佢哋示範好似主播咁樣讀稿、朗讀,然後導師喺旁邊作出指導。文采希望小朋友可以勇敢啲表達自己,從中增加佢哋嘅自信,唔會驚要面對面同人哋交流。亦希望小朋友落咗堂之後,喺屋企自己都會做練習,就可以慢慢進步,越讀越好。

文采仲提及到細至發聲嘅方法、點樣練習用丹田講嘢、上台前克服緊張等嘅小技巧,都會喺課堂上毫無保留地同學生分享。

小朋友一學就識?

最重要是潛移默化,慢慢吸收

現代可能好多人都比較心急,期望學完即刻見效,但其實口才係需要時間「浸」出嚟!文采就提醒大家:「千祈唔好覺得可以一步登天,上完一堂之後個小朋友就一定會學識呢一樣嘢,其實最緊要嘅係要潛移默化,喺日常生活入面都要著手去幫助佢哋 ,先會進步得到。」佢就曾經教過一班小學生,上頭幾堂嘅時候表現到好似唔太上心,教過嘅嘢佢哋都唔記得咗咁樣⋯⋯但後來佢發現小朋友真係需要時間慢慢吸收、潛移默化,因為去到最尾嗰幾堂叫佢哋再示範嘅時候,佢哋嘅表現突飛猛進,讀得非常之好,之前所教嘅嘢、所講嘅嘢佢哋全部吸收到再運用返出嚟!仲試過有次邀請咗百幾個家長喺禮堂度睇佢哋嘅表演,大家都表現得非常之好、非常之專業。

訓練口才的重要性

口才對大人和小朋友來說都相當重要

對於小朋友嚟講,佢哋經常會有大大細細嘅面試,無論係中學、小學、幼稚園面試,甚至連興趣班都可能有面試嘅時候,口才就非常非常之重要!因為好多時面試未必會着重你講嘢嘅內容,反而會睇下你會唔會好有自信、講嘢有冇條理、會唔會可以好清晰表達到自己諗嘅嘢,先至係最重要。又或者大人喺職場上,有好嘅口才,自然令人更信服你講嘅嘢,更易接納你嘅意見。


如果大家對張文采親自教授嘅主播口才技巧訓練班有興趣…

>> 可按此了解更多 <<